ରୁଷ-ୟୁକ୍ରେନ ଯୁଦ୍ଧରେ ଏତେ ସଂଖ୍ୟକ ନେପାଳୀ କିପରି ମଲେ ? ନେପାଳ ସରକାର ବର୍ତ୍ତମାନ କଣ ଚାହୁଁଛନ୍ତି ?
ରୁଷର ସେନାରେ କାର୍ଯ୍ୟ କରୁଥିବା ଛ’ ଜଣ ନେପାଳୀ ନାଗରିକ ୟୁକ୍ରେନ ସହିତ ଯୁଦ୍ଧରେ ନିହତ ହୋଇଛନ୍ତି । ନେପାଳ ସରକାର ଏହି ସୂଚନା ଦେଇଛନ୍ତି । ଏହା ସହିତ ନେପାଳର ନାଗରିକଙ୍କୁ ନିଜ ସେନାରେ ନିଯୁକ୍ତି ନକରିବାକୁ ସରକାର ରୁଷକୁ ଅନୁରୋଧ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରୁଷ-ୟୁକ୍ରେନ ଯୁଦ୍ଧରେ ଅନେକ ଲୋକଙ୍କର ମୃତ୍ୟୁ ଖବର ଦିନକୁ ଦିନ ପ୍ରକାଶ ପାଇବାରେ ଲାଗିଛି । କେବଳ ସୈନିକମାନେ ମୃତ୍ଯୁବରଣ କରୁନାହାନ୍ତି । ହଜାର ହଜାର ନିରୀହ ସାଧାରଣ ଲୋକ ମଧ୍ୟ ଏହି ଯୁଦ୍ଧରେ ମୃତ୍ଯୁମୁଖରେ ପଡ଼ୁଛନ୍ତି । ଏହି ସମୟରେ ରୁଷ ସେନାରେ କାର୍ଯ୍ୟ କରୁଥିବା ଛ’ ଜଣ ନେପାଳୀ ନାଗରିକ ୟୁକ୍ରେନ ସହିତ ଯୁଦ୍ଧରେ ପ୍ରାଣ ହରାଇଛନ୍ତି । ନେପାଳ ସରକାର ସୋମବାର ଏହି ସୂଚନା ଦେଇଛନ୍ତି । ଏହା ସହିତ ନେପାଳର ନାଗରିକଙ୍କୁ ନିଜ ସେନାରେ ନିଯୁକ୍ତି ନକରିବାକୁ ସରକାର ରୁଷକୁ ଅନୁରୋଧ କରିଛନ୍ତି ।
କଣ କହିଲେ ନେପାଳ ସରକାର ?
ନେପାଳର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ରୁଷର ସେନାରେ କାର୍ଯ୍ୟ କରୁଥିବା ଛ’ ଜଣ ନେପାଳୀ ନାଗରିକ ୟୁକ୍ରେନ ସହ ଯୁଦ୍ଧରେ ନିହତ ହୋଇଛନ୍ତି । ମୃତକମାନେ ସିଆଙ୍ଗଜାର ପ୍ରୀତମ କାର୍କି, ଇଲାମର ଗଙ୍ଗା ରାଜ ମୋକତାନ, ଡୋଲାଖାର ରାଜ କୁମାର କରକି, କପିଲଭାଷ୍ଟୁର ରୂପକ କାର୍କି, କାସ୍କିର ଦିୱାନ ରାୟ ଏବଂ ଗୋରଖର ସନ୍ଦୀପ ଥାପାଲିଆ ବୋଲି ଜଣାପଡିଛି । ଏହି ବିବୃତ୍ତିରେ ଆହୁରି ମଧ୍ୟ କୁହାଯାଇଛି ଯେ ଯୁଦ୍ଧରେ ନିହତ ହୋଇଥିବା ନେପାଳ ନାଗରିକମାନଙ୍କର ଶବକୁ ଫେରାଇ ଆଣିବା ଏବଂ ପୀଡିତଙ୍କ ପରିବାରକୁ କ୍ଷତିପୂରଣ ଦେବା ପାଇଁ ମନ୍ତ୍ରଣାଳୟ ରୁଷ ସରକାରକୁ ଅନୁରୋଧ କରିଛି । ନେପାଳ ରୁଷକୁ ମଧ୍ୟ ନିଜ ନାଗରିକମାନଙ୍କୁ ସେନାରେ ନିଯୁକ୍ତ ନକରିବାକୁ ଅନୁରୋଧ କରିଛି ଏବଂ ଯଦି କୌଣସି ନେପାଳୀ ନାଗରିକଙ୍କୁ ନିଯୁକ୍ତି ଦିଆଯାଇଛି, ତେବେ ତୁରନ୍ତ ସେମାନଙ୍କୁ ଘରକୁ ପଠାଇବାର ବ୍ୟବସ୍ଥା କରିବାକୁ ଅନୁରୋଧ କରିଛନ୍ତି ।
ନେପାଳୀ ବନ୍ଧକକୁ ମୁକ୍ତ କରିବାକୁ ଉଦ୍ୟମ ନେପାଳ ବୈଦେଶିକ ମନ୍ତ୍ରଣାଳୟ କହିଛି ଯେ ରୁଷ ସେନା ପାଇଁ ଲଢୁଥିବା ବେଳେ ୟୁକ୍ରେନ ଦ୍ୱାରା ବନ୍ଧକ ହୋଇଥିବା ଜଣେ ନେପାଳୀ ସୈନିକଙ୍କୁ ମୁକ୍ତ କରିବା ପାଇଁ କୂଟନୈତିକ ପ୍ରୟାସ ଚାଲିଛି । ସରକାରଙ୍କ ନିର୍ଦ୍ଦେଶକୁ ଅଣଦେଖା କରି ପ୍ରାୟ ୨୦୦ ନେପାଳୀ ବର୍ତ୍ତମାନ ରୁଷ ସେନାରେ ସୈନିକ ଭାବେ କାର୍ଯ୍ୟ କରୁଛନ୍ତି ବୋଲି ବିଶ୍ୱାସ କରାଯାଏ ।
ନେପାଳୀ ଯୁବକମାନେ କେମିତି ରୁଷରେ ପହଁଚିଲେ ?
କାଠମାଣ୍ଡୁ ପୋଷ୍ଟ ଅନୁଯାୟୀ ସୋସିଆଲ ମିଡିଆରେ ଅନେକ ଭିଡିଓ ସାମ୍ନାକୁ ଆସିଥିଲା ଯେଉଁଥିରେ ନେପାଳର ଯୁବକମାନେ ରୁଷ ଏବଂ ୟୁକ୍ରେନର ସୈନ୍ୟବାହିନୀରେ ସେବା କରୁଥିବା ଦେଖାଯାଇଥିଲା । ଭିଡିଓରେ ଦାବି କରାଯାଇଥିଲା ଯେ ନେପାଳୀ ଯୁବକମାନେ ପ୍ରତି ମାସରେ ୪,୦୦,୦୦୦ ଟଙ୍କା ରୋଜଗାର କରିପାରିବେ। ପ୍ରକୃତରେ, ନେପାଳୀ ସେନା କେବଳ ଦ୍ୱିପାକ୍ଷିକ ଚୁକ୍ତି ହେତୁ ଭାରତୀୟ ଏବଂ ବ୍ରିଟିଶ ସେନାରେ ନେପାଳୀ ନାଗରିକ ନିଯୁକ୍ତିକୁ ଅନୁମୋଦନ କରିଛି ।