ଅଜିତ ପାୱାରଙ୍କ ଉପରେ କାର୍ଯ୍ୟାନୁଷ୍ଠାନ ନେଲା ଏନସିପି : ବିଧାୟକ ଦଳ ନେତା ହେଲେ ଜୟନ୍ତ ପାଟିଲ । ଆଜି ପୁଣି ବସିବ ବିଧାୟକ ଦଳ ବୈଠକ , ୩ ବିଧାୟକଙ୍କ ମିଳୁନି ପତା
ବିଜେପି ମହାରାଷ୍ଟ୍ରରେ ଅଜିତ୍ ପାୱାରଙ୍କୁ ନେଇ ସରକାର ଗଠନ କରିଛି । ସେପଟେ ଏନସିପିକୁ ଘାରିଲାଣି ବିଧାୟକଙ୍କ ଦଳବଦଳ ଭୟ । ସୂଚନା ଅନୁସାରେ ଏନସିପିର ୩ ଜଣ ବିଧାୟକ ଏବେ ନିଖୋଜ ଅଛନ୍ତି । ଦଳ ଦାବି କରୁଛି ତାଙ୍କ ନିକଟରେ ୪୯ ଜଣ ବିଧାୟକଙ୍କ ସମର୍ଥନ ରହିଛି । ତେବେ ସବୁଠାରୁ ଚର୍ଚ୍ଚାର ବିଷୟ ହେଉଛି ଦଳର ୩ ଜଣ ବିଧାୟକ ଏବେ ନିଖୋଜ ଅଛନ୍ତି । ସେମାନଙ୍କ ସହିତ ସଂପର୍କ ହୋଇପାରୁନାହିଁ । ସେମାନଙ୍କ ଫୋନ୍ ଏବେ ବି ଅପହଁଚ ଦୂରତାରେ ରହିଛି । ନିଖୋଜ ଥିବା ୩ ବିଧାୟକଙ୍କ ମଧ୍ୟରେ ଅଛନ୍ତି କଲବଣ ବିଧାନସଭା କ୍ଷେତ୍ରର ବିଧାୟକ ନୀତିନ୍ ପାୱାରଙ୍କ ସହିତ ଅନ୍ୟ ୨ ବିଧାୟକ । ଏନସିପି ବୈଠକରେ ସୂଚନା ଅନୁସାରେ ୪୯ ରୁ ୪୨ ଜଣ ବିଧାୟକ ଉପସ୍ଥିତ ଥିଲେ । ତେଣୁ ବାକି ୭ ବିଧାୟକଙ୍କ ଉପରେ ରହିଛି ଦଳର ଫୋକସ୍ । ଅନ୍ୟପଟେ ଗଣମାଧ୍ୟମରେ ଚର୍ଚ୍ଚା ହେଉଛି ଏନସିପିର ବିଦ୍ରୋହୀ ବିଧାୟକଙ୍କୁ ଏକ ଚାର୍ଟର ପ୍ଲେନ ଯୋଗେ ଦିଲ୍ଲୀ ନିଆଯାଇଛି । ସେମାନେ ହେଲେ ଦୌଲତ ଦାରୋଦା, ନରହରି ଜିରୱାର, ସୁନୀଲ ଭୁଷରା, ଦିଲ୍ଲୀପ ବଙ୍କର, ଅନୀଲ ପାଟିଲ, ନୀତିନ ପାୱାର, ସୁନୀଲ ସେଲକେ, ବାବାସାହେବ ପାଟିଲ ଓ ସଂଜୟ ବନସନ । ତେବେ ଏନସିପିର ବିଦ୍ରୋହୀ ବିଧାୟକଙ୍କୁ ଦିଲ୍ଲୀର କେଉଁସ୍ଥାନରେ ରଖାଯାଇଛି ତାହା ଜଣାପଡିନାହିଁ । ବାକି ୪୨ ବିଧାୟକ ଏବେ ମୁମ୍ୱାଇର ରେନେସା ହୋଟେଲରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ମହରାଷ୍ଟ୍ରରେ ବିଜେପି ସହ ମେଂଟ କରି ଅଜିତ ପାୱାର ଉପମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ରୋଚକ ହେଉଛି ରାଜନୈତିକ ଦୃଶ୍ୟପଟ୍ଟ । ଅଜିତ ପାୱାରଙ୍କ ବିଦ୍ରୋହ ପରେ ଏନସିପି ବିଧାୟକଙ୍କୁ ଏକଜୁଟ ରଖିବା ଶରଦ ପାୱାରଙ୍କ ପାଇଁ ପ୍ରାଥମିକତା ହୋଇପଡିଛି । ସେଥିପାଇଁ ଗତକାଲି ଏନସିପିର ବିଧାୟକ ଦଳ ବୈଠକ ହୋଇଥିଲା । ଆଜି ଦିନ ୨ ଟାରେ ମଧ୍ୟ ଆଉଥରେ ବସିବ ଏନସିପି ବିଧାୟକଙ୍କ ବୈଠକ । ଶନିବାର ବିଧାୟକ ଦଳ ବୈଠକରେ ଅଜିତ ପାୱାରଙ୍କୁ ଦଳରୁ ନିଲମ୍ୱିତ କରି ତାଙ୍କ ସ୍ଥାନରେ ଜୟନ୍ତ ରାଜାରାମ ପାଟିଲଙ୍କୁ ବିଧାୟକ ଦଳ ନେତା ମନୋନୀତ କରାଯାଇଛି । ସେପଟେ ଅଜିତ ପାୱାରଙ୍କ ସମେତ ୫ ବିଧାୟକଙ୍କ ପାଇଁ ଏନସିପିର ଦ୍ୱାର ଖୋଲା ରହିଛି ବୋଲି ଇସାରା କରିଛନ୍ତି ଏନସିପି ନେତା ।