କନକ ବ୍ୟୁରୋ : ଉତ୍ତରପ୍ରଦେଶର ପ୍ରୟାଗରାଜରେ ଅଖିଳ ଭାରତୀୟ ଆଖଡା ପରିଷଦର ଅଧ୍ୟକ୍ଷ ନରେନ୍ଦ୍ର ଗିରିଙ୍କ ସନ୍ଦେହଜନକ ମୃତ୍ୟୁ ମାମଲାରେ ତିନି ଜଣଙ୍କୁ ଗିରଫ କରାଯାଇଛି । ଶିଷ୍ୟ ଆନନ୍ଦ ଗିରିଙ୍କ ନାଁରେ ମାମଲା ରୁଜୁ କରାଯାଇଛି । ନିଜ ମଠରେ ହିଁ ନରେନ୍ଦ୍ର ଗିରିଙ୍କ ଝୁଲନ୍ତା ମୃତଦେହ ମିଳିଥିଲା । ତଦନ୍ତ ବେଳେ ପୁଲିସ ଘଟଣାସ୍ଥଳରୁ ସୁସାଇଡ ନୋଟ ଜବତ କରିଛି । ୭ ପୃଷ୍ଠାର ଏହି ସୁସାଇଡ ନୋଟରେ ମହନ୍ତ ତାଙ୍କ ବିବାଦୀୟ ଶିଷ୍ୟ ଆନନ୍ଦ ଗିରିଙ୍କ ନାଁ ନେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏସବୁ ଭିତରେ ସୋମବାରର ପୂରା ଘଟଣାକ୍ରମ ବାବଦରେ ଜାତୀୟ ଗଣମାଧ୍ୟମରେ ମୁହଁ ଖୋଲିଛନ୍ତି ନରେନ୍ଦ୍ର ଗିରିଙ୍କ ଆଉ ଜଣେ ଶିଷ୍ୟ ନିର୍ଭୟ ଦ୍ୱିବେଦୀ । ନିର୍ଭୟଙ୍କ କହିବା ଅନୁଯାୟୀ, ପ୍ରତିଦିନ ଭଳି ସୋମବାର ମଧ୍ୟ ସକାଳ ୫ଟାରୁ ନରେନ୍ଦ୍ର ଗିରିଙ୍କ ଦିନ ଆରମ୍ଭ ହୋଇଥିଲା । ୫ଟା ବେଳେ ଚାହା ପିଇବା ପରେ ୭ଟା ବେଳକୁ ତଳ ଘରକୁ ଆସିଥିଲେ । ମୁଁ ସାଢେ ୭ଟାରୁ ୮ଟା ମଧ୍ୟରେ ଉଠିବା ପରେ ଗୁରୁଜୀଙ୍କୁ ନମସ୍କାର କରି ମନ୍ଦିର ଚାଲି ଯାଇଥିଲି । ମନ୍ଦିରରୁ ଫେରିବା ବେଳେ ଜାଣିଲି ମହାରାଜ ନରେନ୍ଦ୍ର ଗିରି ସମସ୍ତଙ୍କ ସହ ମଧ୍ୟାହ୍ନ ଭୋଜନ କରି ଉପରକୁ ଯାଇଛନ୍ତି । ଉପର ଘରେ କିଛି ସମୟ ରହିବା ପରେ ପୁଣିଥରେ ଆରାମ କରିବାକୁ ତଳ ଘରକୁ ଆସିଥିଲେ ।
ତଳ ଘରେ ଆରାମ କରିବା ପୂର୍ବରୁ ନରେନ୍ଦ୍ର ଗିରି କହିଥିଲେ ଯେ, ମୋତେ କେହି ଭେଟିବାକୁ ଆସୁଛନ୍ତି, ତେଣୁ ମୁଁ ତଳେ ଘରେ ରହିବି । ମୋତେ କେହି ଆଜି ହଇରାଣ କରିବନି । କେହି ତାଙ୍କୁ ଭେଟିବାକୁ ଆସୁଥିବାରୁ ସମସ୍ତଙ୍କୁ ନିଜ ପାଖରୁ ଦୂରେଇ ରଖିଥିଲେ ନରେନ୍ଦ୍ର । କିନ୍ତୁ କିଏ ନରେନ୍ଦ୍ରଙ୍କୁ ଭେଟିବାକୁ ଆସିବ ତାହା କାହାକୁ ମଧ୍ୟ ଜଣାନଥିଲା । ତେବେ ନରେନ୍ଦ୍ରଙ୍କ ଝୁଲନ୍ତା ଶବ ଉଦ୍ଧାର ବେଳେ ଏକ ସୁଇସାଇଟ ନୋଟ ଜବତ କରାଯାଇଛି ଯେଉଁଥିରେ ବିବାଦୀୟ ଶିଷ୍ୟ ଆନନ୍ଦ ଗିରିଙ୍କ ନାଁ ରହିଛି ।
ପ୍ରୟାଗରାଜର ଯେଉଁ ଘରେ ନରେନ୍ଦ୍ର ଗିରିଙ୍କ ମୃତଦେହ ମିଳିଛି, ସେହି ଘର ଚାରିଆଡୁ ବନ୍ଦ ଥିଲା । ମୁଖ୍ୟ ଦ୍ୱାର ବି ବନ୍ଦ ରହିଥିଲା । ପ୍ରାଥମିକ ତଦନ୍ତ ପରେ ପୁଲିସ ଏହାକୁ ଏକ ଆତ୍ମହତ୍ୟା ବୋଲି କହିଛି । ସେପଟେ ଆନନ୍ଦ ଗିରି କହିଛନ୍ତି, ସେ ସବୁପ୍ରକାରର ତଦନ୍ତର ସାମ୍ନା କରିବାକୁ ପ୍ରସ୍ତୁତ ଅଛନ୍ତି । ତାଙ୍କ ବିରୋଧରେ ଷଡଯନ୍ତ୍ର କରାଯାଉଛି ବୋଲି ସେ ଅଭିଯୋଗ କରିଛନ୍ତି । ଆନନ୍ଦ ଗିରିଙ୍କୁ ପଚରାଉଚରା ପାଇଁ ହରିଦ୍ୱାର ଯାଇଛି ଉତରପ୍ରଦେଶ ପୁଲିସ । ସେପଟେ ଆଜି ନରେନ୍ଦ୍ର ଗିରିଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ପ୍ରୟାଗରାଜ ଯିବେ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।