ସଂକ୍ରମଣରେ ଗଞ୍ଜାମକୁ ଟପିଲା ଖୋର୍ଦ୍ଧା । ସେପ୍ଟେମ୍ବରର ପ୍ରଥମ ୩ ଦିନରେ ରାଜ୍ୟରେ ୩ ହଜାର ଲେଖାଏଁ ଆକ୍ରାନ୍ତ ବଢାଇଲା ଚିନ୍ତା, ବିଶେଷଜ୍ଞ କହିଲେ, ନିୟନ୍ତ୍ରଣକୁ ଆସିବାକୁ ଆହୁରି ଲାଗିବ ଦେଢରୁ ଦୁଇ ମାସ ।
କନକ ବ୍ୟୁରୋ : ରାଜ୍ୟରେ କରୋନା ସଂକ୍ରମଣ ଏବେ ଦ୍ରୁତ ଗତିରେ ବଢିଚାଲିଛି । ଦିନକୁ ନୂଆ ଆକ୍ରାନ୍ତଙ୍କ ସଂଖ୍ୟା ୩ ହଜାର ଉପରେ ରହୁଛି । ଏହାରି ଭିତରେ ଆଜି ସଂକ୍ରମଣରେ ଗଂଜାମକୁ ଟପିଛି ଖୋର୍ଦ୍ଧା ଜିଲ୍ଲା । ଏହାରି ଭିତରେ ସମସ୍ତଙ୍କ ମୁହଁରେ ଗୋଟିଏ ପ୍ରଶ୍ନ, କେବେ କମିବ କରୋନା । ଆହୁରି କେତେଦିନ ମହାମାରୀ ଏମିତି ବ୍ୟାପିଚାଲିବ । ବିଶେଷଜ୍ଞ ଡାକ୍ତର କହିଛନ୍ତି, ରାଜ୍ୟରେ ଦେଢରୁ ଦୁଇ ମାସ ଭିତରେ କରୋନା ନିୟନ୍ତ୍ରଣକୁ ଆସିଯିବ ।
Kanak News is now on WhatsApp
Join and get latest news updates delivered to you via WhatsApp
ସେପ୍ଟେମ୍ବର ୧ରେ ୩୦୨୫
ସେପ୍ଟେମ୍ବର ୨ରେ ୩୨୧୯
ସେପ୍ଟେମ୍ବର ୩ରେ ୩୬୩୧
ରାଜ୍ୟରେ କରୋନା ସଂକ୍ରମଣର ଏହି ଗ୍ରାଫ ଚିନ୍ତା ବଢାଇଦେଇଛି । ସେପ୍ଟେମ୍ବରର ପ୍ରଥମ ତିନି ଦିନରେ ନୂଆ ଆକ୍ରାନ୍ତଙ୍କ ସଂଖ୍ୟା ପ୍ରତିଦିନ ୩ ହଜାର ଉପରେ ରହୁଛି । ଆଉ ବିଶେଷଜ୍ଞଙ୍କ ମତରେ ଏହି ସଂଖ୍ୟା ଆଗକୁ ଆହୁରି ବଢିପାରେ । ସ୍ଥିତି ସୁଧୁରିବାକୁ ଲାଗିପାରେ ଆହୁରି ଦେଢରୁ ଦୁଇ ମାସ ସମୟ ।
ତେବେ ଏସବୁ ଭିତରେ କରୋନାର ହଟସ୍ପଟ୍ ପାଲଟିଥିବା ଗଂଜାମ ଜିଲ୍ଲାକୁ ଟପିଛି ଖୋର୍ଦ୍ଧା । ସଂକ୍ରମଣରେ ରାଜ୍ୟର ଶୀର୍ଷରେ ପହଁଚିଯାଇଛି ଖୋର୍ଦ୍ଧା ଜିଲ୍ଲା । ଖୋର୍ଦ୍ଧାରେ ସେପ୍ଟେମ୍ବର ୧ ତାରିଖରେ ୬୬୬ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଥିଲେ । ସେପ୍ଟେମ୍ବର ୨ରେ ୭୩୧ ଏବଂ ସେପ୍ଟେମ୍ବର ୩ତାରିଖରେ ଚିହ୍ନଟ ହୋଇଥିବା ନୂଆ ଆକ୍ରାନ୍ତଙ୍କ ସଂଖ୍ୟା ହେଉଛି ୭୨୨ । ଏପରିକି ଗଞ୍ଜାମରୁ ୫ ଗୁଣା ସକ୍ରିୟ ରୋଗୀ ଅଛନ୍ତି ଖୋର୍ଦ୍ଧା ଜିଲାରେ । ଗୁରୁତ୍ୱପୂର୍ଣ୍ଣ କଥା ହେଉଛି ଯେ, ରାଜ୍ୟରେ କରୋନା ସୁସ୍ଥ ହାର ଅନ୍ୟ ରାଜ୍ୟ ଅପେକ୍ଷା ଭଲ ରହିଛି ଏବଂ ମୃତ୍ୟୁହାର ମଧ୍ୟ କମ୍ ରହିଛି ।