ସିବିଆଇ ଅତିରିକ୍ତ ନିର୍ଦ୍ଦେଶକ ପଦରୁ ବିଦା ହେଲେ ନାଗେଶ୍ୱର ରାଓ । ସୁପ୍ରିମକୋର୍ଟଙ୍କ ଭର୍ତ୍ସନା ପରେ କେନ୍ଦ୍ର ସରକାରଙ୍କ ପଦକ୍ଷେପ, ବିଭିନ୍ନ ଦୁର୍ନୀତିରେ ଛନ୍ଦି ହୋଇଥିଲେ ନାଗେଶ୍ୱର
କନକ ବ୍ୟୁରୋ : ସାପ-ସିଡି ଖେଳ ଭଳି ହେଲା ବରିଷ୍ଠ ଆଇପିଏସ୍ ଅଫିସରଙ୍କ କ୍ୟାରିୟର । ଏକଦା ମୋଦୀ ସରକାରଙ୍କ ପସନ୍ଦର ଆଇପିଏସ୍ ଅଫିସର ଥିବା ଏମ୍ ନାଗେଶ୍ୱର ରାଓଙ୍କ କ୍ଷେତ୍ରରେ ଏହା ଦେଖିବାକୁ ମିଳିଛି । ଜାନୁଆରୀ ମାସରେ ସିବିଆଇର ଅନ୍ତରୀଣ ନିର୍ଦ୍ଦେଶକ କରିଥିବା କେନ୍ଦ୍ର ସରକାର, ମାତ୍ର ଛଅ ମାସ ପରେ ସିବିଆଇର ଅତିରିକ୍ତ ନିର୍ଦ୍ଦେଶକ ପଦରୁ ଏମ୍ ନାଗେଶ୍ୱର ରାଓଙ୍କୁ ହଟାଇ ଦେଇଛନ୍ତି । ୧୯୮୬ ବ୍ୟାଚର ଏହି ଓଡ଼ିଶା କ୍ୟାଡର ଆଇପିଏସଙ୍କୁ ମିଳିଛି କେନ୍ଦ୍ର ଗୃହମନ୍ତ୍ରାଳୟ ଅଧୀନରେ ଥିବା ଅଗ୍ନିଶମ, ସିଭିଲ୍ ଡିଫେନ୍ସ ଓ ହୋମଗାର୍ଡ ଡିଜିର ଦାୟିତ୍ୱ ।
Kanak News is now on WhatsApp
Join and get latest news updates delivered to you via WhatsApp
ଯେଉଁଭଳି ଭାବେ ଆଲୋକ ବର୍ମାଙ୍କୁ ସିବିଆଇ ମୁଖ୍ୟ ପଦରୁ ହଟାଇ ଅଗ୍ନଶମ ବିଭାଗ ଡିଜି କରାଯାଇଥିଲା, ସେହିଭଳି ଭାବେ ନାଗେଶ୍ୱରଙ୍କୁ ମଧ୍ୟ ମିଳିଛି ଏକା ଦାୟିତ୍ୱ । ସିବିଆଇର ପୂର୍ବତନ ନିର୍ଦ୍ଦେଶକ ଆଲୋକ ବର୍ମା ଓ ତାଙ୍କ ଡେପୁଟି ରାକେଶ ଆସ୍ଥାନାଙ୍କ ମଧ୍ୟରେ ବିବାଦ ଉଗ୍ର ରୂପ ନେବା ପରେ ତିନି ଜଣ ସିନିୟର ଅଫିସରଙ୍କୁ ଅଣଦେଖା କରି ଏମ୍ ନାଗେଶ୍ୱର ରାଓଙ୍କୁ ଅନ୍ତରୀଣ ନିର୍ଦ୍ଦେଶକ ଭାବେ ନିଯୁକ୍ତ କରିଥିଲେ ମୋଦୀ ସରକାର ।
ଦୁଇ ଦୁଇ ଥର ଅନ୍ତରୀଣ ନିର୍ଦ୍ଦେଶକ ହୋଇ ସିବିଆଇର ସର୍ବେସର୍ବା ବନିଥିଲେ ଏହି ବରିଷ୍ଠ ପୋଲିସ ଅଧିକାରୀ । ତେବେ ମୋଦୀ ସରକାରଙ୍କ ଦ୍ୱିତୀୟ ପାଳିରେ ନାଗେଶ୍ୱର ହୋଇଛନ୍ତିି ସିବିଆଇ ପାଇଁ ଅଲୋଡ଼ା । ଏମ୍ ନାଗେଶ୍ୱର ରାଓ ଥିଲେ ସିବିଆଇର ଅନ୍ୟତମ ପ୍ରଭାବଶାଳୀ ଅଫିସର । ତାଙ୍କର କ୍ୟାରିୟର ଯେମିତି ଆଗକୁ ଗତି କରୁଥିଲା, ସେହିପରି ଅନେକ ବିବାଦ ମଧ୍ୟ ତାଙ୍କର ପିଛା କରୁଥିଲା ।
ବିହାର ମୁଜାଫରପୁର ସେଲଟର ହୋମରେ ହୋଇଥିବା ଯୌନ ନିର୍ଯାତନାର ତଦନ୍ତ କରୁଥିବା ଅଧିକାରୀଙ୍କୁ ହଟାଇବା ଘଟଣାରେ ସୁପ୍ରିମକୋର୍ଟ ଭତ୍ସନା କରିଥିଲେ । ଏହା ସହ ନାଗେଶ୍ୱର ରାଓଙ୍କୁ ଅଦାଲତ ଅବମାନନା ନୋଟିସ ଜାରି କରିଥିଲେ । ଏଥିପାଇଁ ଉଚ୍ଚତମ ନ୍ୟାୟଳୟରେ ନିସର୍ତ କ୍ଷମାପ୍ରାର୍ଥନା କରିଥିଲେ ଏହି ଆଇପିଏସ୍ ଅଧିକାରୀ । ତେବେ ଏହି କ୍ଷମାପ୍ରାର୍ଥନାକୁ ଗ୍ରହଣ ନକରି ନାଗେଶ୍ୱର ରାଓ ଓ ଅନ୍ୟଜଣେ ଅଫିସରଙ୍କୁ ୧ ଲକ୍ଷ ଟଙ୍କା ଲେଖାଏଁ ଜରିମାନା ଆଦେଶ ଦେବା ସହ କୋର୍ଟର ଏକ କୋଣରେ ଗୋଟିଏ ଦିନ ବସାଇ ଦେଇଥିଲେ ସୁପ୍ରିମକୋର୍ଟ । ସେହିପରି ଶାରଦା ଚିଟ୍ ଫଣ୍ଡ ମାମଲାର ତଦନ୍ତରେ ତାଙ୍କର ଭୂମିକା ନେଇ କଡ଼ା ସମାଲୋଚନା କରିଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ।