କନକ ବ୍ୟୁରୋ: ଶାନ୍ତି ଶୃଂଖଳାରେ ସହ ନିର୍ବାଚନ ଶେଷ କରିବାକୁ ପ୍ରଶାସନର ସମସ୍ତ ପ୍ରୟାସ ସତ୍ୱେ ବିଭିନ୍ନ ସ୍ଥାନରୁ ଆସିଛି, ଚିନ୍ତାଜନକ ଖବର । ଦକ୍ଷିଣରୁ ଉତର, ପୂର୍ବରୁ ପଶ୍ଚିମ ସବୁଠି ନିର୍ବାଚନୀ ବେଳେ ହିଂସାକାଣ୍ଡ ଘଟିଛି । ଗଞ୍ଜାମ ଖଲ୍ଲିକୋଟ ପରେ ଏବେ ବରଗଡରୁ ଆସିଛି ହତ୍ୟାକାଣ୍ଡ ଅଭିଯୋଗ । ଅନ୍ୟପଟେ ବ୍ୟକ୍ତିଗତ ଶତ୍ରୁତାରୁ ହତ୍ୟାକାଣ୍ଡ ଘଟିଥିବା ବୋଲି କହିଛି ପ୍ରଶାସନ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ସମୟରେ ଗଞ୍ଜାମ ଖଲ୍ଲିକୋଟ ହତ୍ୟାକାଣ୍ଡ ଘଟଣା ଚର୍ଚ୍ଚା ଥମି ନଥିବାବେଳେ, ବରଗଡରୁ ଆଉ ଏବ ବର୍ବର ହତ୍ୟାକାଣ୍ଡର ଖବର । ବରଗଡ ନିକଟ ସଦର ଥାନା ଅନ୍ତର୍ଗତ ସରସରା ଗାଁ ନିକଟରେ ଘଟିଛି ଏହି ହତ୍ୟାକାଣ୍ଡ । ମୃତକଙ୍କ ନାଁ ବିଶ୍ୱନାଥ ମିର୍ଦ୍ଧା ବୋଲି ଜଣାପଡିଛି । ଅଟୋରେ ଭୋଟରଙ୍କୁ ମତଦାନ କେନ୍ଦ୍ରକୁ ନେବା ଆଣିବା କରୁଥିଲେ ।
ପରିବାର ଲୋକଙ୍କ ଅଭିଯୋଗ ଅନୁସାରେ ମୃତ ବିଶ୍ୱନାଥ ଭୋଟରଙ୍କୁ ଅଟୋରେ ପାଖରେ ଥିବା ମତଦାନ କେନ୍ଦ୍ରକୁ ନେଉଥିଲେ । ସେହି ସମୟରେ ଏକ ଗୋଷ୍ଠୀ ତାଙ୍କୁ ବିରୋଧ କରିବା ସହ ଭୁଜାଲିରେ ଆକ୍ରମଣ କରିଥିଲେ । ଭୁଜାଲି ମାଡରେ ବିଶ୍ୱନାଥ ରକ୍ତ ଜୁଡୁବୁଡୁ ହୋଇଯାଇଥିଲେ । ଆଉ ତାପରେ ତାଙ୍କର ମୃତ୍ୟୁ ହୋଇଛି ।
ଦିନ ଦ୍ୱିପ୍ରହରରେ ବିଶ୍ୱନାଥଙ୍କ ହତ୍ୟାକାଣ୍ଡ ସ୍ଥାନୀୟ ଅଂଚଳରେ ଉତେଜନା ଲାଗି ରହିଛି । ଗ୍ରାମବାସୀ ପ୍ରତିବାଦ କରିଛନ୍ତି । ଅନ୍ୟପଟେ ବରଗଡ ଏସପି ଓ ଆଇଜି ହିମାଂଶୁଲାଲ ଘଟଣାସ୍ଥଳରେ ପହଁଚି ସ୍ଥିତିକୁ ଆୟତ କରିବାକୁ ଉଦ୍ୟମ କରିଛନ୍ତି । ପୋଲିସ ଫୋର୍ସ ପ୍ରତିବାଦକାରୀଙ୍କୁ ଘଟଣାସ୍ଥାଳରୁ ଘଉଡାଇ ଦେଇଛନ୍ତି । ଏପିରିକି କିଛି ଲୋକଙ୍କୁ ବସରେ ବସାଇ ନେଇଥିବା ଦେଖିବାକୁ ମିଳିଛି । ତେବେ ଏହି ହତ୍ୟାକାଣ୍ଡ ବ୍ୟକ୍ତିଗତ ଶତ୍ରୁତାରୁ ଘଟିଛି ବୋଲି ପ୍ରଶାସନ ପକ୍ଷରୁ କୁହାଯାଇଛି ।
ଏପଟେ ବିଶ୍ୱନାଥଙ୍କ ମୃତ୍ୟୁକୁ ନେଇ ବିଜେପି ଶାସକ ଦଳକୁ ଘେରିଛି । ବିଶ୍ୱନାଥ ବିଜେପିର କର୍ମୀ ଥିଲେ ବୋଲି ଦାବି କରିବା ସହ ବୁଥ ଠାରୁ ମାତ୍ର ୩ଶହ ମିଟର ଦୂରରେ କେମିତି ହତ୍ୟା କରାଗଲା ବୋଲି ଅଭିଯୋଗ କରିଛନ୍ତି । ନିର୍ବାଚନ ସମୟରେ ଏଭଳି ହତ୍ୟାକାଣ୍ଡ ବରଗଡ ଜିଲ୍ଲା ସମେତ ସାରାରାଜ୍ୟରେ ଚାଂଚଲ୍ୟ ଖେଳାଇ ଦେଇଛି ।