ସାଧାରଣ ଜୀବନ, ନିରାଡମ୍ବର ଜୀବନଶୈଳୀ । ଦେଶର ରାଜନୀତିରେ ନବୀନ ଏକ ବ୍ରାଣ୍ଡ
ଦୁଇ ଦଶନ୍ଧୀରୁ ଅଧିକ କାଳ କ୍ଷମତାର କେନ୍ଦ୍ରବିନ୍ଦୁରେ ଥିଲେ ବି ନବୀନଙ୍କ ଜୀବନଶୈଳୀ ଅତି ସାଧାରଣ
କନକ ବ୍ୟୁରୋ: ଦାମୀ ପୋଷାକ ପତ୍ର, ଚଳଣିରେ ଆଭିଜାତ୍ୟ, ସୌଖୀନ ଜୀବନଯାପନ ଶୈଳୀ କ’ଣ ଜଣଙ୍କର ବ୍ୟକ୍ତିତ୍ୱର ମାପକାଠି ହୋଇପାରେ? ଏହି ସବୁ ପ୍ରଶ୍ନ ମନକୁ ଆସିବା ବେଳେ ସାମନାକୁ ଆସିଥାନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସରଳ ଓ ନିରାଡମ୍ବର ଜୀବନ ଶୈଳୀ ତାଙ୍କ ବ୍ୟକ୍ତିତ୍ୱକୁ ଚର୍ଚ୍ଚିତ ଓ ଲୋକପ୍ରିୟ କରିଛି । ଦୁଇ ଦଶନ୍ଧୀରୁ ଅଧିକ କାଳ କ୍ଷମତାର କେନ୍ଦ୍ରବିନ୍ଦୁରେ ରହିଥିଲେ ମଧ୍ୟ ନିଜ ଭାବମୂର୍ତ୍ତିକୁ ସାମାନ୍ୟତମ କ୍ଷୂଣ୍ଣ ହେବାକୁ ଦେଇନାହାନ୍ତି ନବୀନ । ଆଜି ନବୀନ କେବଳ ଜଣେ ସାଧାରଣ ରାଜନେତା ନୁହଁନ୍ତି, ଦେଶର ରାଜନୀତିରେ ନବୀନ ଏକ ବ୍ରାଣ୍ଡ ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ହେବା ପୂର୍ବରୁ ଯେମିତି ଜୀବନ ଶୈଳୀ ଥିଲା ସାଧାରଣ, ମୁଖ୍ୟମନ୍ତ୍ରୀ ହେବା ପରେ ଠିକ୍ ସେହିପରି ନିରାଡମ୍ବର ଜୀବନ । ଏକଦମ୍ ସାଧାସିଧା ମଣିଷ । ପୋଷାକପତ୍ର କହିଲେ ଧଳା କୁର୍ତା ପାଇଜାମା, ହାୱାଇ କିମ୍ବା କୋହ୍ଲାପୁର ଚପଲ । ଅଫିସ ହେଉ କି’ ବାସଭବନ, ସବୁଠି ସାଧାରଣ ଆସବାବପତ୍ର । ପୁରୁଣା କାଠ ଚୌକିରେ କାମ ଚଳାଇନିଅନ୍ତି ମୁଖ୍ୟମନ୍ତ୍ରୀ । ଦିଲ୍ଲୀ ଡୁନ୍ ସ୍କୁଲରେ ପାଠପଢା, ବିଦେଶର ଆଭିଜାତ୍ୟ ମହଲରେ ବସାଉଠା, ହେଲେ ବ୍ୟକ୍ତିଗତ ଜୀବନ ଶୈଳୀରେ କେବେ ବି ବିଚ୍ୟୁତି ଘଟିନାହିଁ । ଏହା ହିଁ ନବୀନ ପଟ୍ଟନାୟକଙ୍କ ବିଶେଷତ୍ତ୍ୱ । ଦିଲ୍ଲୀରେ ବହୁଦିନ ପର୍ଯ୍ୟନ୍ତ ସେହି ପୁରୁଣା ଫିଆଟ୍ କାର୍ ଥିଲା ତାଙ୍କର ସହଚର । ମୁଖ୍ୟମନ୍ତ୍ରୀ ହେବା ପରେ ବି ଦୀର୍ଘ ବର୍ଷ ଧରି ମାରୁତି ଏଷ୍ଟିମ୍ ଗାଡି ବ୍ୟବହାର କରୁଥିଲେ । ପରେ ମାରୁତି ଏସଏକ୍ସ-୪ ମଡେଲ ଗାଡ଼ି ବ୍ୟବହାର କରିଥିଲେ ନବୀନ । ଦଳର ବିଧାୟକ, ମନ୍ତ୍ରୀଙ୍କୁ ସରଳ ଜୀବନଯାପନ କରିବାକୁ ପରାମର୍ଶ ଦେଇଥାଆନ୍ତି ମୁଖ୍ୟମନ୍ତ୍ରୀ ।
