ଦିଲ୍ଲୀ ସ୍ଥିତ ଏସସି-ଏସଟି ଆୟୋଗରେ ପହଞ୍ଚିଲେ ଏନସିବି ଅଫିସର ସମୀର ୱାଙ୍ଖଡେ । ଜାତି ପ୍ରମାଣ ପାଇଁ ଦାଖଲ କଲେ ଗୁରୁତ୍ୱପୂର୍ଣ୍ଣ କାଗଜପତ୍ର ।
କନକ ବ୍ୟୁରୋ: ମୁମ୍ବାଇ ଏନସିବିର ଜୋନାଲ ନିର୍ଦ୍ଦେଶକ ସମୀର ୱାଙ୍ଖଡେ ସୋମବାର ଦିଲ୍ଲୀସ୍ଥିତ ଅନୁସୂଚିତ ଜାତି-ଜନଜାତି ଅଫିସରେ ପହଞ୍ଚିଥିଲେ । ଏଠାରେ ପହଞ୍ଚିବା ପରେ ସେ ତାଙ୍କର ଗୁରୁତ୍ୱପୂର୍ଣ୍ଣ ଦସ୍ତାବିଜକୁ ଆୟୋଗଙ୍କ ପାଖରେ ଦାଖଲ କରିଥିବାବେଳେ, ଏହାର ଯାଞ୍ଚ ପରେ ଅସଲ କଥା ସାମ୍ନାକୁ ଆସିବ ବୋଲି କୁହାଯାଉଛି । ଅନ୍ୟପଟେ ଆୟୋଗର ଅଧ୍ୟକ୍ଷ ବିଜୟ ସାମ୍ପଲାଙ୍କ କହିବା କଥା, ସମୀର ୱାଙ୍ଖଡେଙ୍କ ଦସ୍ତାବିଜକୁ ଏବେ ଯାଞ୍ଚ କରାଯାଉଛି , ଖୁବଶୀଘ୍ର ଏହାର ରିପୋର୍ଟ ପ୍ରକାଶ ପାଇବ ।
Kanak News is now on WhatsApp
Join and get latest news updates delivered to you via WhatsApp
ଅସଲ କଥା ହେଉଛି, ମହାରାଷ୍ଟ୍ରର ମନ୍ତ୍ରୀ ତଥା ଏନସିବି ନେତା ନବାବ ମଲ୍ଲିକ ସମୀର ୱାଙ୍ଖଡେଙ୍କ ବିରୋଧରେ ଲଗାତାର ବିଭିନ୍ନ ଆରୋପ ଲଗାଇବାରେ ଲାଗିଛନ୍ତି । ତାଙ୍କ ଅଭିଯୋଗ ଅନୁସାରେ, ସମୀରଙ୍କ ଅସଲ ଜାତି ହେଉଛି ମୁସଲିମ୍ । ହେଲେ ସେ ମିଛ ଜାତିଗତ ପ୍ରମାଣପତ୍ର ଦେଇ ଚାକିରି କରିଛନ୍ତି । ତେବେ ଏହି ଅଭିଯୋଗକୁ ସମୀର ଖାରଜ କରିବା ସହିତ ଏହାର ପ୍ରମାଣ ଦେବାକୁ ଯାଇ ତାଙ୍କର ବିଭିନ୍ନ ପ୍ରମାଣପତ୍ରକୁ ଆଜି ଅନୁସୂଚିତ ଆୟୋଗଙ୍କ ପାଖରେ ଦାଖଲ କରିଛନ୍ତି ।
ତେବେ ଏହି ପ୍ରମାଣପତ୍ର ଭିତରେ ସମୀର ନିଜର ଜାତି ପ୍ରମାଣ ପତ୍ର, ପ୍ରଥମ ପତ୍ନୀଙ୍କ ପାଖରୁ ଜନ୍ମ ହୋଇଥିବା ପିଲାର ଜନ୍ମ ସାର୍ଟିଫିକେଟ୍ ଏବଂ ଛାଡପତ୍ର ପ୍ରମାଣପତ୍ର ରହିଛି । କମିଶନ ଏହି ସବୁ ପ୍ରମାଣପତ୍ରକୁ ଯାଞ୍ଚ କରିବା ପରେ ନିଜର ରିପୋର୍ଟ ଦେବେ । ରାଷ୍ଟ୍ରୀୟ ଅନୁସୂଚିତ ଜାତି ଆୟୋଗର ଅଧ୍ୟକ୍ଷ ବିଜୟ ସାମ୍ପଲାଙ୍କ କହିବା କଥା, ସମୀର ପୂର୍ବରୁ ମଧ୍ୟ ଏକ ଆବେଦନ କରିଥିଲେ, ଯେଉଁଥିରେ ତାଙ୍କ ବିରୋଧରେ ଷଡଯନ୍ତ୍ର କରାଯାଉଥିବା ସେ ଅଭିଯୋଗ କରିଥିଲେ । ଏଥିସହ ଅକ୍ଟୋବର ୨୯ ତାରିଖରେ ମହାରାଷ୍ଟ୍ର ସରକାର ଏକ ନୋଟିସ୍ ଜାରି କରିଥିଲେ । ହେଲେ ଏପର୍ଯ୍ୟନ୍ତ କୌଣସି ଜବାବ୍ ମିଳିନାହିଁ । ତେବେ ଏହି ପ୍ରମାଣପତ୍ରକୁ ଯାଞ୍ଚ କରିବା ପରେ ଅସଲ କଥା ସାମ୍ନାକୁ ଆସିବ ବୋଲି ସେ କହିଛନ୍ତିି ।