କନକ ବ୍ୟୁରୋ: ନବରଙ୍ଗପୁର ଜିଲ୍ଲାରେ କଙ୍ଗାରୁ କୋର୍ଟ । ନବରଙ୍ଗପୁର ଜିଲ୍ଲା ଡାବୁଗାଁ ଥାନା ଅଞ୍ଚଳ ରେ ଘଟିଛି ହୃଦୟ ବିଦାରକ କଙ୍ଗାରୁ କୋର୍ଟ। ଦୁଇ ପ୍ରେମୀ ଯୁଗଳଙ୍କୁ କପଡ଼ାରେ ଆଖି ବାନ୍ଧି ନିର୍ଦ୍ଧୁମ ମାଡ଼ ମାରିଛନ୍ତି କିଛି ବ୍ୟକ୍ତି। ପ୍ରେମୀ ଯୁଗଳ ମାଡ଼ ନ ମାରିବାକୁ ଆକୁଳ ନିବେଦନ କରିଥିଲେ ସୁଦ୍ଧା କୌଣସି ଦୟା ନ ଦେଖାଇ ଆଖିବୁଜା ମାଡ଼ ମାରିଛନ୍ତି । ଭିଡିଓ ଭାଇରାଲ ହେବା ପରେ ପୋଲିସ ନିଜ ଆଡୁ ମାମଲା ରୁଜୁ କରି ତଦନ୍ତ ଚଲାଇଛି ।
ଭୁଲ ତାଙ୍କର ପ୍ରେମ କରିବା, ଆଉ ଏହାର ସଜା କଙ୍ଗାରୁକୋର୍ଟରେ ଦିଆଯାଉଛି । ସୋସିଆଲ ମିଡିଆରେ ଭାଇରାଲ ଡାବୁଗାଁ ଥାନା ଅଂଚଳର ଏହି ଭିଡିଓ ଚାଂଚଲ୍ୟ ଖେଲାଇ ଦେଇଛି । ସମ୍ଭବତଃ ଗାଁ ନିକଟ ବିଲରେ ଦୁଇ ପ୍ରେମୀ ଯୁଗଳଙ୍କୁ କପଡ଼ାରେ ବାନ୍ଧି ଦିଆଯାଇଛି । ଆଖିରେ ମଧ୍ୟ କପଡା ବନ୍ଧା ଯାଇଛି । ଆଉ ତାଙ୍କୁ ଘେରିଯାଇ କିଛି ମହିଳା ଓ ପୁରୁଷ କେତେବେଳେ ବାଡ଼ିରେ ନିର୍ମମ ଭାବେ ପିଟୁଛନ୍ତି ତ ଆଉ କେତେବେଳେ ଗୋଇଠା ମାରୁଛନ୍ତି । ଖସିଯିବାର କୌଣସି ବାଟ ନାହିଁ, କିଛି ଉପାୟ ନପାଇ ପ୍ରେମୀଯୁଗଳ ମାଡ଼ ନ ମାରିବାକୁ ଆକୁଳ ନିବେଦନ କରୁଛନ୍ତି, ହେଲେ ନିର୍ଦ୍ଦୟ ଗ୍ରାମୱାସୀଙ୍କ ଉପରେ କିଛି ପ୍ରଭାବ ପଡୁନାହିଁ । କୌଣସି ଦୟା ନ ଦେଖାଇ ଆଖିବୁଜା ମାଡ଼ ମାରିଚାଲିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କଙ୍ଗାରୁକୋର୍ଟର ଏହି ବର୍ବରକାଣ୍ଡକୁ କେହି ଜଣେ ମୋବାଇଲରେ ସୁଟ କରି ସୋସିଆଲ ମିଡିଆରେ ଛାଡିଦେବା ପରେ ଭିଡିଓ ଭାଇରାଲ ହୋଇଛି । ଆଉ ପ୍ରେମ ପାଇଁ ପ୍ରେମୀଯୁଗଳଙ୍କୁ ନିସ୍ତୁକ ମାଡ଼ ଘଟଣା ସାମ୍ନାକୁ ଆସିଛି ।
ଘଟଣାଟି ପ୍ରାୟ ୭ ଦିନ ତଳର । ନବରଙ୍ଗପୁର ଜିଲ୍ଲା ଡାବୁଗାଁ ଥାନା ଅଞ୍ଚଳର ଜଣେ ନାବାଳିକାଙ୍କୁ ପ୍ରେମ କରୁଥିଲେ ପାଖ ଗାଁର ଜଣେ ବିବାହିତ ଯୁବକ । ପ୍ରେମିକା ନାବାଳିକା ଥିବା ବେଳେ ପ୍ରେମିକଠାରୁ ଉଚ୍ଚ ଜାତିର ବୋଲି କୁହାଯାଉଛି। ବିବାହିତ ଓ ଛୋଟ ଜାତିର ଯୁବକକୁ ଝିଅ ପ୍ରେମ କରୁଥିବା ଜାଣିବା ପରେ ରାଗିଯାଇଥିଲେ ପରିବାର । ଆଉ ପ୍ରେମିକାକୁ ଭେଟିବାକୁ ଆସିଥିଲା ବେଳେ ପରିବାର ଲୋକ ଓ ଗ୍ରାମବାସୀଙ୍କ ହାତରେ ଧରାପଡିଯାଇଥିଲା ଯୁବକ । କଙ୍ଗାରୁକୋର୍ଟ ପରେ ଉଭୟ ପ୍ରେମିକ ଓ ପ୍ରେମିକାଙ୍କୁ ବାନ୍ଧି ସମସ୍ତଙ୍କ ସାମ୍ନାରେ ନିସ୍ତୁକ ମାଡ ମାରାଯାଇଛି। ଆଉ ସେହି ସମୟର ଘଟଣାକୁ କେହି ମୋବାଇଲରେ ଉଠାଇ ସୋସିଆଲ ମିଡିଆରେ ଛାଡିଦେବା ପରେ ଭାଇରାଲ ହେଉଛି ।
ସୋସିଆଲ ମିଡିଆରେ ଭିଡିଓ ଭାଇରାଲ ହେବା ପରେ ଡାବୁଗାଁ ଥାନା ପୋଲିସ ନିଜ ଆଡୁ ମାମଲା ରୁଜୁ କରି ତଦନ୍ତ ଚଲାଇଛି । ଗିରଫ ଭୟରେ ଘଟଣାରେ ସଂପୃକ୍ତ ଲୋକ ଫେରାର ଥିବା ବେଳେ ପୋଲିସ ମଧ୍ୟ କୌଣସି ପ୍ରତିକ୍ରିୟା ଦେବାକୁ ମନା କରିଛି ।