କରୋନା ପାଇଁ ଡାକ୍ତରଙ୍କ ଟିପ୍ସ । ନୂଆ ଷ୍ଟ୍ରେନର ଲକ୍ଷଣ ବଦଳିଛି, ଯୁବଗୋଷ୍ଠୀ ଅଧିକ ଆକ୍ରାନ୍ତ ହେଉଛନ୍ତି । ପ୍ରଥମ ଷ୍ଟ୍ରେନ ଅପେକ୍ଷା ଦ୍ୱିତୀୟ ଷ୍ଟ୍ରେନ ଅଧିକ ଘାତକ ।
କନକ ବ୍ୟୁରୋ : ରାଜ୍ୟରେ କରୋନା କାୟା ମେଲାଉଥିବା ବେଳେ ଦୁଇ ବିଶେଷଜ୍ଞ ଡାକ୍ତର କରୋନାକୁ ନେଇ ଲୋକଙ୍କ ମନରେ ଥିବା ଦ୍ୱନ୍ଦକୁ ଦୂର କରିଛନ୍ତି । ପ୍ରଫେସର ଡାକ୍ତର ଜୟନ୍ତ ପଣ୍ଡା କହିଛନ୍ତି, ପ୍ରଥମ ଷ୍ଟ୍ରେନ ଅପେକ୍ଷା ଦ୍ୱିତୀୟ ଷ୍ଟ୍ରେନ ଅଧିକ ଘାତକ । ବୟସ୍କଙ୍କ ଅପେକ୍ଷା ଶିଶୁ ଓ ଯୁବକ ମାନେ ଅଧିକ ଆକ୍ରାନ୍ତ ହେଉଛନ୍ତି । ଟିକା ନ ନେଇଥିବାରୁ ଯୁବବର୍ଗ ଅଧିକ ସଂକ୍ରମିତ ହେଉଛନ୍ତି । ତେବେ ଆଶ୍ୱସ୍ତିର କଥା ହେଲା, ରାଜ୍ୟରେ ଗୁରୁତର ରୋଗୀଙ୍କ ସଂଖ୍ୟା କମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଡାକ୍ତର ସମ୍ପଦ କୁମାର ଦାଶ କହିଛନ୍ତି, ଗତବର୍ଷ ଅପେକ୍ଷା ନୂଆ ଷ୍ଟ୍ରେନରେ କିଛି ନୂଆ ଲକ୍ଷଣ ଦେଖିବାକୁ ମିଳୁଛି । ଥଣ୍ଡା ଓ ଜ୍ୱର ରହିବା ସହ ପେଟଜନିତ ସମସ୍ୟା ଦେଖାଦେଉଛି । କରୋନା ଆକ୍ରାନ୍ତଙ୍କ ବାନ୍ତି ହେବା ସହ ପତଳା ଝାଡା ହେଉଛି । ସେହିଭଳି ଥକାପଣ ମଧ୍ୟ ଅଧିକ ରହୁଛି । ଚିକିତ୍ସାରେ ଅକ୍ସିଜେନର ଆବଶ୍ୟକତା ଅଧିକ ପଡୁଛି । ବୟସ୍କ ଓ ଯୁବବର୍ଗଙ୍କ କ୍ଷେତ୍ରରେ ସଂକ୍ରମଣ ତୀବ୍ର ରହୁଛି ।
ସେହିଭଳି ପ୍ରଫେସର ଡାକ୍ତର ଜୟନ୍ତ ପଣ୍ଡା କହିଛନ୍ତି, ଟିକା ନେବା ପରେ ବି ଲୋକେ ସଂକ୍ରମିତ ହେଉଛନ୍ତି । କିନ୍ତୁ ଏହି ସଂକ୍ରମଣ ସେତେଟା ଗୁରୁତର ନୁହେଁ । ଟିକାକରଣ ପୂର୍ବରୁ କରୋନାରେ ଯେଉଁଭଳି ଗୁରୁତର ସମସ୍ୟା ଦେଖିବାକୁ ମିଳୁଥିଲା ଏତେ ତାହା ଆଉ ନାହିଁ । ଟିକା ନେବା ପରେ କରୋନା ଏତେଟା ପ୍ରଭାବ ପକାଇ ପାରୁନାହିଁ । ଯେଉଁଥିପାଇଁ ବୟସ୍କ ଲୋକ ମାନେ କରୋନାରେ ଏତେଟା ଆକ୍ରାନ୍ତ ହେଉନାହାନ୍ତି । ଯୁବଗୋଷ୍ଠୀ ଅଧିକ ସଂଖ୍ୟାରେ କରୋନାରେ ଆକ୍ରାନ୍ତ ହେଉଥିବା କାରଣରୁ ଆସନ୍ତା ମେ ୧ରୁ ୧୮ରୁ ୪୫ ବର୍ଷ ବୟସ୍କଙ୍କୁ ମାଗଣା ଟିକା ଯୋଗାଇଦେବା ନେଇ ଘୋଷଣା କରିଛନ୍ତି ସରକାର ।