ଦ୍ୱୈତ ନଗରୀର ପୋଲିସ କମିଶନର ଭାବେ ଆଜି ଦାୟିତ୍ୱ ନେବେ ସୌମେନ୍ଦ୍ର ପ୍ରିୟଦର୍ଶୀ : ଅପରାଧ ନିୟନ୍ତ୍ରଣ ହେବା ବଡ଼ ଆହ୍ୱାନ; ପ୍ରଶ୍ନ, କାର୍ଯ୍ୟକାରୀ ହେବ ତ ବିଦାୟୀ ସିପିଙ୍କ ଯୋଜନା
କନକ ବ୍ୟୁରୋ : କଟକ- ଭୁବନେଶ୍ୱର ଟ୍ୱିନ୍ ସିଟିର ନୂଆ ପୁଲିସ କମିଶନର ଭାବେ ଆଜି ଦାୟିତ୍ୱ ଗ୍ରହଣ କରିବେ ସୌମେନ୍ଦ୍ର କୁମାର ପ୍ରିୟଦର୍ଶୀ । ଦିନ ୩ଟା ୩୦ରେ ଦାୟିତ୍ୱ ଗ୍ରହଣ କରିବେ ସୌମେନ୍ଦ୍ର ପ୍ରିୟଦର୍ଶୀ । ଅପରାଧ ନିୟନ୍ତ୍ରଣ ହେବା ବଡ଼ ଆହ୍ୱାନ । ନୂଆ ଦାୟିତ୍ୱ ନେଇଥିବାରୁ ସରକାରଙ୍କୁ ଧନ୍ୟବାଦ ଦେଇଛନ୍ତି ସୌମେନ୍ଦ୍ର । ୧୯୯୫ ବ୍ୟାଚର ଏହି ଆଇପିଏସ ଅଫିସର ବିଭିନ୍ନ ସମୟରେ ସରକାରଙ୍କ ପାଇଁ ସଙ୍କଟ ମୋଚକ ସାଜିଛନ୍ତି । ରଥଯାତ୍ରା ଭଳି ବଡ ଦାୟିତ୍ୱ ହେଉ, ନବକଳେବର ଭଳି ଆହୁରି ବଡ କାମ ହେଉ କିମ୍ବା ଫନି ଭଳି ବଡ ବାତ୍ୟା ପରେ ଉଦ୍ଧାର ଓ ପୁନଃନିର୍ମାଣ କାମ ହେଉ, ସବୁଥିରେ ଖୋଜାପଡନ୍ତି ସୌମେନ୍ଦ୍ର ।
Kanak News is now on WhatsApp
Join and get latest news updates delivered to you via WhatsApp
ଚେନ୍ନାଇର ଆନ୍ନା ବିଶ୍ୱବିଦ୍ୟାଳୟରୁ ବିଟେକ୍ କରିବା ପରେ ଭାରତୀୟ ପୁଲିସ ସେବା ପରୀକ୍ଷାରେ ସଫଳତା ପାଇଥିଲେ ସୌମେନ୍ଦ୍ର ଏବଂ ଓଡିଶା କ୍ୟାଡରରେ ତାଙ୍କୁ ନିଯୁକ୍ତି ମିଳିଥିଲା । ବଡ କଥା ହେଉଛି, ସୌମେନ୍ଦ୍ର ସରକାରଙ୍କ ଜଣେ ବଡ କ୍ରାଇସିସ୍ ମ୍ୟାନେଜର । ପୁରୀରେ ଯେତେବେଳେ ମନ୍ଦିର ସେବାୟତ କିମ୍ବା ଶ୍ରୀଜିଉଙ୍କ ନୀତିକାନ୍ତିକୁ ନେଇ ସମସ୍ୟା ଦେଖାଦିଏ, ସେତେବେଳେ ସରକାର ସୌମେନ୍ଦ୍ରଙ୍କୁ ଖୋଜନ୍ତି । ଅଫିସର ଅନ୍ ସ୍ପେଶାଲ ଡ୍ୟୁଟିରେ ରହି