ଡେଙ୍ଗୁ ମଶାର ନୂଆ ପ୍ରଜାତି ଆଲବୋପିକ୍ଟସ । ମଶାଙ୍କ ବଂଶବିସ୍ତାର ପଛରେ ଜଳବାୟୁ !

କନକ ବ୍ୟୁରୋ : ରାଜ୍ୟରେ ଡେଙ୍ଗୁ ବଢିବା ପଛରେ ମଶାର ନୂଆ ପ୍ରଜାତି । ଏଥର କେବଳ ଦିନରେ ନୁହେଁ ସନ୍ଧ୍ୟାରେ ବି ଡେଙ୍ଗୁ ମଶା କାମୁଡିଲେ ଆପଣଙ୍କୁ ହୋଇପାରେ ଡେଙ୍ଗୁ । ଭୁବନେଶ୍ୱର ସମେତ ରାଜ୍ୟରେ ଡେଙ୍ଗୁ ଜ୍ୱର ବଢୁଥିବାବେଳେ ଏବେ ଏହି ଡେଙ୍ଗୁ ମଶାର ନୂଆ ପ୍ରଜାତି ସମସ୍ତଙ୍କ ଚିନ୍ତା ବଢାଇଦେଇଛି

ପୂର୍ବରୁ ଏଡିଶ ମଶା ଡେଙ୍ଗୁର ରୋଗର କାରଣ ଥିଲା । ଏବେ ଆଲବୋପିକ୍ଟସ ପ୍ରଜାତିର ମଶା ଡେଙ୍ଗୁ ଜ୍ୱର ସୃଷ୍ଟି କରିପାରୁଛି । ଏହାକୁ ବାଘୁଆ ମଶା ବି କୁହାଯାଏ । ରାଜ୍ୟରେ ଏଡିଶ ମଶାର ୩ଟି ପ୍ରଜାତି ରହିଥିଲା । ଏଥିମଧ୍ୟରୁ ଏବେ ଆଲବୋପିକ୍ଟସ ପ୍ରଜାତିର ମଶା ଅଧିକ ପ୍ରଭାବ ବିସ୍ତାର କରିବାରେ ଲାଗିଛି ।
-ସହରାଂଚଳରେ ଅଧିକ ବଂଶବିସ୍ତାର କରୁଛି ଆଲବୋପିକ୍ଟସ
-ପାଣି ଜମିଥିବା ସ୍ଥାନ ଓ ସନ୍ତସନ୍ତିଆ ସ୍ଥାନରେ ଏହି ମଶା ଅଧିକ ଦେଖାଯାଇଥାଏ
– ସକାଳ ଓ ସନ୍ଧ୍ୟାରେ ଆଲବୋପିକ୍ଟସ ମଶା କାମୁଡିଥାନ୍ତି
-ଗ୍ରାମାଂଚଳ ଓ ସହରତଳି ଅଞ୍ଚଳରେ ଆଲବୋପିକ୍ଟସ ଅଧିକ ଦେଖିବାକୁ ମିଳିଥାଏ

ଆଲବୋପିକ୍ଟସ ମଶା ଡେଙ୍ଗୁ ସହ ଚିକେନ ଗୁନିଆ ରୋଗର କାରଣ ହୋଇଥିବାରୁ ସତର୍କ ରହିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ ।

କିଛି ଅଂଚଳରେ ଆଲବୋପିକ୍ଟସର ମାତ୍ରା ଅଧିକ ରହିବା କାରଣରୁ ସେ ସବୁ ଅଂଚଳ ଡେଙ୍ଗୁର ହଟସ୍ପଟ ପାଲଟିଛି । ବିଶେଷକରି ଜଳବାୟୁ ପରିବରତ୍ତନ ଯୋଗୁଁ ମଶାଙ୍କ ଏଭଳି ବଂଶବିସ୍ତାର ହେଉଛି । ତେବେ ଏହି ମଶାଙ୍କ ଶରୀରରେ ମ୍ୟୁଟେସନ ହୋଇଛି କି ନାହିଁ ତାହା ସ୍ପଷ୍ଟ ହୋଇନାହିଁ । ଏ ନେଇ ଅଧିକ ଗବେଷଣା ଓ ଅନୁଧ୍ୟାନ ଜାରି ରହିଛି । ଏଡିଶ ମଶାଙ୍କ ଶାରୀରିକ ଗଠନରେ ବି ପରିବର୍ତନ ହେଇଛି । ପୂର୍ବରୁ ଆଲବୋପିକ୍ଟସର ଯେଉଁ ଆକାର ଥିଲା ତାହା ହ୍ରାସ ପାଇଛି । ଏହି ମଶା ଏବେ ଦିନ ସହ ସନ୍ଧ୍ୟାରେ ବି କାମୁଡୁଥିବାରୁ ମଶାରୀ ଟାଙ୍ଗି ଶୋଇବାକୁ ପରାମର୍ଶ ଦେଇଛନ୍ତି ଡାକ୍ତର ।

ରାଜ୍ୟରେ ଏବେ ଡେଙ୍ଗୁ ନମୁନା ପରୀକ୍ଷା ୧ ଲକ୍ଷ ପାର କରିଛି । ସେଥିମଧ୍ୟରୁ ୭ ହଜାରରୁ ଅଧିକ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି ।