ନୂଆ ସରକାରଙ୍କ ଆଗରେ ନୂଆ ଚ୍ୟାଲେଞ୍ଜ: ପଟ୍ଟ ପରିବର୍ତ୍ତନ ପରେ ବଢିଛି ଲୋକଙ୍କ ଆଶା
କନକ ବ୍ୟୁରୋ: ରାଜ୍ୟରେ ମୋହନ ସରକାରଙ୍କ ପାଇଁ ଆଗକୁ କଣ ରହିବ ଚ୍ୟାଲେଞ୍ଜ । ଶପଥ ଗ୍ରହଣ ଦିନ ପ୍ରଥମ କ୍ୟାବିନେଟ ବୈଠକରେ ୪ଟି ପ୍ରସ୍ତାବ ପାରିତ କରିବା ପରଠୁ ଲୋକଙ୍କ ଆଶା ବଢି ଯାଇଛି । ନିର୍ବାଚନ ପ୍ରଚାର ବେଳେ ବିଜେପି କ୍ଷମତାକୁ ଆସିଲେ ଚିଟଫଣ୍ଡ ଟଙ୍କା ଫେରସ୍ତ, ଶହେ ଦିନରେ ଆୟୁଷ୍ମାନ ଭାରତ ଯୋଜନା ଲାଗୁ, ଦୁର୍ନୀତିଗ୍ରସ୍ତ, ନେତା ବାବୁଙ୍କ ଜେଲରେ ପୂରାଇବା ଭଳି ପ୍ରତିଶ୍ରୁତି ଦେଇଥିଲା । ଆଉ ଏବେ ସରକାର ଗଠନ ପରେ ଦେଇଥିବା ପ୍ରତିଶ୍ରୁତି ପୂରଣ କରିବା ମୋହନ ସରକାରଙ୍କ ପାଇଁ ବଡ ଚ୍ୟାଲେଞ୍ଜ ।
Kanak News is now on WhatsApp
Join and get latest news updates delivered to you via WhatsApp
ବିଜେପି ସରକାର ଶପଥ ନେବା ପରେ ପ୍ରଥମ କ୍ୟାବିନେଟ ବୈଠକରେ ନିର୍ବାଚନ ବେଳେ ଦେଇଥିବା ୪ଟି ପ୍ରତିଶ୍ରୁତି ପୂରଣ କରିବାକୁ ପ୍ରସ୍ତାବ ପାରିତ କରିଥିଲେ । ଏହାପରେ ରାଜ୍ୟରେ ନୂଆ ସରକାରଙ୍କଠାରୁ ଲୋକଙ୍କ ଆଶା ବଢି ଯାଇଛି । ତେଣୁ ଲୋକଙ୍କ ଆଶା, ଆକାଂକ୍ଷାକୁ ପୂରଣ କରିବା ନୂଆ ସରକାରଙ୍କ ପାଇଁ ସବୁଠୁ ବଡ ଚ୍ୟାଲେଞ୍ଜ ହୋଇଛି ।
ଚ୍ୟାଲେଞ୍ଜ- ୧
ପ୍ରଥମ ପଦକ୍ଷେପ ଭାବେ ଶ୍ରୀମନ୍ଦିରର ୪ ଦ୍ୱାର ଖୋଲଛନ୍ତି ନୂଆ ସରକାର । ତେଣୁ ଲୋକେ ଆଶା କରୁଛନ୍ତି ଶ୍ରୀମନ୍ଦିର ରତ୍ନଭଣ୍ଡାରକୁ ନେଇ ବିଜେପି ଦେଇଥିବା ତାର ପ୍ରତିଶ୍ରୁତି ପୂରଣ କରିବ । ଆଉ ଲୋକଙ୍କ ବିଶ୍ୱାସଭାଜନ ହେବା ପାଇଁ ଖୁବଶୀଘ୍ର ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ମୋହନ ସରକାରଙ୍କ ପାଇଁ ପ୍ରଥମ ଚ୍ୟାଲେଞ୍ଜ ହେବ ବୋଲି କୁହାଯାଉଛି । ସେହିପରି ରତ୍ନଭଣ୍ଡାର ଚାବି ଖୋଜି ଆଣିବା ଓ ଡୁପ୍ଲିକେଟ୍ ଚାବି ସଂପର୍କିତ ତଦନ୍ତ ରିପୋର୍ଟକୁ ସାର୍ବଜନୀନ କରିବାର ବଡ ଆହ୍ୱାନ ମଧ୍ୟ ରହିଛି ।
ଚ୍ୟାଲେଞ୍ଜ- ୨
