କରୋନା ବେଳେ ହାତ ବାନ୍ଧି ବସିଥିବା କାରିଗରଙ୍କୁ କାମ ଦେଇଛି ଆରଏମସି । ଚିତ୍ରଶିଳ୍ପୀଙ୍କୁ ରୋଜଗାର ଯୋଗାଇ ଦେଇଛି ରାଉରକେଲା ସହରର କାନ୍ଥବାଡ, ସହରକୁ ସୁନ୍ଦର କରିବା ସହ ସଚେତନ କରୁଛି ଶିଳ୍ପୀଙ୍କ କଳ୍ପନା ।
କନକ ବ୍ୟୁରୋ: କରୋନା କଟକଣା ମଧ୍ୟରେ ପେଷି ହୋଇଯାଇଛି ଅନେକ ଲୋକଙ୍କ ଜୀବନ ଜୀବିକା। ରୋଜଗାର ହରାଇ ଅସହାୟ ଓ ଦୁର୍ବିସହ ଜୀବନ ବିତାଉଥିବା ସେଭଳି ବର୍ଗର ଲୋକଙ୍କ ପାଇଁ ଏବେ ସାହାରା ପାଲଟିଛି ରାଉରକେଲା ମହାନଗର ନିଗମ ପ୍ରଶାସନ।
Kanak News is now on WhatsApp
Join and get latest news updates delivered to you via WhatsApp
ଲକଡାଉନ-ସଟଡାଉନ ଭିତରେ ସଜେଇ ହେଉଛି ଷ୍ଟିଲ ସିଟି । ସ୍ମାର୍ଟସିଟିର ସୌନ୍ଦର୍ଯ୍ୟକରଣ ପାଇଁ ଉଦ୍ୟମ ଆରମ୍ଭ କରିଛି ରାଉରକେଲା ମହାନଗର ନିଗମ । ଆଉ ଏଥିରେ ସହଭାଗୀ ହୋଇଛନ୍ତି କରୋନା କଟକଣା ଭିତରେ ଜୀବିକା ହରାଇଥିବା ଚିତ୍ରଶିଳ୍ପୀ । ସହରର କାନ୍ଥବାଡ ଓ ଅନ୍ୟ ପ୍ରମୁଖ ସ୍ଥାନରେ ହୋଇଥିବା ଚିତ୍ରକଳା ଲୋକଙ୍କ ମନରେ ସଚେତନତା ସୃଷ୍ଟି କରୁଛି । ଆଉ ଏଭଳି ଦୁର୍ଦିନରେ ନିଜ ପେଶାକୁ ଉପଯୋଗ କରି ଟଙ୍କା ରୋଜଗାର କରି ପାରୁଥିବାରୁ ଉଭୟ ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି ଚିତ୍ରଶିଳ୍ପୀ ।
ଜାତୀୟ ସହରାଂଚଳ ଜୀବିକା ମିଶନ ମାଧ୍ୟମରେ କୁଶଳୀ, ଅର୍ଦ୍ଧକୁଶଳୀ ଶ୍ରମିକ, କଳାକାର ଓ ଚିତ୍ରଶିଳ୍ପୀଙ୍କୁ ରୋଜଗାର ଯୋଗାଇ ଦେବା ମୁଖ୍ୟ ଉଦେଶ୍ୟ ବୋଲି ପ୍ରକଳ୍ପ ନୋଡାନ ଅଫିସର କହିଛନ୍ତି । ଏଥିପାଇଁ ରାଉରକେଲା ମହାନଗର ନିଗମକୁ ୫ କୋଟି ଟଙ୍କାର ଅନଦାନ ମିଳିଛି । କରୋନା କଟକଣା ଭିତରେ ଷ୍ଟିଲ ସିଟିକୁ ସୁନ୍ଦର କରିବା ସହ ସହରବାସୀଙ୍କୁ ସଚେତନ କରାଉଛି କାଂଥରେ ହୋଇଥିବ ଏହିସବୁ ଚିତ୍ରକଳା । କରୋନାର ସଟଡାଉନ-ଲକଡାଉନ୍ ଭିତରେ ଜୀବିକା ହରାଇ ଲୋକମାନେ ହନ୍ତସନ୍ତ ହେଉଥିବା ଆରଏମସିର ଏଭଳି ଉଦ୍ୟମ ଜୀବନ ଓ ଜୀବିକା ମଧ୍ୟରେ ସୃଷ୍ଟି ହୋଇଥିବା ଦୂରତା କମାଇବ ବୋଲି ଆଶା କରାଯାଉଛି ।