କନକ ବ୍ୟୁରୋ : ମାଛ ଧରା ଜାଲରେ ପଡ଼ିଲା ଭୋଟର ବାଲାଟ ବକ୍ସ । ମାଛ ଧରିବା ବେଳେ ପୋଖରୀରୁ ମିଳିଛି ଦୁଇଟି ବାଲାଟ ବକ୍ସ । ନୟାଗଡ଼ ଜିଲ୍ଲା ଗୋତିସାହି ପଂଚାୟତରେ ପୋଖରୀ ଭିତରୁ ବାଲାଟ ବକ୍ସ ମିଳିବା ଏବେ ସମଗ୍ର ଅଂଚଳରେ ଚର୍ଚ୍ଚାର ବିଷୟ ପାଲଟିଛି । ଝୋଟ ଅଖାରେ ବାକ୍ସ ଦୁଇଟି ବନ୍ଧା ଯାଇଥିବା ବେଳେ ଏଥିରେ ଓଏସଇସି ଲେଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଇଲେକ୍ସନ୍ କମିଶନଙ୍କ ଏହି ଦୁଇଟି ବାକ୍ସ ଏଠାକୁ କେମିତି ଆସିଲା, କେବେଠାରୁ ଏଠାରେ ପଡ଼ି ରହିଛି, କିଏ ପକାଇଛି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଶରଣକୂଳ ପୋଲିସ ଘଟଣା ସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ଗତ ୨୦୧୨ ପଂଚାୟତ ନିର୍ବାଚନରେ ନିକଟସ୍ଥ ଆଙ୍ଗିସିଙ୍ଗି ବୁଥରୁ କିଛି ଦୁର୍ବୃତ ବାଲାଟ ବକ୍ସ ଲୁଟି ନେଇ ନିକଟସ୍ଥ ପୋଖରୀରେ ଫିଙ୍ଗି ଦେଇଥିଲେ । ପରେ ସେଗୁଡ଼ିକୁ ଉଦ୍ଧାର କରାଯାଇଥିଲା ।
ସେହିଭଳି ୨୦୧୨ରେ ଗୋତିସାହି ପଂଚାୟତର ଭୋଟ ଗଣତି ବେଳେ ବ୍ୟାପକ ଅନିୟମିତତାର ଅଭିଯୋଗ ଆସିଥିଲା । ତେବେ ମିଳିଥିବା ବକ୍ସ ଦୁଇଟି ସମ୍ପର୍କରେ ଅଧିକ ଅନୁସନ୍ଧାନର ଆବଶ୍ୟକତା ଥିବା ସ୍ଥାନୀୟ ଅଧିବାସୀ କହିଛନ୍ତି ।