ଦ୍ୱିତୀୟ ପ୍ରତିଶ୍ରୁତି ଭାବେ ଚାଷୀଙ୍କୁ ଧାନର ଏମଏସପି ୩୧୦୦ ଟଙ୍କା ଦେବାକୁ ପ୍ରଥମ କ୍ୟାବିନେଟ ବୈଠକରେ ନିଷ୍ପତି ହୋଇଛି । ୧୦୦ ଦିନ ମଧ୍ୟରେ ଏହାକୁ କାର୍ଯ୍ୟକାରୀ କରିବା ସହ ଏଥିପାଇଁ ଆବଶ୍ୟକ ଅର୍ଥ ବରାଦ କରିବାର ଚ୍ୟାଲେଞ୍ଜ ମଧ୍ୟ ନୂଆ ସରକାରଙ୍କ ଆଗରେ ରହିଛି । କାରଣ ଅତିରିକ୍ତି ଟଙ୍କାର ବୋଝ ରାଜ୍ୟ ରାଜକୋଷ ଉପରେ ପଡିବ ।
ଚ୍ୟାଲେଞ୍ଜ- ୩
ସରକାରକୁ ଆସିବାର ୧୮ ମାସ ମଧ୍ୟରେ ଚିଟଫଣ୍ଡ ଟାଙ୍କ ଫେରସ୍ତ ନେଇ ପ୍ରତିଶ୍ରୁତି ଦେଇଥିଲା ବିଜେପି । ନିର୍ବାଚନ ସମୟରେ ଦେଇଥିବା ଏହି ପ୍ରତିଶ୍ରୁତିକୁ ପୂରଣ କରିବା ସହ ଚିଟଫଣ୍ଡ କ୍ଷତିଗ୍ରସ୍ତ ଜମାକାରୀଙ୍କୁ ନ୍ୟାୟ ପ୍ରଦାନ କରିବା ସବୁୁଠୁ ବଡ ଚ୍ୟାଲେଞ୍ଜ ହୋଇପାରେ । ୨୦୧୨ ମସିହାରୁ ଟଙ୍କା ଫେରି ପାଇବାକୁ ଅନାଇ ବସିଥିବା କ୍ଷତିଗ୍ରସ୍ତଙ୍କ ବିଶ୍ୱାସ ଜିତିବାକୁ ନୂଆ ସରକାର କଣ କରୁଛନ୍ତି, ତା ଉପରେ ନଜର ରହିଛି ।
ଚ୍ୟାଲେଞ୍ଜ- ୪
ସରକାର ଶପଥ ନେବାର ୧୦୦ ଦିନ ମଧ୍ୟରେ ରାଜ୍ୟରେ ଆୟୁଷ୍ମାନ ଯୋଜନା ଲାଗୁ କରିବାକୁ ବିଜେପି ତାର ସଂକଳ୍ପ ପତ୍ରରେ ପ୍ରତିଶ୍ରୁତି ଦେଇଥିଲା । ତେଣୁ ପ୍ରାଥମିକତା ଭିତିରେ ଏହାକୁ ଲାଗୁ କରିବା ନୂଆ ସରକାରଙ୍କ ପାଇଁ ଯେତିକି ବଡ ଆହ୍ୱାନ, ପୁରୁଣା ସରକାରଙ୍କ ଅତି ଲୋକପ୍ରିୟ ବିଏସକେୱାଇ ଯୋଜନାର ଭବିଷ୍ୟତ ନେଇ ନିଷ୍ପତି ସେତିକି ଗୁରୁତ୍ୱ ରଖୁଛି ।
ଚ୍ୟାଲେଞ୍ଜ- ୫
ନିର୍ବାଚନ ପ୍ରଚାରବେଳେ ଘନଘନ ଗସ୍ତ କରି ପୂର୍ବ ସରକାର ଉପରେ ଜୋରଦାର ବର୍ଷିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଓଡିଶାରେ କ୍ଷମତାକୁ ଆସିଲେ ଦୁର୍ନୀତିଗ୍ରସ୍ତଙ୍କ ଅଂଟା ଭାଙ୍ଗିଦେବାକୁ ଚେତାବନୀ ଦେଇଥିଲେ । ବାବୁରାଜକୁ ପ୍ରସଙ୍ଗ କରି ବିଜେପି କ୍ଷମତାକୁ ଆସିଥିବାରୁ ଦୁର୍ନୀତିରେ ଲିପ୍ତ ନେତା ଓ ଅଫିସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ସହ ଜେଲ ପଠାଇବା ଏବେ ନୂଆ ସରକାରଙ୍କ ଆଗରେ ଆଉଏକ ଆହ୍ୱାନ ବୋଲି ବିଚାର କରାଯାଉଛି ।