ଶୈବପୀଠ ବେଦବ୍ୟାସ ଧାମ । ଶଙ୍ଖ, ସରସ୍ୱତୀ ଓ କୋଇଲି ନଦୀର ସଙ୍ଗମ ସ୍ଥଳୀ, ଯେଉଁଠି ମହର୍ଷି କୃଷ୍ଣ ଦ୍ୱିପାୟନ ମହାଭାରତର ରଚନା କରିଥିବା କୁହାଯାଉଛି ।
ବ୍ରାହ୍ମଣୀ ନଦୀର ଉତ୍ପତ୍ତି ମଧ୍ୟ ଏହିଠାରୁ ଆରମ୍ଭ ହୋଇ ଧାମରା (ବଙ୍ଗପୋସାଗର) ରେ ଯାଇ ମିଶିଛି। ଯେଉଁଥିପାଇଁ ପବିତ୍ର ସଙ୍ଗମ ସ୍ଥଳ ଭାବେ ପରିଚିତି ଲାଭ କରିବା ସହ ଏହି ଶୈବପୀଠ ର ଯଥେଷ୍ଟ ଖ୍ୟାତି ରହିଛି ।
କନକ ବ୍ୟୁରୋ: ପଶ୍ଚିମ ଓଡିଶାର ଅନ୍ୟତମ ପ୍ରମୁଖ ଶୈବପୀଠ ହେଉଛି ପବିତ୍ର ବେଦବ୍ୟାସ ପୀଠ। ଶଙ୍ଖ, ସରସ୍ୱତୀ ଓ କୋଇଲି ନଦୀର ସଙ୍ଗମ ସ୍ଥଳୀରେ ଏହା ଅବସ୍ଥିତ । ରାଉରକେଲା ଉପକଣ୍ଠରେ ଥିବା ଏହି ପ୍ରସିଦ୍ଧ ଶୈବପୀଠର ଅନେକ ପୌରାଣିକ କିମ୍ବଦନ୍ତୀ ରହିଛି । ଏହାର ପୃଷ୍ଠଭୂମି ମଧ୍ୟ ସର୍ଵଜନ ସ୍ୱୀକୃତ। ମହର୍ଷି କୃଷ୍ଣ ଦ୍ୱିପାୟନ (ବ୍ୟାସଦେବ) ଏଠାରେ ଥିବା ଗୁମ୍ଫାରେ ଅବସ୍ଥାନ କରି ମହାଭାରତ ରଚନା କରିଥିବା କୁହାଯାଏ । ବ୍ରାହ୍ମଣୀ ନଦୀର ଉତ୍ପତ୍ତି ମଧ୍ୟ ଏହିଠାରୁ ଆରମ୍ଭ ହୋଇ ଧାମରା (ବଙ୍ଗପୋସାଗର) ରେ ଯାଇ ମିଶିଛି। ଯେଉଁଥିପାଇଁ ପବିତ୍ର ସଙ୍ଗମ ସ୍ଥଳ ଭାବେ ପରିଚିତି ଲାଭ କରିବା ସହ ଏହି ଶୈବପୀଠ ର ଯଥେଷ୍ଟ ଖ୍ୟାତି ରହିଛି । ସ୍ୱଭାବକବି ଗଙ୍ଗାଧର ମେହେର ଏଠାକୁ ଆସି ନିଜର ଅନୁଭୂତି ତାଙ୍କ କାବ୍ୟ ସଂକଳନ ‘ବେଦବ୍ୟାସ’ ମାଧ୍ୟମରେ ଏହି ପବିତ୍ର ଧାମର ମହିମା ଓ ପ୍ରାକୃତିକ ପରିବେଶ ବାଖ୍ୟା କରିଥିବା ପ୍ରମାଣିକ ତଥ୍ୟ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଐତିହାସିକଙ୍କ ମତରେ ୧୮୯୧ ମସିହାରେ ଯେତେବେଳେ ବେଙ୍ଗଲ ରୁ ନାଗପୁର ରେଳପଥ (ବିଏନଆର୍) ସଂଯୋଗୀକରଣ ହେଲା ସେତେବେଳରୁ ହିଁ ଏଠାରେ ତତ୍କାଳୀନ ନାଗରା ଜମିଦାର ବାଲୁଙ୍କି ସିଂହ ମହାପାତ୍ର (ସିଂହଦେଓ) ଶିବ ମନ୍ଦିର ପ୍ରତିଷ୍ଠା କରିଥିଲେ । ସେବେଠାରୁ ଏହା ବାଲୁଙ୍କେଶ୍ୱର ମହାଦେବ ମନ୍ଦିର ଭାବେ ପ୍ରସିଦ୍ଧି ଲାଭ କରିଛି ।ଶିବରାତ୍ରୀ ପାଳନ ଅବସରରେ ପବିତ୍ର ଜାଗର ମେଳା ହେଉ କି’ ଶ୍ରାବଣ ମାସର ଜଳାଭିଷେକ ପର୍ବ ହେଉ ପବିତ୍ର ବେଦବ୍ୟାସ ଧାମ ଶ୍ରଦ୍ଧାଳୁ ଓ ଭକ୍ତଙ୍କ ସମାଗମରେ ଲୋକାରଣ୍ୟ ହୋଇଥାଏ ।
କେବଳ ସେତିକି ନୁହେଁ, ଏହା ତ୍ରିବେଣୀ ସଙ୍ଗମ ହୋଇଥିବାରୁ ଲୋକେ ଶ୍ରାଦ୍ଧ, ପିଣ୍ଡଦାନ ଓ ଅସ୍ଥି ବିସର୍ଜନ ପାଇଁ ମଧ୍ୟ ଦୂରଦୂରାନ୍ତରୁ ଆସିଥାନ୍ତି । କୁହାଯାଏ ପୁରୀ ସ୍ୱର୍ଗଦ୍ୱାରରେ ଅନ୍ତିମ ସଂସ୍କାର କଲେ ଆତ୍ମାକୁ ମୋକ୍ଷ ମିଳିଥାଏ । ସେହିଭଳି ପବିତ୍ର ବେଦବ୍ୟାସ ଘାଟ ଶଙ୍ଖ, କୋଇଲି ଓ ସରସ୍ୱତୀ ନଦୀର ସଙ୍ଗମ ସ୍ଥଳୀରେ ଥିବାରୁ ପୁଣ୍ୟାତ୍ମା ଅର୍ଜନ ପାଇଁ ଏଠାରେ ପରଲୋକଗତ ସମ୍ପର୍କୀୟଙ୍କ ଅନ୍ତିମ ସଂସ୍କାର କରିବାକୁ ଆଗ୍ରହ ପ୍ରକାଶ କରିଥାନ୍ତି।