ପ୍ରତିଷ୍ଠା ଦିବସରେ ଟାର୍ଗେଟ୍ ସ୍ଥିର କଲେ ବିଜେଡି ସୁପ୍ରିମୋ । କହିଲେ ୫ବର୍ଷରେ ୧୦ ପ୍ରତିଶତ ଗରିବୀ ହ୍ରାସ ରହିବ ଲକ୍ଷ୍ୟ ।
କନକ ବ୍ୟୁରୋ : ଆଜି ବିଜେଡି ପାଳନ କରିଛି ୨୫ ତମ ପ୍ରତିଷ୍ଠା ଦିବସ । ଭୁବନେଶ୍ୱର ସ୍ଥିତ ବିଜେଡି ମୁଖ୍ୟ କାର୍ଯ୍ୟାଳୟ ସମେତ ଜିଲ୍ଲା ଓ ବ୍ଲକ ସ୍ତରରେ ପାଳନ ହୋଇଛି ପ୍ରତିଷ୍ଠା ଦିବସ । ଏହି ଅବସରରେ ରାଜ୍ୟରୁ କିଭଳି ଗରିବି ହଟିବ ସେହି ଲକ୍ଷ୍ୟରେ କାମ କରିବାକୁ ଦଳୀୟ କର୍ମୀଙ୍କୁ ପରାମର୍ଶ ଦେଇଛନ୍ତିି ନବୀନ ।
Kanak News is now on WhatsApp
Join and get latest news updates delivered to you via WhatsApp
ବିଜୁ ଜନତା ଦଳର ୨୫ତମ ପ୍ରତିଷ୍ଠା ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗରିବୀ ହ୍ରାସ ଉପରେ ଗୁରତ୍ୱ ଦେଇ କହିଛନ୍ତି, ଆସନ୍ତା ୫ବର୍ଷରେ ୧୦ ପ୍ରତିଶତ ଗରିବୀ କମ୍ କରିବେ । ଭର୍ଚୁଆଲ ମୋଡରେ ଦଳୀୟ ସମାବେଶକୁ ଉଦବୋଧନ ଦେଇ ବିରୋଧୀଙ୍କୁ ଇସାରା କରି କହିଥିଲେ, ବିଜେଡିର କେହି ବସ୍ ଅର୍ଥାତ୍ ମାଲିକ ନାହାନ୍ତି, ବରଂ ଓଡ଼ିଶାବାସୀ ହିଁ ତାଙ୍କର ବସ୍ ।
ବିଜେଡିର ଏହି ପ୍ରତିଷ୍ଠା ଦିବସରେ ଦଳୀୟ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ ଏକ ପାଦ ଆଗକୁ ଯାଇ କହିଥିଲେ ଯେ, ଧରାପୃଷ୍ଠରେ ଥିବା ପର୍ଯ୍ୟନ୍ତ ନବୀନଙ୍କୁ କ୍ଷମତାଚ୍ୟୁତ କରିବେ ନାହିଁ ଓଡ଼ିଶାବାସୀ । ୨୫ ବର୍ଷ ତଳର କଥା । ବିଜୁ ବାବୁଙ୍କ ପରଲୋକ ପରେ ନୂଆ କରି ଓଡ଼ିଶା ଆସିଥିବା ନବୀନ ସେତେବେଳେ ଯେଉଁ ସ୍ୱପ୍ନ ରଖିଥିଲେ, ସେ ସମ୍ପର୍କରେ ଗଣମାଧ୍ୟମ ଆଗରେ ବୟାନ କରିଥିଲେ । ଇତି ମଧ୍ୟରେ ନବୀନଙ୍କ ବିଜୁ ଜନତା ଦଳ ଶାସନ କ୍ଷମତାରେ ୨୦ ବର୍ଷ ଅତିକ୍ରମ କରିସାରିଲାଣି, ଏବଂ ଏବେ ବି ରାଜ୍ୟବାସୀଙ୍କ ଭରସାର ପାତ୍ର ହୋଇ ରହିଛି ।