ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀଙ୍କ ଭିଡିଓ ବାର୍ତ୍ତା । କହିଲେ, କୋଭିଡ୍ ନିୟନ୍ତ୍ରଣ କ୍ଷେତ୍ରରେ ଭଲ ସ୍ଥିତିରେ ଅଛି ଓଡିଶା । ହେଲେ ଏବେ ବି ଟଳିନି ବିପଦ…

106

କନକ ବ୍ୟୁରୋ: କୋଭିଡ୍ ନିୟନ୍ତ୍ରଣ କ୍ଷେତ୍ରରେ ଓଡିଶା ଏବେ ଭଲ ସ୍ଥିତିରେ ଅଛି । ବିଶ୍ୱ ସ୍ଥାସ୍ଥ୍ୟ ସଂଗଠନ ମଧ୍ୟ ଓଡିଶାର ପ୍ରଶଂସା କରିଛି । ହେଲେ ବିପଦ ଏବେ ବି ଟଳିନି । ମହାରାଷ୍ଟ୍ରର କିଛି ଅଚଂଳରେ ଏବେ ଲକଡାଉନ୍ ପୁଣି ଫେରିଛି । ତେଣୁ ଆମକୁ ଏବେ ଆହୁରି ସତର୍କ ରହିବା ସହିତ କୋଭିଡ୍ ନିୟମର ଅନୁପାଳନ କରିବାକୁ ହେବ । ମାସ୍କକୁ ସଠିକ୍ ଭାବେ ପିନ୍ଧିବା ସହିତ ନିୟମିତ ବ୍ୟବଧାନରେ ହାତକୁ ସାବୁନରେ ସଫା କରିବାକୁ ହେବ । ଆଜି ରାଜ୍ୟବାସୀଙ୍କୁ ବାର୍ତ୍ତା ଦେଇ ଏପରି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।

ଏଥିସହ ଜିରୋ ଇନଫେକ୍ସନ ଆମର ଲକ୍ଷ୍ୟ ବୋଲି ନବୀନ ଆଜି ଭିଡିଓ ବାର୍ତ୍ତାରେ ରାଜ୍ୟବାସୀଙ୍କୁ କହିଛନ୍ତି । ସେ କହିଛନ୍ତି ଯେ, ମହାରାଷ୍ଟ୍ର, ପଞ୍ଜାବ, ଛତିଶଗଡ ଓ ମଧ୍ୟପ୍ରଦେଶରେ ଏବେ ସ୍ଥିତି ବିଗିଡିଛି । ଏପରିକି ମହାରାଷ୍ଟ୍ରର କିଛି ଅଂଚଳରେ ଲକଡାଉନ୍ ଜାରି ହୋଇଛି । ହେଲେ ଆମେ କେହି ବି ଏବେ ଲକଡାଉନକୁ ଫେରିବାକୁ ଚାହୁଁନୁ । ଲକଡାଉନ୍ ସମୟର କଷ୍ଟ ଏବେ ବି ଆମର ସ୍ମୃତି ହୋଇ ରହିଛି । ତେଣୁ ସମସ୍ତେ କୋଭିଡ୍ ନିୟମର ଅନୁପାଳନ କରିବାକୁ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ପରାମର୍ଶ ଦେଇଛନ୍ତି ।

ଅନ୍ୟପଟେ କୋଭିଡକୁ ନିୟନ୍ତ୍ରଣ କରିବାକୁ ଆମ ରାଜ୍ୟରେ ଏବେ ଟିକାକରଣ ଜାରି ରହିଛି । ସମସ୍ତେ ଏହି ଟିକାକରଣ ପ୍ରକ୍ରିୟାକୁ ଆଗେଇ ନେବାକୁ ମୁଖ୍ୟମନ୍ତ୍ରୀ ଆହ୍ୱାନ କରିଛନ୍ତି । ବିଗତ ଦିନମାନଙ୍କରେ କୋଭିଡ ଯୁଦ୍ଧରେ ଅନେକ ଯୋଦ୍ଧା ନିଜର ଜୀବନ ହରାଇଛନ୍ତି । ତେଣୁ ଏବେ ସବୁ ଲୋକ କୋଭିଡ୍ ନିୟମ ପାଳନ କରିବା ହିଁ ସେହି କୋଭିଡ୍ ଯୋଦ୍ଧାଙ୍କ ପାଇଁ ଶ୍ରେଷ୍ଠ ଶ୍ରଦ୍ଧାଞ୍ଜଳି ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏଥିସହ ପୋଲିସ ଏବଂ ପ୍ରଶାସନକୁ ମଧ୍ୟ ମୁଖ୍ୟମନ୍ତ୍ରୀ କୋଭିଡ୍ ଗାଇଡଲାଇନ୍ ଅନୁପାଳନ ତଦାରଖ କରିବାକୁ ପରାମର୍ଶ ଦେଇଛନ୍ତି । ସବୁପରେ ଲୋକମାନେ ସତର୍କତା ଅବଲମ୍ବନ କରିବା ସହିତ ସୁରକ୍ଷିତ ରହିବାକୁ ମୁଖ୍ୟମନ୍ତ୍ରୀ ନିଜର ଭିଡିଓ ବାର୍ତ୍ତାରେ ଉଲ୍ଲେଖ କରିଛନ୍ତି ।