ବଜେଟକୁ ନେଇ ମୁଖ୍ୟମନ୍ତ୍ରୀଙ୍କ ବଡ ବୟାନ । ୬ଟି ପ୍ରସଙ୍ଗରେ ଖୁସି ହେଲେ, ୬ଟି ପ୍ରସଙ୍ଗରେ ଚିନ୍ତା ପ୍ରକଟ କଲେ ।
କନକ ବ୍ୟୁରୋ : ବଜେଟ ଘୋଷଣା ପରେ ବିଭିନ୍ନ ଦଳ ପକ୍ଷରୁ ଆରମ୍ଭ ହୋଇଛି ବୟାନବାଜି । ଆଉ ଏସବୁ ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଜେଟକୁ ନେଇ ବଡ ବୟାନ ଦେଇଛନ୍ତି । ବଜେଟକୁ ନେଇ ନବୀନ ଟିକିଏ ଖୁସି ପ୍ରକଟ କରିଥିବା ବେଳେ ଚିନ୍ତାବ୍ୟକ୍ତ ମଧ୍ୟ କରିଛନ୍ତି । ୬ଟି ପ୍ରସଙ୍ଗକୁ ନବୀନ ସ୍ୱାଗତ କରିବା ସହ ୬ଟି ପ୍ରସଙ୍ଗକୁ ନେଇ ପ୍ରଶ୍ନ ମଧ୍ୟ ଉଠାଇଛନ୍ତି । ଏପରିକି ବଜେଟର ରୂପରେଖ କିଭଳି ହୋଇଥାନ୍ତା ତାହା ମଧ୍ୟ ଦର୍ଶାଇଛନ୍ତି ନବୀନ ।
Kanak News is now on WhatsApp
Join and get latest news updates delivered to you via WhatsApp
କୃଷି ରେଳ, କୃଷି ଉଡାଣ, ୨୦ ଲକ୍ଷ ଚାଷୀଙ୍କୁ ସୋଲାର ପମ୍ପ, ବ୍ୟାଙ୍କ ଜମା ଗ୍ୟାରେଣ୍ଟି, ଶିକ୍ଷାରେ ଏଫଡିଆଇ ଓ ନୂଆ ଶିକ୍ଷାନୀତିକୁ ପ୍ରଂଶସା କରିଛନ୍ତି ନବୀନ । ଏହାବାଦ୍ ୬ଟି ପ୍ରସଙ୍ଗକୁ ନେଇ ପ୍ରଶ୍ନ ଉଠାଇଛନ୍ତି ମୁଖ୍ୟମନ୍ତ୍ରୀ । କେନ୍ଦ୍ର ପ୍ରବର୍ତ୍ତିତ ଯୋଜନାରେ ଅନୁଦାନ ବଢିନାହିଁ ବୋଲି କହିଛନ୍ତି ନବୀନ । ଏହାବାଦ ନୂଆ ବଜେଟରେ କେନ୍ଦ୍ରୀୟ ଟିକସରେ ୩ ହଜାର କୋଟି ଟଙ୍କା କ୍ଷତି ସହିବ ଓଡ଼ିଶା । ଚଳିତ ବଜେଟରେ ଓଡ଼ିଶାର ଐତିହ୍ୟସ୍ଥଳୀର ଉନ୍ନତି ପାଇଁ ପ୍ରସ୍ତାବ ନାହିଁ, ଜାତୀୟ ଆଦିବାସୀ ମ୍ୟୁଜିୟମର ହକଦାର ଓଡ଼ିଶା ଥିବା ବେଳେ ମଧ୍ୟ ଏଥିରୁ ବାଦ୍ ଦିଆଯାଇଛି ।
ସେହିଭଳି ପାନୀୟ ଜଳ ପାଇଁ ଆବଣ୍ଟିତ ଅର୍ଥ ଖୁବ କମ ରହିଛି । ଓଡ଼ିଶାର ବଜେଟ ୩୬୦୦ କୋଟି ଥିବା ବେଳେ କେନ୍ଦ୍ରର ୧୧୫୦୦ କୋଟି ଟଙ୍କା ରହିଛି । ତେଣୁ ଏହା ଉପରେ ଦୃଷ୍ଟି ଦେବାର ଆବଶ୍ୟକତା ରହିଛି । ବଜେଟ ପରେ ସେନସେକ୍ସ ଖସିବା ଚିନ୍ତାଜନକ ବିଷୟ । ବଜେଟରେ ଆଉ କିଛି ପଦକ୍ଷେପ ନେବାର ସୁଯୋଗ ରହିଥିଲା । ଏବେ ନିବେଶକଙ୍କ ବିଶ୍ୱାସ ଜିତିବା ସବୁଠାରୁ ବଡ ଚ୍ୟାଲେଞ୍ଜ, କାରଣ ନୂଆ ନିବେଶ ଆସିଲେ ହିଁ ଚାକିରି ସୃ୍ଷ୍ଟି ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଆଉ ଏସବୁ ଭିତରେ ରାଜ୍ୟ ବଜେଟରେ ସାଧାରଣ ଲୋକଙ୍କ ପାଇଁ ନବୀନ ସରକାର କଣ ଘୋଷଣା କରୁଛନ୍ତି ତାହା ଉପରେ ସମସ୍ତଙ୍କର ନଜର ରହିଛି ।