କଟକର ସୁନା ଋଣ ସଂସ୍ଥାରେ ରହସ୍ୟମୟ ଲୁଟ । ବନ୍ଧୁକ ଦେଖାଇ ୧୦ ମିନିଟରେ ଲୁଟିନେଲେ ୧୦ କୋଟିରୁ ଅଧିକ ଟଙ୍କା, ୨୦ ମିନିଟ ପୂର୍ବରୁ ଖୋଲିଥିଲା ଶାଖା
କନକ ବ୍ୟୁରୋ : କଟକ ନୟାସଡ଼କ ସ୍ଥିତ ଆଇଆଇଏଫଏଲ ସୁନା ଋଣ ଫାଇନାନ୍ସ କଂପାନୀରେ ଏପରି ଲୁଟ ହୋଇଛି, ଯାହା ବଲଉଡ୍ର ଏକ ରୋମାକାର କାହାଣୀ ଭଳି । ସଂସ୍ଥାର ମ୍ୟାନେଜର ଲୁଟର ଯେଉଁ ଥିଓରୀ ଦେଇଛନ୍ତି, ତାହା ହିନ୍ଦୀ ଫିଲ୍ମର ସ୍କ୍ରିନ୍ ପ୍ଲେ ସହ ଯେତିକି ମେଳ ଖାଉଛି, ସେତିକି ରହସ୍ୟମୟ ମନେ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରତିଦିନ ସକାଳେ ୧୦ ଟାରେ ଆଇଆଇଏଫଏଲ ଖୋଲୁଥିବା ବେଳେ ୨୦ ମିନିଟ ପୂର୍ବରୁ ଖୋଲି ଯାଇଥିଲା ସୁନା ଋଣ ସଂସ୍ଥାର ଗେଟ୍ । ସହଳ ଖୋଲିଥିଲା ଅଫିସ, ଆଉ ଅଫିସ ଖୋଲୁ ଖୋଲୁ ପହଁଚି ଯାଇଥିଲେ ୪ ଜଣ ମୁଖା ପିନ୍ଧା ଡକାୟତ । ହାତରେ ବନ୍ଧୁକ ଥିଲା, କଥା ହେଉଥିଲେ ହିନ୍ଦୀ ଭାଷାରେ । ମ୍ୟାନେଜରଙ୍କ କହିବା ଅନୁସାରେ ସେତେବେଳେ ଜଣେ ହେଲେ ଗ୍ରାହକ ଆସିନଥିଲେ, କେବଳ ୪-୫ ଜଣ କର୍ମଚାରୀ ଅଫିସରେ ପହଁଚିଥିଲେ, ଆଉ କିଛି ବୁଝିବା ପୂର୍ବରୁ କର୍ମଚାରୀଙ୍କୁ ବନ୍ଧୁକ ମୁନରେ ଭୟଭୀତ କରି ଷ୍ଟ୍ରଙ୍ଗ ରୁମରୁ କେଜି କେଜି ସୁନା ଅଳଙ୍କାର ଓ ନଗଦ ୪ ଲକ୍ଷରୁ ଅଧିକ ଟଙ୍କା ଲୁଟି ନେଇଥିଲେ ଡକାୟତ । ଯାହାର ଆନୁମାନିକ ମୂଲ୍ୟ ୧୦ କୋଟିରୁ ଅଧିକ ବୋଲି କୁହାଯାଉଛି ।
ସବୁଠୁ ବଡ଼ ରହସ୍ୟ ହେଉଛି, କଡ଼ା ପହରା ଭିତରେ ରହୁଥିବା ସୁନା ବନ୍ଧକ ନେଇ ଋଣ ଦେଉଥିବା ସଂସ୍ଥାରେ କାମ କରୁନଥିଲା ସିସିଟିଭି, ନିରାପତା ପାଇଁ ରହିଥିବା ସାଇରନ୍ ମଧ୍ୟ ଡାକୟତି ବେଳେ ବାଜି ନଥିଲା । କଟକର ଜନଗହଳିପୂର୍ଣ୍ଣ ଏହି ଅଂଚଳରେ ହୋଇଥିବା ଲୁଟ, ସାରା ସହରରେ ଚାଂଚଲ୍ୟ ଖେଳାଇ ଦେଇଛି । ଘଟଣାସ୍ଥଳରେ ପୋଲିସ କମିସନର ଓ କଟକ ଡିସିପି ପହଁଚି ଘଟଣାର ଯାଂଚ ଆରମ୍ଭ କରିଛନ୍ତି ।
ସଂସ୍ଥାର କର୍ମଚାରୀ ଓ ଆଖପାଖରେ ଥିବା ଦୋକାନର କର୍ମଚାରୀଙ୍କୁ ପଚରାଉଚରା କରାଯାଇଛି । ନିକଟରେ ଥିବା ସିସିଟିଭି ଫୁଟେଜ୍ ଆଧାରରେ ପୋଲିସ ଛାନଭିନ୍ କରୁଛି । ଏପଟେ କଟକ-ପାରାଦୀପ ରାସ୍ତାରେ ବ୍ୟାପକ ଖାନତଲାସୀ କରୁଛି ପୋଲିସ । ଏହି ରହସ୍ୟମୟ ଲୁଟକୁ ନେଇ ସଂଦେହ ବଢ଼ୁଥିବା ବେଳେ କିପରି ବନ୍ଧକ ରଖିଥିବା ସୁନା ଫେରିପାରିବେ, ଏ ନେଇ ଗ୍ରାହକମାନଙ୍କ ମନରେ ଆଶଙ୍କା ପ୍ରକାଶ ପାଇଛି ।