ଚିଠିକୁ ନେଇ ମହାରାଷ୍ଟ୍ର ରାଜନୀତି ସରଗରମ । ଅନୀଲ ଦେଶମୁଖଙ୍କ ବିରୋଧରେ ପୂର୍ବତନ ମୁମ୍ବାଇ ପୋଲିସ କମିଶନର ପରମବୀର ସିଂଙ୍କ ସାଂଘାତିକ ଅଭିଯୋଗ । ପଢ଼ନ୍ତୁ ପୂରା କାହାଣୀ…
କନକ ବ୍ୟୁରୋ: ଗୋଟିଏ ଚିଠିକୁ ନେଇ ମହାରାଷ୍ଟ୍ର ରାଜନୀତିରେ ହଇଚଇ । ମହାରାଷ୍ଟ୍ରର ପୂର୍ବତନ ପୁଲିସ କମିସନର ପରମବୀରଙ୍କ ଚିଠି । ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ପାଖକୁ ପରମବୀର ସିଂ ଚିଠି ଲେଖି ଗୃହମନ୍ତ୍ରୀଙ୍କ ନାଁରେ ସଙ୍ଗୀନ ଅଭିଯୋଗ ଆଣିଛନ୍ତି । ଆଉ ପରମବୀରଙ୍କ ଚିଠିକୁ ନେଇ ଏବେ ମହାରାଷ୍ଟ୍ର ରାଜନୀତି ଦୋହଲି ଯାଇଛି । ଅନ୍ୟପଟେ ପରମବୀର ସିଂଙ୍କ ଅଭିଯୋଗ ପରେ ବିବାଦରେ ଛନ୍ଦି ହୋଇଯାଇଛନ୍ତି ମହାରାଷ୍ଟ୍ର ଗୃହମନ୍ତ୍ରୀ ଅନୀଲ ଦେଶମୁଖ । ଏନେଇ ପ୍ରତିକ୍ରିୟା ଦେଇ ଦେଶମୁଖ କହିଛନ୍ତି ପରମବୀର ସିଂଙ୍କ ନାମରେ ସେ ମାନହାନୀ ମକଦ୍ଦମା କରିବେ । ପରମବୀର ସିଂ ଆଣିଥିବା ଅଭିଯୋଗ ସଂପୂର୍ଣ୍ଣ ମିଛ । ସେ ଆଣିଥିବା ଅଭିଯୋଗକୁ ତାଙ୍କ ପ୍ରମାଣ କରିବାକୁ ପଡିବ ବୋଲି କହିଛନ୍ତି ମହାରାଷ୍ଟ୍ର ଗୃହମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ତେବେ ପୂର୍ବତନ ମୁମ୍ବାଇ ପୁଲିସ କମିସନର ପରମବୀର ସିଂ ଉଦ୍ଧବ ଠାକରେଙ୍କୁ ଲେଖିଥିବା ଚିଠିରେ ସଚିନ ୱାଜେଙ୍କୁ ମାସିକ ଶହେ କୋଟି ଟଙ୍କା ଅସୁଲ କରିବା ପାଇଁ ମହାରାଷ୍ଟ୍ର ଗୃହମନ୍ତ୍ରୀ ଟାର୍ଗେଟ ଦେଇଥିବା ଭଳି ସାଂଘାତିକ ଅଭିଯୋଗ ରହିଛି । ସଚିନ ୱାଜେଙ୍କୁ ଅନିଲ ଦେଶମୁଖ ଶହେ କୋଟି ଟଙ୍କା ଆଦାୟ କରି ଦେବା ପାଇଁ କହିଥିବା ଚିଠିରେ ଉଲ୍ଲେଖ କରିଛନ୍ତି । ସଚିନ ୱାଜେ ହେଉଛନ୍ତି ସେହି ତଦନ୍ତକାରୀ ପୁଲିସ ଅଧିକାରୀ, ଯିଏ ଶିଳ୍ପପତି ମୁକେଶ ଅମ୍ବାନୀଙ୍କ ଘର ବାହାରୁ ବିସ୍ଫୋରକ ଭର୍ତ୍ତି କାର ମିଳିବା ଘଟଣାରେ ଗିରଫ ହୋଇଛନ୍ତି ।
ସବୁଠାରୁ ବଡ଼ କଥା ହେଲା, ସଚିନ ୱାଜେ ଗିରଫ ପରେ ଏଇ ନିକଟରେ ପରମବୀର ସିଂଙ୍କୁ ମୁମ୍ବାଇ ପୋଲିସ କମିଶନର ପଦରୁ ବଦଳି କରାଯାଇଛି । ଏହାପରେ ଶନିବାର ଦିନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚିଠି ଲେଖିଛନ୍ତି ପରମବୀର । ସେପଟେ ଅନୀଲ ଦେଶମୁଖ କହିଛନ୍ତି, ଯଦି ପରମବୀର ସିଂଙ୍କୁ ସବୁ କଥା ଜଣାଥିଲା, ତେବେ ଏତେ ଦିନ କାହିଁକି ଚୁପ ରହିଥିଲେ ।