କନକ ବ୍ୟୁରୋ: ମୁମ୍ବାଇ ଡ୍ରଗ୍ସ ମାମଲାରେ ଶାହାରୁଖ ଖାନଙ୍କ ପୁଅ ଆରୟନ ଖାନଙ୍କୁ ଜାମିନ୍ ମିଳିସାରିଛି । ହେଲେ ମହାରାଷ୍ଟ୍ର ସରକାରରେ ମନ୍ତ୍ରୀ ଥିବା ନବାବ ମଲ୍ଲିକଙ୍କ ଏହାକୁ ନେଇ ଲଗାତାର ବୟାନ ଏହି କେସକୁ ଏବେ ବି ଚର୍ଚ୍ଚାରେ ରଖିଛି । ହେଲେ ଗୁରୁତ୍ୱପୂର୍ଣ୍ଣ କଥା ହେଉଛି ଏହାରି ଭିତରେ ଭାରତୀୟ ଜନତା ଯୁବ ମୋର୍ଚ୍ଚାର ପୂର୍ବ ଅଧ୍ୟକ୍ଷ ମୋହିତ କମ୍ବୋଜ, ନବାବ ମଲ୍ଲିକଙ୍କ ଉପରେ ୧୦୦ କୋଟି ଟଙ୍କାର ଏକ ମାନହାନି ମକଦ୍ଦମା ରୁଜୁ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ହେଲା ନବାବ ମଲ୍ଲିକ ଏହି ଘଟଣାରେ ବିଜେପି ନେତା ମୋହିତ କମ୍ବୋଜଙ୍କୁ ଟାର୍ଗେଟ କରି ଆସୁଛନ୍ତି । ଖାଲି ସେତିକି ନୁହେଁ ସେ ତାଙ୍କ ଉପରେ ଗୋଟିଏ ପରେ ଗୋଟିଏ ଗମ୍ଭୀର ଆରୋପ ମଧ୍ୟ ଲଗାଇବାରେ ଲାଗିଛନ୍ତି । ମୁମ୍ବାଇ ଡ୍ରଗ୍ସ କେସରେ ମୋହିତ ଓ ତାଙ୍କ ପରିବାରର କନେକ୍ସନ ଥିବା ନବାବ ମଲ୍ଲିକ ଅନେକ ଥର ଅଭିଯୋଗ କରିସାରିଲେଣି । ଯାହା ପରେ ଗତ ଅକ୍ଟୋବର ୯ ତାରିଖରେ ମୋହିତ କମ୍ବୋଜ ଏନେଇ ନବାବ ମଲ୍ଲିକଙ୍କୁ ଏକ ନୋଟିସ୍ ଜାରି କରିବା ସହିତ ବିନା କୌଣସି ପ୍ରମାଣରେ ତାଙ୍କ ବିରୋଧରେ ଏପରି ଅଭିଯୋଗ ନ ଆଣିବାକୁ କହିଥିଲେ ।
ଏହାସତ୍ତ୍ୱେ ଅକ୍ଟୋବର ୧୧ ତାରିଖରେ ପୁଣି ନବାବ ମଲ୍ଲିକ, ମୋହିତ କମ୍ବୋଜଙ୍କ ଉପରେ ନିଜର ହଲ୍ଲାବୋଲ ଜାରି ରଖିଥିଲେ । ଯେଉଁଥିପାଇଁ ଏବେ ମୋହିତ କମ୍ବୋଜ, ନବାବ ମଲ୍ଲିକଙ୍କ ଉପରେ ୧୦୦ କୋଟି ଟଙ୍କାର ମାନହାନି ମକଦ୍ଦମା ରୁଜୁ କରିବା ସହିତ ତାଙ୍କ ବିରୋଧରେ କେସ ରୁଜୁ କରିଛନ୍ତି । ମୋହିତଙ୍କ କହିବା କଥା, ସେ ବିଜେପିର ସଦସ୍ୟ ଅଟନ୍ତି, ତା ସହିତ ତାଙ୍କର ବ୍ୟବସାୟ ମଧ୍ୟ ରହିଛି । ନବାବ ମଲ୍ଲିକଙ୍କର ଏପରି ଦାୟିତ୍ୱହୀନ ମନ୍ତବ୍ୟ ତାଙ୍କ ସମ୍ମାନକୁ କ୍ଷତି ପହଞ୍ଚାଉଛି ।
ସୂଚନାଯୋଗ୍ୟ ଯେ, ଏନସିବି କ୍ରୁଜ ଉପରେ ଚଢାଉ କରି ଆଠ ଜଣକୁ ନିଜ ହେପାଜତକୁ ନେଇଥିଲା । ହେଲେ ନବାବ ମଲ୍ଲିକ ଅଭିଯୋଗ କରୁଛନ୍ତି ଯେ, ଏନସିବି ପ୍ରଥମେ ୧୧ ଜଣଙ୍କୁ ଏହି ମାମଲାରେ ହେପାଜତକୁ ନେଇଥିଲା । ହେଲେ ଜଣେ ବିଜେପି ନେତାଙ୍କ କଲ୍ ପାଇବା ପରେ ସେ ୩ ଜଣଙ୍କୁ ଛାଡି ଦେଇଥିଲା । ତେବେ ଏହି ୩ ଜଣଙ୍କ ଭିତରେ ମୋହିତ କମ୍ବୋଜଙ୍କ ଶଳା ମଧ୍ୟ ସାମିଲ ଥିଲେ ।