‘ମଞ୍ଜରୀ’ରେ ଆରମ୍ଭ ହେଉଛି ନୂଆ ଧାରାବାହିକ ‘ବଜରଙ୍ଗୀ କଲୋନୀ’ । ଦର୍ଶକ ଦେଖିବାକୁ ପାଇବେ ପପୁ ପମପମ ଓ ରାନୀ ପଣ୍ଡାଙ୍କ ମଜାଦାର କମେଡି ।
କୁହାଯାଏ, ୧୯୫୭ ମସିହାରେ ଏକ ସ୍ୱାସ୍ଥ୍ୟ ବିପ୍ଲବ ଆରମ୍ଭ କରିଥିଲେ ଶ୍ରୀ ଘନଶ୍ୟାମ ପତି । ୧୯୬୪ ମସିହାରେ ସେ ବାହୁବଳୀ ଉପାଧି ପାଇଥିଲେ ବୋଲି ଶୁଣିବାକୁ ମିଳେ। ହେଲେ ଏବେ କର୍ପୁର ଉଡ଼ିଯାଇଛି ରହିଯାଇଛି କେବଳ କନା । ମାନେ ଏବେ ତାଙ୍କର ନାତି ଜଗତନାରାୟଣ ପତି ଓରଫ ଜଗନ ପତି ତାଙ୍କ ଆଖଡାକୁ ଚଳାଇ ଆସୁଛନ୍ତି । ଭୁବନେଶ୍ୱରରେ ଯେଉଁଠି ଘରଭଡା ଅତିକମରେ ପାଞ୍ଚ ହଜାର, ସେଠି ଜଗନ ପତିଙ୍କର ଆକର୍ଷଣୀୟ ଅଫର ରହିଛି ମାତ୍ର ପନ୍ଦର ଶହ ଟଙ୍କାରେ ରହିବା ଖାଇବା ସବୁ । କିନ୍ତୁ କଲୋନୀରେ ରହିବାକୁ ହେଲେ ମାନିବାକୁ ପଡ଼ିବ ତାଙ୍କର କିଛି ସର୍ତ୍ତାବଳୀ ।
Kanak News is now on WhatsApp
Join and get latest news updates delivered to you via WhatsApp
ଜଗନ ପତିଙ୍କ ଏଇ ସର୍ତ୍ତାବଳୀକୁ ମାଟିରେ ମିଶାଇବା ପାଇଁ କଲୋନୀରେ ଗଢ଼ିଉଠିଛି ‘ମହାରଣୀ ୱାର୍କିଂ ଓମେନ୍ ହଷ୍ଟେଲ୍’। ଆଉ ଏହାର ମାଲିକାଣୀ ହେଉଛନ୍ତି ଝୁଲଣ ମହାନ୍ତି। ପୁରୁଷ ଜାତିକୁ ସେ ଘୃଣା କରନ୍ତି । ତାଙ୍କ ହଷ୍ଟେଲରେ ରହିବାକୁ ହେଲେ ପୁଅଙ୍କ ଠାରୁ କୋଶେ ଦୂରରେ ରହିବାକୁ ପଡିବ । ଯେଉଁଠି ପୁଅ ଝିଅ ସାମ୍ନାସାମ୍ନି ରହୁଛନ୍ତି ସେଠି ଆଜିକାଲିକା ପିଲା କ’ଣ ସେମାନଙ୍କ ସର୍ତ୍ତକୁ ମାନି ଚଳିପାରିବେ? ଜଗନ ପତି ଆଉ ଝୁଲଣ ମହାନ୍ତିଙ୍କ ଭିତରେ ନିତିଦିନ ହେଉଥିବା ମଜାଦାର ଖିଟପିଟକୁ ନେଇ ଏହି ହାସ୍ୟରସାତ୍ମକ ଧାରାବାହିକଟି ଗତିଶୀଳ ।
‘ମଞ୍ଜରୀ’ ପକ୍ଷରୁ ନିର୍ମିତ ଏହି ହାସ୍ୟରସାତ୍ମକ ଧାରାବାହିକରେ ମୁଖ୍ୟ ଭୂମିକାରେ ଦେଖିବାକୁ ମିଳିବେ କମେଡି କିଙ୍ଗ ପପୁ ପମପମ୍ ଆଉ ତାଙ୍କ ବିପକ୍ଷରେ ନଜର ଆସିବେ ଯାତ୍ରା ଦୁନିଆର ଚର୍ଚ୍ଚିତ ଅଭିନେତ୍ରୀ ରାନୀ ପଣ୍ଡା । ଦୁହିଁଙ୍କ ବ୍ୟତୀତ ଅନ୍ୟମାନଙ୍କ ମଧ୍ୟରେ ଅଛନ୍ତି ରାଜୀବ ଲୋଚନ, ଟିକୁନା ଷ୍ଟାଇଲିସ ଆଉ ସୁଦୀପ୍ତ । ଚଳିତ ମାସ ୧୭ରୁ ସୋମବାରରୁ ଗୁରୁବାର ରାତି ୯ଟା ୩୦ରେ ଏହାର ପ୍ରସାରଣ ହେବ ।
‘ମଞ୍ଜରୀ’ରେ ପ୍ରସାରିତ ମେଗା ଧାରାବାହିକ ‘ମୋ ଦେହେ ବୋଳିଦେ ତୋ ଦେହ କଳା’ ଏବଂ ‘ବୋହୂ ଆମର ଏନଆରଆଇ’ ପରି ଏହି ନୂଆ ହାସ୍ୟରସାତ୍ମକ ଧାରାବାହିକ ‘ବଜରଙ୍ଗୀ କଲୋନୀ’କୁ ଦର୍ଶକ ବେଶ୍ ପସନ୍ଦ କରିବେ ବୋଲି ଆଶା କରାଯାଉଛି ।