ନାଗାଲାଣ୍ଡରେ ଉଗ୍ର ହେଉଛି ଯବାନ-ଜନତା ହିଂସା : ମୁନ ଜିଲ୍ଲାରେ ୧୪୪ ଧାରା ଜାରି, ଇଂଟରନେଟ ସେବା ବନ୍ଦ
ଘଟଣାର ଏସଆଇଟି ତଦନ୍ତ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ
କନକ ବ୍ୟୁରୋ : ନାଗାଲାଣ୍ଡରେ ଯବାନ-ଜନତାଙ୍କ ମଧ୍ୟରେ ହିଂସାକାଣ୍ଡ ଉଗ୍ରରୂପ ନେଇଛି । ପୁଲିସ ଗୁଳିରେ ୧୪ ଶ୍ରମିକଙ୍କ ମୃତ୍ୟୁ ଘଟଣାକୁ ନେଇ ମୁନ ଜିଲ୍ଲାରେ ଥିବା ଆସାମ ରାଇଫଲର କ୍ୟାମ୍ପରେ ଭଙ୍ଗାରୁଜା କରି ଜାଳି ଦେଇଛନ୍ତି ଉତ୍ୟକ୍ତ ଜନତା । ଶ୍ରମିକଙ୍କୁ ଗୁଳି କରିଥିବା ଯବାନଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବିରେ ଉତ୍ୟକ୍ତ ଲୋକେ ମୁନ ଜିଲ୍ଲାରେ ବ୍ୟାପକ ଭଙ୍ଗାରୁଜା କରିଛନ୍ତି । ସ୍ଥିତି ନିୟନ୍ତ୍ରଣ ପାଇଁ ୧୪୪ ଧାରା ଜାରି କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମୁନ ଜିଲ୍ଲାରେ ଆଇନଶୃଙ୍ଖଳା ରକ୍ଷା ସହ ଗୁଜବ ପ୍ରଚାରକୁ ରୋକିବା ପାଇଁ ପ୍ରଶାସନ ପକ୍ଷରୁ ମୋବାଇଲ ଇଂଟରନେଟ ସେବା ବନ୍ଦ କରିଦିଆଯାଇଛି । ସୂଚନା ଅନୁସାରେ ନାଗାଲାଣ୍ଡର ମୋନ୍ ଜିଲ୍ଲା ତିରୁ ଗାଁ ଦେଇ ଏକ ପିକ୍ଅପରେ ସାଧାରଣ ଲୋକ ଯାଉଥିଲେ । କୋଇଲା ଖଣିରେ କାମ କରୁଥିବା ଏହି ଶ୍ରମିକଙ୍କୁ ଉଗ୍ରବାଦୀ ଭାବି ଗୁଳି ଚଳାଇଥିଲେ ସୁରକ୍ଷାକର୍ମୀ । ଏହି ଘଟଣାରେ ୧୪ଜଣଙ୍କ ମୃତ୍ୟୁ ହେବା ସହ କେତେକ ଗୁରୁତର ହୋଇଛନ୍ତି । ଏହାକୁ ନେଇ ଉତ୍ୟକ୍ତ ଲୋକେ ସେନାର ଏକ ଗାଡି ପୋଡି ଦେଇଥିଲେ । ଏଥିରେ ଜଣେ ଯବାନଙ୍କ ଜୀବନ ଯାଇଥିବା ଜଣାପଡିଛି ।
ସେପଟେ ଗୁଳିକାଣ୍ଡ ଘଟଣାର ଏସଆଇଟି ତଦନ୍ତ ନିର୍ଦ୍ଦେଶ ଦେଇଛନ୍ତି ନାଗାଲାଣ୍ଡ ମ୍ରୁଖ୍ୟମନ୍ତ୍ରୀ ନେଇଫିଉ ରିଓ । ସେପଟେ ସେନା ମଧ୍ୟ ଏହି ଘଟଣାରେ ଦୁଃଖ ପ୍ରକାଶ କରିବା ସହ କୋର୍ଟ ଅଫ୍ ଇନକ୍ୟୁରି ଅର୍ଡର ଦେଇଛି । ଘଟଣା ଉଗ୍ରରୂପ ନେଉଥିବାରୁ ଲୋକଙ୍କୁ ଶାନ୍ତି ବଜାୟ ରଖିବାକୁ ଅପିଲ୍ କରିଛନ୍ତି ନାଗାଲାଣ୍ଡ ମ୍ରୁଖ୍ୟମନ୍ତ୍ରୀ ନେଇଫିଉ ରିଓ । ଗୃହମନ୍ତ୍ରୀ ଅମିତ ଶାହ ମଧ୍ୟ ଏଥିରେ ଦୁଃଖ ପ୍ରକାଶ କରି ଟୁଇଟ୍ କରିଛନ୍ତି ।