ଚମକାଇଦେଲା ନିର୍ବାଚନ ଫଳାଫଳ । ଏନଡିଏକୁ ମିଳିଲା ବହୁମତ, ବଡ ଦଳ ଭାବେ ଉଭା ହେଲା ବିଜେପି । ଚନ୍ଦ୍ରବାବୁ ନାଇଡୁ ଓ ନୀତିଶ କୁମାରଙ୍କ ଉପରେ ନଜର ।
କନକ ବ୍ୟୁରୋ : ଗୋଟିଏ ପଟେ ଓଡ଼ିଶାରେ ବିଜେପି ସରକାର ଗଢିଥିବା ବେଳେ ଅନ୍ୟପଟେ କେନ୍ଦ୍ରରେ ଏନଡିଏ ଓ ଇଣ୍ଡିଆ ମେଣ୍ଟ ମଧ୍ୟରେ କଡା ଟକ୍କର ଦେଖିବାକୁ ମିଳିଛି । ଏନଡିଏକୁ ବହୁମତ ମିଳିଥିଲେ ବି ବିଜେପିକୁ ଝଟକା ଲାଗିଛି । ବିଜେପି ସବୁଠାରୁ ବଡ ଦଳ ଭାବେ ଉଭା ହୋଇଛି । କିନ୍ତୁ ୨୫୦ ଆସନ ବି ଛୁଇଁପାରିନାହିଁ । ମ୍ୟାଜିକ ନମ୍ବର ୨୭୨ ଥିବା ବେଳେ ବିଜେପି ଏହାଠାରୁ ଦୂରରେ ରହିଛି । କିନ୍ତୁ ଏନଡିଏ ମେଣ୍ଟ ମ୍ୟାଜିକ ନମ୍ବର ପାର କରିଛି । ମହାରାଷ୍ଟ୍ର, ଉତରପ୍ରଦେଶ, ରାଜସ୍ଥାନ ଓ ପଶ୍ଚିମବଙ୍ଗରେ ବିଜେପିକୁ ଆଶାନୁରୂପକ ସଫଳତା ମିଳିନାହିଁ । ୟୁପି ଓ ମହାରାଷ୍ଟ୍ରରେ ବିଜେପିକୁ କମ ଆସନ ମିଳିଛି । ପଶ୍ଚିମବଙ୍ଗରେ ବି ୨୦୧୯ ଅପେକ୍ଷା ୨୦୨୪ରେ କମ ଆସନ ମିଳିଛି । ରାଜସ୍ଥାନରେ ୨୦୧୯ ମସିହାରେ କଂଗ୍ରେସ ଖାତା ଖୋଲିପାରିନଥିଲା । ଏଥର ଇଣ୍ଡିଆ ମେଂଟ ରାଜ୍ୟରେ ଭଲ ପ୍ରଦର୍ଶନ କରିଛି । ହରିୟାଣାରେ ବି ବିଜେପି ଭଲ କରିନାହିଁ । ଦକ୍ଷିଣରେ ବିଜେପିକୁ ଭଲ ସଫଳତା ମିଳିନଥିବାବେଳେ ହିନ୍ଦୀ ହାର୍ଟଲ୍ୟାଣ୍ଡରେ କଂଗ୍ରେସକୁ ଭଲ ସଫଳତା ମିଳିନାହିଁ । ଏଭଳି ସ୍ଥିତିରେ ଟିଡିପି ଓ ଜେଡିୟୁ ଉପରେ ସମସ୍ତଙ୍କର ନଜର ଅଟକିଛି । ଚନ୍ଦ୍ରବାବୁ ନାଇଡୁ ଓ ନୀତିଶ କୁମାରଙ୍କ ନିଷ୍ପତ୍ତି ଉପରେ କେନ୍ଦ୍ର ସରକାରଙ୍କ ଭାଗ୍ୟ ଅଟକି ରହିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଫଳାଫଳ ଆସିବା ପରେ ମୋଦି କହିଛନ୍ତି, ଦେଶର ତୃତୀୟ ଥର ଲାଗି ଏନଡିଏ ସରକାର ହେବା ନିଶ୍ଚିତ । ଏନଡିଏର ବିଜୟ ପାଇଁ ଦେଶବାସୀଙ୍କୁ କୃତଜ୍ଞତା ଜଣାଇଛନ୍ତି ମୋଦି ।
ଫଳାଫଳ ନେଇ ରାହୁଲ ଗାନ୍ଧି କହିଛନ୍ତି, ଏହି ଲଢେଇ ସମ୍ବିଧାନ ବଞ୍ଚେଇବା ପାଇଁ ଥିଲା । ଗଣତନ୍ତ୍ର ବଂଚାଇବା ପାଇଁ ଲଢେଇ ଜାରି ରହିବ । ଦେଶବାସୀ ମୋଦିଙ୍କୁ ପ୍ରତ୍ୟାଖ୍ୟାନ କରିଛନ୍ତି ବୋଲି କହିଛନ୍ତି ରାହୁଲ ଗାନ୍ଧି । ନିର୍ବାଚନ ପରିଣାମ ମୋଦିଙ୍କ ନୈତିକ ପରାଜୟ ବୋଲି ସେ କହିଛନ୍ତି ।