କନକ ବ୍ୟୁରୋ : ରାଫେଲ ଦୁର୍ନୀତିକୁ ନେଇ ଆଉ ଏକ ନୂଆ ତଥ୍ୟ ଏବେ ସାମ୍ନାକୁ ଆସିଛି । ଫ୍ରାନ୍ସର ଏକ ପୋର୍ଟାଲ ମିଡିଆପାର୍ଟ ରାଫେଲ ଦୁର୍ନୀତିକୁ ନେଇ ବଡ ଖୁଲାସା କରିଛି । ଫ୍ରାନ୍ସର କମ୍ପାନି ଦାସଲ୍ଟ ଆଭିଏସନ ୩୬ଟି ରାଫେଲ ଏୟାରକ୍ରାଫ୍ଟ ଡିଲ୍ ପାଇଁ ୭.୫ ମିଲିୟନ ୟୁରୋ ଅଥାର୍ତ ୬୫ କୋଟି ଟଙ୍କା କମିଶନ ଆକାରରେ ଦେଇଛି । ମିଡିଆପାର୍ଟ ରିପୋର୍ଟ ଅନୁଯାୟୀ, ସମସ୍ତ କାଗଜପତ୍ର ଥିବା ସତ୍ତେ୍ୱ ମଧ୍ୟ ଭାରତରେ ଏହାର କୌଣସି ଯାଞ୍ଚ ହୋଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ମିଡିଆପାର୍ଟ ରାଫେଲକୁ ନେଇ ଯେଉଁ ଖୁଲାସା କରିଛି ସେଥିରେ କୁହାଯାଇଛି ଯେ, ଏଥିପାଇଁ ନକଲି ବିଲ୍ ମଧ୍ୟ ପ୍ରସ୍ତୁତ କରଯାଇଛି । ଅକ୍ଟୋବର ୨୦୧୮ରୁ ସିବିଆଇ ଓ ଇଡିକୁ ଜଣାଥିଲା ଯେ, ସୁରେଶ ଗୁପ୍ତା ନାମକ ଜଣେ ମଧ୍ୟସ୍ଥିଙ୍କୁ ୬୫ କୋଟି ଟଙ୍କାର କମିଶନ ଦିଆଯାଇଥିଲା । ଭାରତ ସହ ୩୬ଟି ଯୁଦ୍ଧ ବିମାନ ରାଫେଲ ଡିଲ ପୂରା କରିବାକୁ କମ୍ପାନିକୁ ଏଭଳି କରିବାକୁ ପଡିଥିଲା ।
ମିଡିଆପାର୍ଟ ଅନୁଯାୟୀ, ସୁରେଶ ଗୁପ୍ତା ଡାସଲ୍ଟ ଆଭିଏସନ କମ୍ପାନି ପାଇଁ ମଧ୍ୟସ୍ଥତା କରୁଥିଲେ । ସୁରେଶ ଗୁପ୍ତାଙ୍କ ମରିସସ ସ୍ଥିତ କମ୍ପାନିକୁ ୨୦୦୭ରୁ ୨୦୧୨ ମଧ୍ୟରେ ୭.୫ ମିଲିୟନ ୟୁରୋ ମିଳିଥିଲା । ଏ ସମ୍ପର୍କିତ ସମସ୍ତ କାଗଜପତ୍ର ୨୦୧୮ରେ ମରିସସ ସରକାର ସିବିଆଇକୁ ପ୍ରଦାନ କରିଥିଲେ । ଆଉ ଏହି କାଗଜପତ୍ର ପରବର୍ତ୍ତୀ ସମୟରେ ଇଡି ହାତକୁ ଆସିଥିଲା । ସବୁ ଜାଣିବା ପରେ ମଧ୍ୟ କୌଣସି ତତ୍ପରତା ଦେଖାଇନଥିଲା ସିବିଆଇ । ୨୦୦୧ରେ ସୁରେଶ ଗୁପ୍ତାଙ୍କୁ ଡାସଲ୍ଟ କମ୍ପାନି ନିଯୁକ୍ତି ଦେଇଥିଲା । ଯେତେବେଳେ ଭାରତ ସରକାର ରାଫେଲ ବିମାନ କିଣିବାକୁ ଘୋଷଣା କରିଥିଲେ । ଏହାବାଦ୍ ଇଡି ପାଖରେ ଥିବା ଦସ୍ତାବିଜରେ ସୁରେଶ ଗୁପ୍ତା କହିଥିଲେ ଯେ, ରାଫେଲ ଡିଲ ପାଇଁ ଅନେକ ଭାରତୀୟ ଅଧିକାରୀଙ୍କୁ କମ୍ପାନି ପକ୍ଷରୁ ଟଙ୍କା ଦିଆଯାଇଥିଲା । ଯେତେବେଳେ ରାଫେଲ ଡିଲ ଶେଷ ପର୍ଯ୍ୟାୟରେ ପହଞ୍ଚିଥିଲା ସେତେବେଳେ ଭାରତୀୟ ପ୍ରତିରକ୍ଷଶ ବିଭାଗରୁ ଅନେକ ଗୁରୁତ୍ୱପୂର୍ଣ୍ଣ ଗୋପନୀୟ ଦସ୍ତାବିଜ ହାସଲ କରିଥିଲେ ସୁରେଶ ।