କନକ ବ୍ୟୁରୋ : ନବୀନ ସରକାରଙ୍କୁ ଅନୁକରଣ କଲେ ମୋଦି ସରକାର । କେନ୍ଦ୍ର ବଜେଟରେ ଦେଖିବାକୁ ମିଳିଲା ରାଜ୍ୟ ସରକାରଙ୍କ ଯୋଜନାର ଝଲକ । ୨୦୧୯-୨୦ ଆର୍ଥିକ ବର୍ଷ ପାଇଁ ସଂସଦରେ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିଛନ୍ତି ଅର୍ଥ ମନ୍ତ୍ରୀ ନିର୍ମଳା ସୀତାରମଣ । ଚଳିତ ବଜେଟରେ ମହିଳା ସଶକ୍ତିକରଣକୁ ଗୁରୁତ୍ୱ ଦେଇଛନ୍ତି ମୋଦି ସରକାର । ଖାସକରି ଏସଏଚଜି ମହିଳା ଅର୍ଥାତ ସ୍ୱୟଂ ସହାୟକ ଗୋଷ୍ଠୀ ପାଇଁ ବଜେଟରେ ବଡ ଘୋଷଣା କରିଛନ୍ତି ନିର୍ମଳା । ଏସଏଚଜି ମହିଳାଙ୍କୁ ବିନା ସୁଧରେ ଏକ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦେବାକୁ ଘୋଷଣା କରି ବଡ ଭେଟି ଦେଇଛନ୍ତି ମୋଦି ସରକାର ।
Kanak News is now on WhatsApp
Join and get latest news updates delivered to you via WhatsApp
ତେବେ କେନ୍ଦ୍ର ସରକାର ଏସଏଚଜି ମହିଳାଙ୍କୁ ବିନା ସୁଧରେ ଋଣ ଦେବା ଫର୍ମୁଲାକୁ ପୂର୍ବରୁ ଆପଣାଇ ସାରିଛନ୍ତି ନବୀନ ସରକାର । ଚଳିତ ସାଧାରଣ ନିର୍ବାଚନ ପୂର୍ବରୁ ହିଁ ବିନା ସୁଧରେ ଏସଏଚଜି ମହିଳାଙ୍କୁ ଋଣ ଦେବାକୁ ଘୋଷଣା କରି ମନ ଜିଣି ନେଇଥିଲେ ନବୀନ । ଏକ ଲକ୍ଷ ନୁହେଁ ବରଂ ଏସଏଚଜି ଗ୍ରୁପକୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ବିନା ସୁଧରେ ଋଣ ଦେବାକୁ ଘୋଷଣା କରିଥିଲେ ରାଜ୍ୟ ସରକାର । ଆଉ ଏସଏଚଜି ମହିଳାଙ୍କ ପାଇଁ ନବୀନଙ୍କ ଏହି ଘୋଷଣାର ୬ ମାସ ପରେ କେନ୍ଦ୍ର ବଜେଟରେ ମଧ୍ୟ ଏହା ପ୍ରତିଫଳିତ ହୋଇଛି । ନବୀନଙ୍କୁ ଫର୍ମୁଲାକୁ ପୁଣିଥରେ ଆପଣାଇଛନ୍ତି କେନ୍ଦ୍ର ସରକାର । ତେବେ ଏସଏଚଜି ମହିଳାଙ୍କୁ ବିନା ସୁଧରେ ଋଣ ଦେବା ରେସରେ ମୋଦି ସରକାରଙ୍କ ଠାରୁ ଦୁଇ ପାଦ ଆଗରେ ରହିଛନ୍ତି ନବୀନ ସରକାର । ଯେତେବେଳେ କେନ୍ଦ୍ର ସରକାର ବିନା ସୁଧରେ ଏସଏଚଜି ମହିଳାଙ୍କୁ ଏକ ଲକ୍ଷ ଟଙ୍କା ଦେବାକୁ ଘୋଷଣା କରିଛନ୍ତି ସେଭଳି ସ୍ଥଳେ ଏସଏଚଜି ଗ୍ରୁପକୁ ବିନା ସୁଧରେ ୩ ଲକ୍ଷ ଟଙ୍କା ଋଣ ଦେବେ ନବୀନ ସରକାର ।
ପୂର୍ବରୁ ମଧ୍ୟ ନବୀନଙ୍କ କାଳିଆ ଯୋଜନା ପୂରା ଦେଶକୁ ବାଟ ଦେଖାଇଥିବା ବେଳେ ଏହାକୁ ମଧ୍ୟ ଅନୁକରଣ କରିଥିଲେ ମୋଦି ସରକାର । ଯେତେବେଳେ ପୂରା ଦେଶରେ ଚାଷୀଙ୍କ ପାଇଁ କୃଷି ଋଣ ଛାଡ କରିବାକୁ ରାଜନୈତିକ ଦଳ ମଧ୍ୟରେ ରେସ ଆରମ୍ଭ ହୋଇଥିଲା ସେତେବେଳେ ଏହି ରେସରୁ ଦୂରରେ ରହି ଚାଷୀଙ୍କ ପାଇଁ କାଳିଆ ଯୋଜନା ଭଳି ଐତିହାସିକ ଯୋଜନାର ଘୋଷଣା କରିଥିଲେ ନବୀନ । ଏହି ଯୋଜନା ମାଧ୍ୟମରେ ଚାଷୀଙ୍କୁ ଋଣ ଛାଡ ନୁହେଁ ଆର୍ଥିକ ରୂପେ ସୁଦୃଢ କରିବା ନବୀନ ସରକାରର ଲକ୍ଷ୍ୟ ଥିଲା । ପୂରା ଦେଶରେ ନବୀନଙ୍କ ଏହି ଯୋଜନାକୁ ବେଶ ପ୍ରଂଶସା କରାଯାଇଥିଲା ।ପୂରା ଦେଶକୁ ବାଟ ଦେଖାଇଥିଲା ନବୀନଙ୍କ ଏହି ଯୋଜନା । ଆଉ ନବୀନଙ୍କ କାଳିଆ ଯୋଜନା ଘୋଷଣାର କିଛି ଦିନ ପରେ ଚାଷୀଙ୍କୁ ଖୁସି କରିବାକୁ ଏହି ଫର୍ମୁଲାକୁ ଆପଣାଇ ନେଇଥିଲେ କେନ୍ଦ୍ର ସରକାର । ପିଏମ କିଷାନ ଯୋଜନାର ଆରମ୍ଭ କରି ଚାଷୀଙ୍କୁ ଆର୍ଥିକ ସହାୟତା ଦେବାକୁ ଘୋଷଣା କରିଥିଲେ ମୋଦି ସରକାର ।
ପ୍ରଥମ ପାଳିରେ କାଳିଆ ଯୋଜନା ଓ ଦ୍ୱିତୀୟ ପାଳିରେ ଏସଏଚଜି ମହିଳାଙ୍କୁ ବିନା ସୁଧରେ ଋଣ । ନବୀନଙ୍କ ଯୋଜନାକୁ ଏକାଧିକ ବାର ଅନୁକରଣ କରି ଆସିଛନ୍ତି ମୋଦି ସରକାର । ଯାହା ଦର୍ଶାଉଛି ଚାଷୀ ଓ ମହିଳାଙ୍କ ପାଇଁ ନବୀନ ଘୋଷଣା କରୁଥିବା ଯୋଜନା ପୂରା ଦେଶକୁ ବାଟ ଦେଖାଇଛି ।