ନବକଳେବର ଭଳି ଜଟିଳ ଏବଂ ସମ୍ବେଦନଶୀଳ କାର୍ଯ୍ୟକ୍ରମକୁ ସୁଚାରୁ ରୂପେ ସମ୍ପାଦନ କରିଛନ୍ତି । କ୍ରାଇମବ୍ରାଂଚର ଏଡିଜି ଭାବେ ସୌମେନ୍ଦ୍ର ପ୍ରିୟଦର୍ଶୀ ହାଇପ୍ରୋଫାଇଲ ପ୍ରଦୀପ ପାଣିଗ୍ରାହୀ ଓ ଅଭୟ ପାଠକ ମାମଲାର ତଦନ୍ତ କରୁଥିଲେ । ଏହାଛଡା ବହୁ ଚର୍ଚ୍ଚିତ ଭୁବନେଶ୍ୱର ଇନଫୋସିଟି ନାବାଳିକା ଗଣଦୁଷ୍କର୍ମ ଅଭିଯୁକ୍ତଙ୍କୁ ମଧ୍ୟ ଗିରଫ କରିଥିଲା କ୍ରାଇମବ୍ରାଂଚ ।
ବିଦାୟୀ ସିପିଙ୍କ ଯୋଜନା କାର୍ଯ୍ୟକାରୀ ହେବ କି ନାହିଁ । ପୂର୍ବରୁ ମୁଖିଆ ବଦଳିଲେ ଯୋଜନା ବଦଳିବା ଯାଉଥିବାର ନଜିର ରହିଛି । ତେଣୁ ଏବେ ନୂଆ ମୁଖିଆ ଆସିବା ପରେ ବିଦାୟୀ ସିପିଙ୍କ ପୁରୁଣା ଯୋଜନା ଚାଲୁ ରହିବ କି ନାହିଁ ତା ଉପରେ ପ୍ରଶ୍ନ ଉଠୁଛି ।
– ୨୦୧୯ ମସିହା ଅଗଷ୍ଟ ୨୦ ତାରିଖରେ ପୋଲିସ କମିଶନର ଭାବରେ କାର୍ଯ୍ୟରେ ଯୋଗ ଦେଇଥିଲେ ଡ. ସୁଧାଂଶୁ ଷଡ଼ଙ୍ଗୀ
– ଠିକ ଦେଢ଼ ବର୍ଷ କାର୍ଯ୍ୟକାଳ ପରେ ତାଙ୍କର ବଦଳି ହୋଇଛି ।
– ଦେଢ଼ ବର୍ଷର କାର୍ଯ୍ୟକାଳ ଭିତରେ ମହାମାରୀ କରୋନା ସାଙ୍ଗକୁ ଦ୍ୱୈତନଗରୀ ଅନେକ ଜଘନ୍ୟ ଅପରାଧର ସାମ୍ନା କରିଛି ।
– ଏସବୁ ଆହ୍ୱାନର ସୁପରିଚାଳନା କରି ନିଜ ଛାପ ଛାଡ଼ିଛନ୍ତି ।
– ‘ଆସ୍କ ମି ଏନିଥିଙ୍ଗ’ ‘ଦାଦା ବଟିକୁ ନା’ ଭଳି ଅପରେସନ ଆରମ୍ଭ କରିଥିଲେ
– ୧୯୯୯ ମସିହା ବାରଙ୍ଗ ଦୁଷ୍କର୍ମ ଘଟଣାରେ ଦୁଷ୍କର୍ମକାରୀକୁ ଧରିବା ପାଇଁ ଅପରେସନ ‘ସାଇଲେଂଟ ଭାଇପର’ କରି ସଫଳତା ପାଇଥିଲେ ।
– କୋଭିଡ଼ ସମୟରେ ‘ଡାଏଲ-୧୦୦’ ଓ ସାଇବର ସେଲ୍ ପ୍ରତିଷ୍ଠା ଭଳି ଅନେକ ଯୋଜନା ଆରମ୍ଭ କରିଥିଲେ ।
– ନୂଆ ସିପି ଏହି ଯୋଜନାକୁ ଚାଲୁ ରଖିବେ ନା ନୂଆ ରଣନୀତିରେ କାମ କରିବେ ତା ଉପରେ ନଜର ।