ଆଜି ରଣବୀର କପୁର ଓ ଆଲିଆ ଭଟ୍ଟଙ୍କ ବିବାହ : ଯୋଗଦେବେ ଦୁଇ ପରିବାରର ଘନିଷ୍ଠ ବନ୍ଧୁ

କନକ ବ୍ୟୁରୋ : ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି ବଲିଉଡ୍ର ଆଉ ଏକ ଚର୍ଚ୍ଚିତ ଯୋଡ଼ି । ଆଜି ରଣବୀର କପୁର ଓ ଆଲିଆ ଭଟ୍ଟଙ୍କ ବିବାହ । ଗତକାଲିଠାରୁ ବିବାହ ପର୍ବ ଆରମ୍ଭ ହୋଇଯାଇଛି । ଚେମ୍ବୁରର ଆର କେ ହାଉସରେ ବିବାହ ପର୍ବ ଆରମ୍ଭ ହୋଇଛି । ପ୍ରଥମେ ଗଣେଶ ପୂଜା ଓ ପରେ ମେହେନ୍ଦି ଏବଂ ସଂଗୀତ ହୋଇଥିଲା ।

ନୀତୁ କପୁର, କରୀନା କପୁର, କରିସ୍ମା କପୁର, କରଣ ଜୋହର ପ୍ରମୁଖ ମେହେନ୍ଦି ସେରିମୋନିରେ ଭାଗ ନେଇଥିଲେ । ଆଜି ପ୍ରଥମେ ପିତୃପୂଜା କରାଯିବ । ରଣବୀର ତାଙ୍କ ପିତା ଦିବଂଗତ ଅଭିନେତା ଋଷି କପୁରଙ୍କ ପାଇଁ ଏକ ବିଶେଷ ପୂଜା କରିବେ ଏବଂ ତା’ପରେ ସେମାନଙ୍କ ବିବାହ ଉତ୍ସବ ଅନୁଷ୍ଠିତ ହେବ । ନୀତୁ କପୁର, କରୀନା କପୁର, କରିସ୍ମା କପୁର, କରଣ ଜୋହର, ଆୟାନ ମୁଖାର୍ଜୀ, ମହେଶ ଭଟ୍ଟ, ପୂଜା ଭଟ୍ଟଙ୍କ ସମେତ ଉଭୟ ପରିବାରର ଅତିଥିମାନେ ବାସ୍ତୁରେ ପହଞ୍ଚି ସ‌ାରିଛନ୍ତି ।

ପ୍ରଖ୍ୟାତ ଗାୟକ ପ୍ରତୀକ ଖୁଦା ମେହେନ୍ଦି ସମାରୋହରେ ସଙ୍ଗୀତ ପରିବେଷଣ କରିଛନ୍ତି। ଆଜିର ଉତ୍ସବରେ ଶୁଦ୍ଧ ଶାକାହାରୀ ଖାଦ୍ୟ ସହିତ ଇଡଲି, ଦୋସା, ମେଦୁବରା, ଚାଟ-ପାପ୍ରି ଏବଂ ଭାଲେ ଭଳି ଦକ୍ଷିଣ ଭାରତୀୟ ସୁସ୍ବାଦୁ ଖାଦ୍ୟ ସହ ମିଠା ଓ ଲସି ପରସା ଯାଇଛି ।  ଅପରାହ୍ନ ୩ଟାରେ ବାସ୍ତୁ ବିଲ୍ଡିଂରେ ଥିବା ସେମାନଙ୍କ ଫ୍ଲାଟରେ ବିବାହ ଉତ୍ସବ ଅନୁଷ୍ଠିତ ହେବ। ଏଥିରେ କେବଳ ଉଭୟ ପରିବାରର ଘନିଷ୍ଠ ବନ୍ଧୁମାନେ ଯୋଗଦେବେ।