ମଣ୍ଡିକୁ ନେଇ ହଟଚମଟ ବେଳେ ଆସିଲା ନବରଙ୍ଗପୁର ଧାନ ଚୋରାଚାଲାଣର ଚିତ୍ର । ମଣ୍ଡିଖୋଲିବାରୁ ବିଳମ୍ବ ହେଉଥିବାରୁ ଦଲାଲ କରୁଛନ୍ତି ରାଜ୍
କନକ ବ୍ୟୁରୋ : ମଣ୍ଡିକୁ ନେଇ ସମସ୍ୟା ରାଜ୍ୟରେ କମିବାର ନାଁ ଧରୁନି । କେଉଁଠି ଟୋକନକୁ ନେଇ ବିବାଦ ଦେଖା ଦେଲାଣି ତ କେଉଁଠି ବେଆଇନ ଭାବେ ବସ୍ତା ବସ୍ତା ଧାନ ଜମା ହୋଇଥିବା ଖବର ବି ସାମ୍ନାକୁ ଆସୁଛି । ଏହାରି ଭିତରେ ପଶ୍ଟିମ ଓଡିଶାରୁ ଧାନ ବାହାର ରାଜ୍ୟକୁ ଚାଲାଣ ହେଉଥିବା ମଧ୍ୟ ଦେଖିବାକୁ ମିଳିଛି । ନବରଙ୍ଗପୁର ଜିଲ୍ଲାରେ ଧାନ ମଣ୍ଡି ଖୋଲିବାରେ ବିଳମ୍ବ ହେଉଥିବାରୁ ଧାନର ଚୋରା ଚାଲାଣ ବୃଦ୍ଧି ପାଇଛି । ଏହା ସହ ଓଡିଶା ତୁଳନାରେ ପଡୋଶୀ ଆନ୍ଧ୍ର ଓ ଛତିଶଗଡ ରାଜ୍ୟରେ ଧାନର ସହାୟକ ମୂଲ୍ୟ ଅଧିକ ରହିଛି । ଏହାର ଫାଇଦା ନେଇ ଦଲାଲମାନେ ଚାଷୀଙ୍କୁ ପ୍ରଲୋଭିତ କରୁଛନ୍ତି । ସେମାନେ ଚାଷୀଙ୍କଠାରୁ ଧାନ କିଣି ପଡୋଶୀ ରାଜ୍ୟରେ ବିକ୍ରି କରି ଲାଭବାନ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ଢଙ୍ଗରେ ଚୋରାଚାଲାଣ ଚାଲିଥିବା ବେଳେ କୌଣସି ସୂତ୍ରରୁ ଖବର ପାଇ ଜିଲ୍ଲା ଯୋଗାଣ ବିଭାଗ ନବରଙ୍ଗପୁର ସହର ମାଝୀଗୁଡାଠାରେ ଦୁଇଟି ଧାନ ବୋଝେଇ ଟ୍ରକକୁ ଜବତ କରିଛି । ଉମରକୋଟ ବ୍ଲକ ଜାମରୁଣ୍ଡାରୁ ଆନ୍ଧ୍ର ପ୍ରଦେଶର ପେଦାପୁରମ୍ ଯାଉଥିବା ଜଣାପଡିଛି । ଦୁଇଟି ଟ୍ରକରେ ମୋଟ ୧୧୪୦ ବସ୍ତାରେ ପ୍ରାୟ ୫୪୮ କ୍ୱିଂଟାଲ ଧାନ ରହିଥିବା ଯୋଗାଣ ବିଭାଗ ପକ୍ଷରୁ ସୂଚନା ମିଳିଛି । ତଦନ୍ତରୁ ଏହି ଧାନ ଜାମରଣ୍ଡା ପଂଚାୟତ ୟୁଭି-୧୪ର ସରକାରୀ ଟ୍ରେଡର୍ସ ନାମକ ଏକ ଦୋକାନ ଜରିଆରେ କ୍ୱିଟାଲ ପିଛା ୧୬୧୪ ଟଙ୍କା ହାରରେ କିଣାଯାଇଥିବା ଜଣାପଡିଛି । ଯୋଗାଣ ବିଭାଗ ଅଧିକ ଖୋଲତାଡ ଜାରି ରଖିଛି ।