ସ୍ୱାଧୀନ ସାଂସଦ ନବନୀତ ରାଣାଙ୍କ ପାଇଁ ବଢିଲା ଅଡୁଆ, ଏହି ମାମଲାରେ କୋର୍ଟ ପଠାଇଲା ଜାମିନ ବିହୀନ ଗିରଫ ପରୱାନା

କନକ ବ୍ୟୁରୋ : ମହାରାଷ୍ଟ୍ର ଅମରାବତୀର ସ୍ୱାଧୀନ ସାଂସଦ ନବନୀତ ରଣାଙ୍କ ପାଇଁ ଅଡୁଆ ମେଣ୍ଟିବାର ନାଁ ନେଉନି । ହନୁମାନ ଚାଳିଶା ପରେ ପୁଣି ଏକ ମାମଲାରେ ମୁମ୍ବାଇର ସେୱରୀ କୋର୍ଟ ଏବେ ନବନୀତ ରାଣାଙ୍କ ନାମରେ ଜାମିନ ବିହୀନ ଗିରଫ ପରୱାନା ଜାରି କରିଛନ୍ତି । କୋର୍ଟ ତରଫରୁ ମୁଲୁଣ୍ଡ ପୋଲିସକୁ ଆଦେଶ ଦିଆଯାଇଛି କି, ଏହି ୱାରେଣ୍ଟ ମୁତାବକ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ଏହି କାରଣରୁ ଦୀପାବଳିରେ ନବନୀତ ରାଣା ପୁଣି ଗିରଫ ହୋଇପାରନ୍ତି ବୋଲି ଆଶଂକା କରାଯାଉଛି । ସେପଟେ କୋର୍ଟ ତରଫରୁ ଏଭଳି ୱାରେଣ୍ଟ ଜାରିକରାଯିବା ପରେ ନବନୀତ କୌଣସି ପ୍ରତିକ୍ରିୟା ଦେଇ ନାହାଁନ୍ତି ।

ସାଂସଦ ନବନୀତ ରାଣାଙ୍କ ଉପରେ ଅଭିଯୋଗ ରହିଛି କି, ସେ ନିର୍ବାଚନ ବେଳେ ନିଜ ଜାତି ପ୍ରମାଣ ପତ୍ର ନେଇ ଯେଉଁ ତଥ୍ୟ ଦେଇଥିଲେ ତାହା ମିଥ୍ୟା । ଏହି ମାମଲାରେ ଶିବସେନାର ପୂର୍ବ ସାଂସଦ ଆନନ୍ଦରାଓ ଅଡସୁଲ ଓ ସୁନିଲ ଭାଲେରାଓ କୋର୍ଟରେ ଅଭିଯୋଗ କରିଥିଲେ । ଏହି ମାମଲାର ଶୁଣାଣି କ୍ରମରେ ୨୦୨୧ ରେ ମୁମ୍ବାଇ ହାଇକୋର୍ଟ ନବନୀତଙ୍କ ଜାତି ପ୍ରମାଣପତ୍ରକୁ ଖାରଜ କରିଦେଇଥିଲେ । ଏହାପରେ ତାଙ୍କ ସାଂସଦ ପଦ ବିପଦରେ ପଡିଥିଲା । ହେଲେ ମୁମ୍ବାଇ ହାଇକୋର୍ଟଙ୍କ ନିଷ୍ପତ୍ତିକୁ ନବନୀତ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ । ଏବେ ଏହି ମାମଲାରେ ହାଇକୋର୍ଟଙ୍କ ନିଷ୍ପତ୍ତିକୁ ସୁପ୍ରିମକୋର୍ଟ ସ୍ଥଗିତ ରଖିଛନ୍ତି ।

କେବଳ ନବନୀତ ରାଣା ନୁହଁନ୍ତି ଏହି ଜାତି ପ୍ରମାଣପତ୍ରକୁ ନେଇ ତାଙ୍କ ପରିବାର ଉପରେ ବି ଗୁରୁତର ଅଭିଯୋଗ ରହିଛି । ନବନୀତଙ୍କ ବାପା ନକଲି ଜାତି ପ୍ରମାଣପତ୍ର ହାସଲ କରିବାକୁ ସ୍କୁଲ ଆଡମିଶନ ବେଳେ ମିଥ୍ୟା ଡକ୍ୟୁମେଣ୍ଟ ଡିପୋଜିଟ୍ କରିଥିଲେ ।