ଯୋଗୀ ଆଦିତ୍ୟନାଥଙ୍କୁ ବି ଭୋଟ ଦେବେ ଅଯୋଧ୍ୟାର ମୁସଲିମ ଭୋଟର । ଜାଣନ୍ତୁ କାହିଁକି ଏମିତି କହିଲେ ଇକବାଲ ଆନସାରୀ ।

କନକ ବ୍ୟୁରୋ : ଉତ୍ତରପ୍ରଦେଶ ନିର୍ବାଚନ ପାଇଁ ତାରିଖ ଘୋଷଣା ପରଠାରୁ ସରଗରମ ହୋଇଛି ରାଜ୍ୟ ରାଜନୀତି । ଆରମ୍ଭ ହୋଇଛି ଆୟାରାମ, ଗୟାରାମ ରାଜନୀତି । ବିଜେପିର କିଛି ମନ୍ତ୍ରୀ ଓ ନେତା ଦଳ ଛାଡିଥିବା ବେଳେ ଅନ୍ୟ ଦଳର ନେତା ମଧ୍ୟ ବିଜେପି ମୁହାଁ ହୋଇଛନ୍ତି । ଆଉ ଏସବୁ ଭିତରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଯୋଧ୍ୟାରୁ ନିର୍ବାଚନ ଲଢିବା ନେଇ ଚର୍ଚ୍ଚା ଆରମ୍ଭ ହୋଇଛି । ଏହି ଚର୍ଚ୍ଚା ଭିତରେ ବାବ୍ରି ମସଜିଦ୍ ପକ୍ଷକାର ଥିବା ଇକବାଲ ଆନସାରୀ କହିଛନ୍ତି, ଯୋଗୀ ଅଯୋଧ୍ୟାକୁ ବିକାଶ ପଥରେ ଆଗକୁ ନେବେ । ଅଯୋଧ୍ୟାର ମୁସଲିମ୍ ଭୋଟର ବି ଯୋଗୀଙ୍କ ସପକ୍ଷରେ ଭୋଟ୍ କରିବେ । କାରଣ ଗତ ୫ ବର୍ଷରେ ଅନେକ ପରିବର୍ତ୍ତନ ଆସିଛି । ବିଜେପି ସରକାରରେ ମୁସଲମାନ ଭାଇ କୌଣସି ସମସ୍ୟାର ସମ୍ମୁଖୀନ ହୋଇନାହାନ୍ତି । ଏହାଛଡା ଏହି ସମୟରେ କୌଣସି ଦଙ୍ଗା ମଧ୍ୟ ହୋଇନାହିଁ । ଅଯୋଧ୍ୟାରେ ଏବେ ବିକାଶ କାମ ଆରମ୍ଭ ହୋଇଛି । ଲୋକେ ଚାହୁଁଛନ୍ତି କି ଯୋଗୀ ଆଦିତ୍ୟନାଥ ଅଯୋଧ୍ୟାରୁ ନିର୍ବାଚନ ଲଢନ୍ତୁ ।

ମିଳିଥିବା ସୂଚନା ମୁତାବକ, ବିଜେପିର କେନ୍ଦ୍ରୀୟ ନିର୍ବାଚନ କମିଟି ଖୁବଶୀଘ୍ର ନିଜ ପ୍ରାର୍ଥୀଙ୍କ ତାଲିକା ଘୋଷଣା କରିବ । କୁହାଯାଉଛି ଯେ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ଦୁଇ ଉପ-ମୁଖ୍ୟମନ୍ତ୍ରୀ ମଧ୍ୟ ଚଳିତଥର ବିଧାନସଭା ନିର୍ବାଚନ ପାଇଁ ମୈଦାନକୁ ଓହ୍ଲାଇବେ । ଯୋଗୀ ଆଦିତ୍ୟନାଥଙ୍କୁ ଅଯୋଧ୍ୟା ଆସନରୁ ଓହ୍ଲାଇପାରେ ଦଳ । ଆଉ ଏହା ଦଳ ପାଇଁ ମଧ୍ୟ ବଡ ଫାଇଦା ଆଣିଦେବ । ଏହାପୂର୍ବରୁ ମଧ୍ୟ ବିଜେପି ନେତା ବିନୟ କଟିୟାର କହି ସାରିଛନ୍ତି ଯଦି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଯୋଧ୍ୟାରୁ ନିର୍ବାଚନ ଲଢନ୍ତି ତେବେ ବଡ ବ୍ୟବଧାନରେ ବିଜୟୀ ହେବେ ।