କନକ ବ୍ୟୁରୋ : ଦିଲ୍ଲୀ ଏମ୍ସରେ ଜଗାବଳିଆଙ୍କୁ ଭେଟିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜଗା ବଳିଆଙ୍କ ସ୍ୱାସ୍ଥ୍ୟାବସ୍ଥା ନେଇ ଏମ୍ସ ଡାକ୍ତରଙ୍କ ସହ ଆଲୋଚନା କରିବା ପରେ ଜଗାବଳିଆଙ୍କ ସ୍ୱାସ୍ଥ୍ୟବସ୍ଥା ନେଇ ସନ୍ତୋଷ ପ୍ରକାଶ କରିଛନ୍ତି ନବୀନ । ଏହାସହ ଡାକ୍ତରୀ ଦଳଙ୍କୁ ସେମାନଙ୍କ ନିଷ୍ଠା ପାଇଁ ପ୍ରଶଂସା କରିବା ସହ ଓଡିଶା ବାସୀ ସେମାନଙ୍କୁ ସବୁ ଦିନ ପାଇଁ ମନେ ରଖିବେ ବୋଲି କହିଛନ୍ତି ନବୀନ । ଏମ୍ସରେ ଜଗା-ବଳିଆଙ୍କୁ ଭେଟିବା ବେଳେ ମୁଖ୍ୟମନ୍ତ୍ରୀ ଏକ ଭିନ୍ନ ମୁଡରେ ନଜରକୁ ଆସିଥିଲେ । ଜଗାକୁ ହାତ ହଲାଇ ମୁଖ୍ୟମନ୍ତ୍ରୀ ଡାକିବା ପରେ ଜଗା ମଧ୍ୟ ହାତ ହଲାଇଥିଲା । ଏପରିକି ମୁଖ୍ୟମନ୍ତ୍ରୀଙ୍କୁ ହାତ ହଲାଇ ବାଏ ବାଏ କରିଥିଲା ଜଗା । ଏହାପରେ ଜଗାବଳିଆଙ୍କ ବାପାମାଙ୍କ ସହ ମଧ୍ୟ ମୁଖ୍ୟମନ୍ତ୍ରୀ ଆଲୋଚନା କରିବା ସହ ସେମାନଙ୍କ ଚିକିତ୍ସା ପାଇଁ ଆବଶ୍ୟକ ଅନୁସାରେ ଅଧିକ ସହାୟତା ରାଜ୍ୟ ସରକାର ଯୋଗାଇ ଦେବେ ବୋଲି ସେ ଆଶ୍ୱାସନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାରା ଓଡିଶା ଏହି ଯାଆଁଲା ଭାଇଙ୍କ ମଙ୍ଗଳ କାମନା କରି ପ୍ରାର୍ଥନା କରୁଛନ୍ତି ବୋଲି ମଧ୍ୟ ସେମାନଙ୍କୁ ନବୀନ ପଟ୍ଟନାୟକ କହିଛନ୍ତି । ଅନ୍ୟପଟେ ଜଗାବଳିଆଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିବା ସହ ବିପଦମୁକ୍ତ ହୋଇଥିବା କହିଛନ୍ତି ଡାକ୍ତର ଅଶୋକ ମହାପାତ୍ର । ଭେଂଟିଲେଟରରୁ ବଳିଆକୁ ବାହାର କରାଯାଇଛି । ଦ୍ୱିତୀୟ ପର୍ଯ୍ୟାୟ ଅପରେସନର ଗୋଟିଏ ମାସ ପରେ ବଳିଆ ଗତକାଲି ଭେଂଟିଲେଟରରୁ ବାହାରିଛି । ତାକୁ ଆଇସିୟୁରେ ରଖାଯାଇ ଚିକିତ୍ସା ଚାଲିଛି । ଆଇସିୟୁରେ ତାକୁ ନାକବାଟେ ମହୁ ଓ କ୍ଷୀର ଦିଆଯାଉଥିବା ବେଳେ ଜଗାର ମଧ୍ୟ ସ୍ୱାସ୍ଥ୍ୟବସ୍ଥାରେ ସନ୍ତୋଷ ଜନକ ଉନ୍ନତି ଆସିଛି ।