ଭିଭିଆଇପିର ପ୍ରତୀକ ଭାବେ ଥିବା ନାଲିବତୀକୁ ନିଜ ଗାଡ଼ିରୁ ହଟାଇବା ସହ ମନ୍ତ୍ରୀ ଓ ଅଫିସରଙ୍କ ଗାଡ଼ିରୁ ହଟାଇ ଅନନ୍ୟ ଉଦାହରଣ ସୃଷ୍ଟି କରିଛନ୍ତି ନବୀନ । ଅସହାୟ, ଅବହେଳିତ ମଣିଷଙ୍କ ପ୍ରତି ନବୀନଙ୍କ ଦରଦୀପଣ ଦେଖିବାକୁ ମିଳିଥାଏ ତାଙ୍କ ସରକାରଙ୍କ ଯୋଜନା ଭିତରେ । ଅନୁସୂଚିତ ଜାତି, ଜନଜାତି, ଗରିବ, ଦୁର୍ବଳ, ବୁଦ୍ଧ ଓ ମହିଳାଙ୍କ ଜୀବନରେ ଉନ୍ନତି ଆଣିବା ପାଇଁ ଅନେକ ଯୋଜନା ହିଁ ନବୀନଙ୍କୁ ସାରା ଓଡ଼ିଶାରେ ଲୋକପ୍ରିୟ କରାଇଛି । ରାଜନୀତିର ହୋ-ହଲ୍ଲା ଭିତରେ ରହି ମଧ୍ୟ ଅତ୍ୟନ୍ତ ଶାନ୍ତ ଓ ସମ୍ଭ୍ରମ ତାଙ୍କ ବ୍ୟବହାର । କଟୁ ଭାଷାରେ ବିରୋଧୀ ସମାଲୋଚନା ମଧ୍ୟ ତାଙ୍କୁ ବିବ୍ରତ କରିନଥାଏ । ନବୀନ କେବେ ବି ପ୍ରତିକ୍ରିୟାଶୀଳ ହୋଇନଥାନ୍ତି । ଏହା ହିଁ ତାଙ୍କୁ ନିଆରା କରିଥାଏ ଅନ୍ୟ ରାଜନେତାଙ୍କଠାରୁ ।
ଜୀବନ ଶୈଳୀ ସରଳ, ହେଲେ ଦୁର୍ନୀତି ପ୍ରତି ଅତ୍ୟନ୍ତ କଠୋର ଆଭିମୁଖ୍ୟ ଦେଖାଇଥାନ୍ତି ନବୀନ । ବ୍ୟକ୍ତିଗତ ଭାବେ ହେଉ କିମ୍ବା ମୁଖ୍ୟମନ୍ତ୍ରୀ ଭାବେ ହେଉ, ସ୍ୱଚ୍ଛ ଭାବମୂର୍ତ୍ତି ବଜାୟ ରଖିବାକୁ ସବୁବେଳେ ପ୍ରୟାସ କରି ଆସିଛନ୍ତି । ଦୁର୍ନୀତିର ଛିଟା ପଡିଥିବା ଅନେକ ବରିଷ୍ଠ ନେତାଙ୍କୁ ଦଳରୁ ବିଦା କରି ନିଜର ଭାବମୂର୍ତ୍ତିକୁ ଆହୁରି ଉଜ୍ଜଳ କରିବାରେ ସେ ସକ୍ଷମ ହୋଇଛନ୍ତି । ଦୀର୍ଘଦିନ ଧରି କ୍ଷମତାରେ ରହିବା ପରେ ବି ତାଙ୍କ ଲୋକପ୍ରିୟତା ଦିନକୁ ଦିନ ବୃଦ୍ଧି ପାଇଛି । ଆଜି ନବୀନ ଜଣେ ସାଧାରଣ ରାଜନେତା ନୁହଁନ୍ତି, ଦେଶର ରାଜନୀତିରେ ନବୀନ ଏକ ବ୍ରାଣ୍ଡ ।