କନକ ବ୍ୟୁରୋ: ଠକାମିର ବାଦଶାହ,ଠକର ସୌଦାଗର ନଟବରଲାଲ । ଇଏ ସେଇ ନଟବରଲାଲ ଯିଏ ବିଦେଶୀ ହାତରେ ବିକ୍ରି କରିଦେଇଥିଲା ତାଜମହଲ ଆଉ ଲାଲକିଲ୍ଲା । ଥରେ କି ଦୁଇ ଥର ନୁହେଁ ବିଦେଶୀ ଲୋକଙ୍କୁ ଭୂଆଁ ବୁଲେଇ ତିନି ତିନି ଥର ଏହି ଠକ ତାଜମହଲ ଆଉ ଲାଲକିଲ୍ଲାକୁ ବିକ୍ରି କରିଦେଇଥିଲା । ଖାଲି ସେତିକି ନୁହେଁ ୟା ଠକାମିର ସୀମା ଏତେ ଲମ୍ବିଥିଲା ଯେ, ଭାରତର ସଂସଦ ଆଉ ରାଷ୍ଟ୍ରପତି ଭବନକୁ ବି ସେ ଛାଡି ନଥିଲା ।
Kanak News is now on WhatsApp
Join and get latest news updates delivered to you via WhatsApp
ଭାରତରେ ଏମିତି ଜଣେ ଠକ କେବେ ବସବାସ କରୁଥିଲା ଯେ କି ଭାରତର ସଂସଦକୁ ବି ବିକ୍ରି କରିବାର ସାହାସ ରଖୁଥିଲା ତା ବୋଧହୁଏ ବହୁତ କମ ଲୋକ ଜାଣିଥିବେ । ହେଲେ କଥାଟି କିନ୍ତୁ ପୂରାପୁରି ସତ । ମିଥିଳେଶ କୁମାର ଶ୍ରୀବାସ୍ତବ ଔରଫ ନଟବରଲାଲ । ଭାରତର ଠକାମି ଦୁନିଆଁର ଏ ଏମିତି ଏକ ନାଁ ଯାହାକୁ କେହି ବି ଭୁଲି ପାରିବେନି । ନିଜ କଥାର ଛଳରେ ବିଦେଶୀ ଲୋକଙ୍କୁ ଚୂନ ଲଗାଇ ଏହି ଠକ ବିଶ୍ୱ ପ୍ରସିଦ୍ଧ ତାଜମହଲ ସହ ରାଷ୍ଟ୍ରପତି ଭବନ, ଲାଲକିଲ୍ଲା ଆଉ ସଂସଦକୁ ବି ବିକ୍ରି କରିଦେଇଥିଲା । ଏମିତିକି ଭାରତର ରାଷ୍ଟ୍ରପତି ଭବନକୁ ବିକିବାକୁ ସେ ଜାଲରେ ରାଷ୍ଟ୍ରପତି ରାଜେନ୍ଦ୍ର ପ୍ରସାଦଙ୍କ ସିଗନେଚର ବି କରିଦେଇଥିଲା । ଯାହା ଶୁଣିବା ପରେ ଆଜି ବି ଅନେକ ଲୋକ ତାଜୁବ ହୁଅନ୍ତି ।
ତେବେ ଠକ ନଟବରଲାଲର ଠକାମିର ସୀମା ଖାଲି ଏତିକି ନଥିଲା । ବିଭିନ୍ନ ସମୟରେ ଅନେକ ଲୋକଙ୍କୁ ଚୂନ ଲଗାଇ ସେ ଲକ୍ଷ ଲକ୍ଷ ଟଙ୍କାର ଠକେଇ କରିଥିଲା । କୁହାଯାଏ ଭାରତର ଅନେକ ଶିଳ୍ପପତିଙ୍କ ପାଖରେ ବି ସେ ନିଜର ଠକ ବୁଦ୍ଧିକୁ ପ୍ରୟୋଗ କରି ଅନେକଙ୍କୁ କଳାକନା ବୁଲାଇ ଦେଇଥିଲା । ଯେଉଥିପାଇଁ ତା ନାଁରେ ଆଠଟି ରାଜ୍ୟରେ ଶହେରୁ ଅଧିକ ମାମଲା ପଡିରହିଥିଲା ।
ସବୁଠାରୁ ରୋଚକ କଥା ହେଉଛି, ପୋଲିସ ନଟବରଲାଲକୁ ଧରି ହାଜତରେ ଭର୍ତ୍ତି କରୁଥିଲେ ବି ସେ ସବୁଥର କିଛି ନା କିଛି ଫନ୍ଦି ଫିକର କରି ଜେଲରୁ ବାହାରି ଯାଉଥିଲା । ଅନେକ ଥର ସେ ନିଜର ବେଶ ବଦଳାଇ ଜେଲରଙ୍କୁ ଚକମା ଦେଉଥିଲା । କୁହାଯାଏ ନଟବରଲାଲର ପ୍ରକୃତ ନା କଣ ଥିଲା ସେତେବେଳେ କାହାକୁ ବି ଜଣାନଥିଲା । ସେ ପ୍ରାୟ ପଚଶରୁ ଅଧିକ ନାଁରେ ପରିଚିତ ଥିଲା ଏବଂ ବେଶ ଭୂଷା ବଦଳାବାରେ ମାହିର ଥିଲା । ତେଣୁ ପୋଲିସ ତା ପାଖରେ ଏତେ ସହଜରେ ପହଞ୍ଚିପାରୁନଥିଲା।
୧୯୯୬ ମସିହାରେ ଶେଷ ଥର ପାଇଁ ନଟବରଲାଲ ପୋଲିସ ହାତରେ ଧରାପଡିଥିଲା । ସେତେବେଳେ ତାକୁ ୮୪ ବର୍ଷ ହୋଇଥାଏ । ଦେହ ଖରାପ ଥିବାରୁ ଅଦାଲତ ତାକୁ କାନପୁର ଜେଲରୁ ଦିଲ୍ଲୀ ଏମସକୁ ପଠାଇଥିଲେ । ଆଉ ଟ୍ରେନରେ ଦିଲ୍ଲୀ ଯିବା ସମୟରେ ପୁରୁଣା ଦିଲ୍ଲୀ ଷ୍ଟେସନରେ ସେ ପୋଲିସଙ୍କୁ ଚକମା ଦେଇ ଫେରାର ହୋଇଯାଇଥିଲା। ସେବେଠାରୁ ତାକୁ କେବେ ବି କେଉଁଠି ଦେଖିବାକୁ ମିଳିନି । ସେ କେବେ ମୃତ୍ୟୁବରଣ କଲା ତା’ର ସଠିକ ତଥ୍ୟ ବି କାହା ପାଖରେ ନାହିଁ । କୁହାଯାଏ ତା ସବୁ ମାମଲାର ଦଣ୍ଡକୁ ମିଶାଇଲେ ତାକୁ ୧୧୩ ବର୍ଷ ପାଇଁ ଜେଲ ଦଣ୍ଡ ଶୁଣାଯାଇଥିଲା ।