ସରିନି ‘ମହା’ନାଟକ! ମହାରାଷ୍ଟ୍ରର ମଙ୍ଗ ଧରିବାକୁ ଶରଦଙ୍କ ଦମ୍ଭୋକ୍ତି । କହିଲେ, ବିଜେପି ଭଳି ଷଡ଼ଯନ୍ତ୍ର ନୁହେଁ ଗଢ଼ିବୁ ସ୍ଥିର ସରକାର ।
କନକ ବ୍ୟୁରୋ: ମହାମୋଡ଼ ନେଉଛି ମହାରାଷ୍ଟ୍ର ନାଟକ । ସକାଳୁ ସକାଳୁ ମହାରାଷ୍ଟ୍ରର ମଙ୍ଗ ବିଜେପି-ଏନସିପି ଧରିବା ପରେ ଚାଲିଛି ଛକାପଞ୍ଝା । ଏନସିପି ବିଧାୟକଦଳ ନେତା ଅଜିତ୍ ପାୱାର ବିଜେପିରେ ମିଶିବା ପରେ ଜାତୀୟ ରାଜନୀତିରେ ହଲଚଲ ସୃଷ୍ଟି ହୋଇଛି । ରାତାରାତି ‘ମହା’ଅଙ୍କ ବଦଳିଯିବା ନେଇ ଏନସିପି ମୁଖ୍ୟ ଶରଦ ପାୱାର କହିଛନ୍ତି, ବିଜେପି ଷଡ଼ଯନ୍ତ୍ର କରି ସରକାର ଗଢ଼ିଛି । ଆଉ ଦଳ ଓ ପରିବାରକୁ ଭାଙ୍ଗିବାକୁ ଚେଷ୍ଟା କରିଛନ୍ତି ଅଜିତ୍ ପାୱାର । ତେଣୁ ତାଙ୍କୁ ଏନସିପି ବିଧାୟକ ଦଳ ନେତା ପଦବୀରୁ ବିଦା କରିବା ସହ ଦଳରୁ ବହିଷ୍କୃତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଅଜିତ୍ ପାୱାରଙ୍କ ନିଷ୍ପତି ବ୍ୟକ୍ତିଗତ ଏହା ଏନସିପିର ନୁହେଁ କହି, ମହାରାଷ୍ଟ୍ରରେ ଆମେ ସରକାର ଗଢ଼ିବୁ ବୋଲି ଦୃଢ଼ୋକ୍ତି ବାଢ଼ିଛନ୍ତି ଶରଦ । ଗତ କିଛି ଦିନ ମହାରାଷ୍ଟ୍ରରେ ଏକ ସ୍ଥିର ସରକାର ଗଢ଼ିବାକୁ ଏନସିପି କଂଗ୍ରେସ ଓ ଶିବସେନା ତିନି ଦଳ ମିଳିତ ନିଷ୍ପତି ନେଇଥିଲେ । କିନ୍ତୁ ନିଜ ଫାଇଦା ପାଇଁ ଅଜିତ୍ ଏନସିପିକୁ ଧୋକା ଦେଇ ବିଜେପିରେ ମିଶିଗଲେ । ହେଲେ ଆମ ପାଖରେ ୧୭୦ ସଂଖ୍ୟା ରହିଛି ତେଣୁ ଆମେ ହିଁ ମହାରାଷ୍ଟ୍ରରେ ସରକାର ଗଢ଼ିବୁ । ଷଡ଼ଯନ୍ତ୍ର କରି ସରକାର ଗଢ଼ିଥିବା ବିଜେପି ସଂଖ୍ୟା ଗରିଷ୍ଠତା ପ୍ରମାଣ କରିବାରେ ଫେଲ୍ ମାରିବ ବୋଲି କଡ଼ା ସମାଲୋଚନା କରିଛନ୍ତି ଶରଦ ।
ଅନ୍ୟପଟେ ଶିବସେନା ମୁଖ୍ୟ ଉଦ୍ଧବ ଠାକରେ ମଧ୍ୟ ମହାରାଷ୍ଟ୍ର ଗୋଳିଆ ରାଜନୀତିକୁ ନେଇ ବଡ଼ ବୟାନ ଦେଇଛନ୍ତି । ଆଉ ଏନସିପି ସହ ସ୍ୱର ମିଳାଇ ବିଜେପିକୁ କଟୁ ସମାଲୋଚନା କରିଛନ୍ତି ଉଦ୍ଧବ । କହିଛନ୍ତି କି, ଏନସିପି କି ଶିବସେନାର ଏଭଳି ବିଚାରଧାରା ନୁହେଁ । ସାରାଦେଶରେ ଗଣତନ୍ତ୍ରକୁ ନେଇ ଏକ ଖେଳ ଚାଲିଛି । ଯାହା ଦେଶବାସୀଙ୍କୁ ବେଶ୍ ଭଲଭାବେ ଜଣାପଡ଼ିଗଲାଣି । ବିଜେପିର ଏଭଳି ଷଡ଼ଯନ୍ତ୍ର ସରକାର କେବେ ସଫଳ ହେବ ନାହିଁ ବୋଲି କହିଛନ୍ତି ଉଦ୍ଧବ ।