ନବୀନ ଖୋଲିଲେ ଗୁମର । ସାମ୍ନାକୁ ଆଣିଲେ ବୈଜୟନ୍ତଙ୍କ ଅସଲ ଚେହେରା, କହିଲେ, ଗାଦି ପାଇଁ କରୁଥିଲେ ଗୁଜବ । ବିଜେପି-କଂଗ୍ରେସ ଆମର ଶତ୍ରୁ ନୁହଁନ୍ତି କିମ୍ବା ଆମେ ସେମାନଙ୍କର ବନ୍ଧୁ ନୁହଁ
କନକ ବ୍ୟୁରୋ : ୨୦୧୯ ନିର୍ବାଚନକୁ ନେଇ ବଡ ବୟାନ ଦେଇଛନ୍ତି ବିଜେଡି ସୁପ୍ରିମୋ । ୨୦୧୯ ନିର୍ବାଚନ କୁରୁକ୍ଷେତ୍ରରେ କୌଣସି ଜାତୀୟ ଦଳ ବହୁମତ ହାସଲ କରିପାରିବେ ନାହିଁ । ଏଭଳି ସଂକେତ ଦେଇଛନ୍ତି ନବୀନ । ଆଞ୍ଚଳିକ ଦଳ ଗୁଡିକ ସରକାର ଗଠନରେ ପ୍ରମୁଖ ଭୂମିକା ଗ୍ରହଣ କରିବେ ବୋଲି ସୂଚାଇ ଦେଇଛନ୍ତି ନବୀନ । ଏପରିକି ଆଞ୍ଚଳିକ ଦଳ ହିଁ ନିଣ୍ଣାୟକ ଭୂମିକାରେ ନଜର ଆସିବେ ।
Kanak News is now on WhatsApp
Join and get latest news updates delivered to you via WhatsApp
ଏଭଳି ସ୍ଥିତିରେ ବିଜେଡି କେଉଁ ପକ୍ଷ ନେବ ସେ ପ୍ରଶ୍ନର ଉତ୍ତର ଦେବାକୁ ଯାଇ ନବୀନ କହିଛନ୍ତି, ପୂର୍ବଭଳି ଏହି ଦୁଇ ଦଳ ଠାରୁ ସମଦୂରତା ଫର୍ମୁଲା ଆପଣାଇବ ବିଜେଡି । ଯେଉଁଦଳ ଓଡିଶାର ବିକାଶର ସାଥ ଦେବେ ସେହି ଦଳକୁ ବିଜେଡି ସମର୍ଥନ କରିବ ବୋଲି କହିଛନ୍ତି ନବୀନ । ଏହାଛଡା ବିଜେପି କିମ୍ବା କଂଗ୍ରେସକୁ ବିଜେଡି ଶତ୍ରୁ ନଜରରେ ଦେଖେ ନାହିଁ କି ଭଲ ବନ୍ଧୁ ଭାବେ ମଧ୍ୟ ଗ୍ରହଣ କରେ ନାହିଁ । କିନ୍ତୁ ନିର୍ବାଚନ ପରେ କୌଣସି ଦଳକୁ ସମର୍ଥନ ବିଜେଡି ଦେଇନପାରେ ବୋଲି କହିଛନ୍ତି ନବୀନ ।
ଓଡିଶାରେ ୨୦୧୯ରେ ମୋଦି ଲହର କାମ କରିବ ନାହିଁ । ଓଡିଶାରେ ଯେଉଁଭଳି ବିକାଶ ମୂଳକ କାର୍ଯ୍ୟ ବିଜେଡି ସରକାର କରିଛି ତାହାର ଜବାବ ଆଗାମୀ ନିର୍ବାଚନରେ ଭୋଟର ଦେବେ ବୋଲି କହିଛନ୍ତି ନବୀନ । ଏହାଛଡା ନବୀନ ସରକାରକୁ ବ୍ୟୁରୋକ୍ରାଟ ଚଳାଉଥିବା ନେଇ ଯେଉଁ ଚର୍ଚ୍ଚା ହେଉଛି ତାହାର ଉତ୍ତରରେ ନବୀନ କହିଛନ୍ତି, ଏହା ସମ୍ପୂର୍ଣ୍ଣ ବାଜେ କଥା । ସରକାରକୁ ମୁଁ ଓ ମୋ ମନ୍ତ୍ରୀମଣ୍ଡଳ ଚଳାଇଥାଉ ବୋଲି ସ୍ପଷ୍ଟ କରିଛନ୍ତି ।
ଏସବୁ ଭିତରେ ବୈଜୟନ୍ତଙ୍କୁ ନେଇ ବଡ ବୟାନ ଦେଇଛନ୍ତି ନବୀନ । ବୈଜୟନ୍ତ ମୋ ସ୍ଥାନ ନେବାକୁ ଚାହୁଁଥିଲେ ଓ ମୋ ସ୍ୱାସ୍ଥ୍ୟବସ୍ଥା ସର୍ମ୍ପକରେ ଅପପ୍ରଚାର କରୁଥିଲେ ବୋଲି କହିଛନ୍ତି ନବୀନ । ଏପରିକି ବିଜେଡିର ପ୍ରତିଷ୍ଠାତା ସଦସ୍ୟ ବୋଲି ବୈଜୟନ୍ତ ଯେଉଁ ଦାବି କରୁଛନ୍ତି ତାହାକୁ ନେଇ ନବୀନ କହିଛନ୍ତି. ସେ କେବେ ବିଜେଡିର ପ୍ରତିଷ୍ଠାତା ସଦସ୍ୟ ନଥିଲେ । ନିଜର ରାଜନୈତିକ ଅଭିଳାଷ ଚରିତାର୍ଥ ପାଇଁ ବୈଜୟନ୍ତ ତାଙ୍କ ବିରୋଧରେ ଏଭଳି ଅପପ୍ରଚାର କରୁଥିଲେ ବୋଲି କହିଛନ୍ତି ନବୀନ ।
ଏସବୁ ବାଦ୍ ପଞ୍ଚାୟତ ନିର୍ବାଚନର ଫଳାଫଳକୁ ନେଇ ନବୀନ କହିଛନ୍ତି, ୨୦୧୭ରେ ଆମେ ତାଙ୍କୁ ହାଲୁକା ଭାବେ ନେଇଥିଲୁ । ଏପରିକି ମୁଁ ନିଜେ ପ୍ରଚାର ମୈଦାନକୁ ଓହ୍ଲାଇନଥିଲି । କିନ୍ତୁ ପଞ୍ଚାୟତ ନିର୍ବାଚନର ତ୍ରୁଟିକୁ ଆମେ ସୁଧାରି ନେଇଛୁ ବୋଲି କହିଛନ୍ତି ନବୀନ ।