ମାଲେଗାଓଁ ବିସ୍ପୋରଣ ମାମଲା । ବିଜେପି ସାଂସଦ ପ୍ରଜ୍ଞା ଠାକୁରଙ୍କ ବିରୋଧରେ ୱାରେଣ୍ଟ ଜାରି
କନକ ବ୍ୟୁରୋ : ମାଲେଗାଓଁ ବିସ୍ଫୋରଣ ମାମଲାରେ କୋର୍ଟରେ ହାଜର ନ ହେବା କାରଣରୁ ମୁମ୍ବାଇର ଏନଆଇଏ ଅଦାଲତ ଭାରତୀୟ ଜନତା ପାର୍ଟିର ସାଂସଦ ପ୍ରଜ୍ଞା ଠାକୁରଙ୍କ ବିରୋଧରେ ୱାରେଣ୍ଟ ଜାରି କରିଛନ୍ତି । ସ୍ପେଶାଲ ଏନଆଇଏ କୋର୍ଟ ପ୍ରଜ୍ଞା ଠାକୁରଙ୍କ ସମେତ ଅନ୍ୟ ଅଭିଯୁକ୍ତଙ୍କ କୋର୍ଟ ଦ୍ୱାରା ଧାର୍ଯ୍ୟ କରାଯାଇଥିବା ତାରିଖରେ କୋର୍ଟରେ ହାଜର ହୋଇ ବୟାନ ରେକର୍ଡ କରିବାକୁ ନିର୍ଦ୍ଦେଶ ଦିଆଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରଜ୍ଞା ଠାକୁରଙ୍କ ଓକିଲ ମେଡିକାଲ ଆଧାରରେ କୋର୍ଟରେ ହଜାର ହେବା ନେଇ ଦିଆଯାଇଥିବା ନିର୍ଦ୍ଦେଶ ମୁତାବକ ତାରିଖ ଘୁଂଚାଇବାକୁ ଆବେଦନ କରିଥିଲେ । ଏହା ପରେ କୋର୍ଟ ଏହି ଆବେଦନକୁ ଖାରଜ କରି କୋର୍ଟରେ ଉପସ୍ଥିତ ହେବାକୁ ଏକ ୱାରେଣ୍ଟ ଜାରି କରିଥିଲେ । ଏଥିରେ କୁହାଯାଇଛି କି ୨୦୨୪ ମାର୍ଚ୍ଚ ୨୦ ତାରିଖ ସୁଦ୍ଧା କୋର୍ଟରେ ହାଜର ହେବାକୁ ପଡିବ ।
ଋିପୋର୍ଟ ମୁତାବକ ପ୍ରଜ୍ଞା ଠାକୁର ଓ ଅନ୍ୟ ଅଭିଯୁକ୍ତଙ୍କ ଉପରେ ଦେଶଦ୍ରୋହ ଓ ଆଇପିସିର ଅନ୍ୟ ପ୍ରାବଧାନ ମୁତାବକ ମାମଲା ଚାଲିଛି । ରାଷ୍ଟ୍ରୀୟ ଯାଂଚ ଏଜେନ୍ସି ଏନଆଇଏ ଏହି କ୍ରମରେ ବର୍ତମାନ ସିଆରପିସି ଆଧାରରେ ଅଭିଯୁକ୍ତଙ୍କ ବୟାନ ରେକର୍ଡ କରୁଛି । ହେଲେ ପ୍ରଜ୍ଞା ଠାକୁର ନିଜ ବୟାନ ରେକର୍ଡ କରିବାକୁ କୋର୍ଟରେ ଅନୁପସ୍ଥିତ ରହିବାରୁ ଜଷ୍ଟିସ ଏ.କେ ଲାହୋଟୀ ସୋମବାର ଦିନ ପ୍ରଜ୍ଞା ଠାକୁରଙ୍କ ବିରୋଧରେ ୧୦ ହଜାର ଟଙ୍କାର ୱାରେଣ୍ଟ ଜାରି କରିଛନ୍ତି । ଏଥିରେ ନିର୍ଦ୍ଦେଶ ଦିଆଯାଇଛି କି, ପ୍ରଜ୍ଞା ଠାକୁର ମାର୍ଚ୍ଚ ୨୦ ତାରିଖ ସୁଦ୍ଧା କୋର୍ଟରେ ହାଜର ହେବାକୁ ପଡିବ ।
ଗତମାସରେ କୋର୍ଟ ପ୍ରଜ୍ଞା ଠାକୁରଙ୍କୁ ଚେତାବନୀ ଦେଇଥିଲେ କି, ସେ ଯଦି କୋର୍ଟରେ ହାଜର ନ ହେବେ ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ୨୦୦୮ ସେପ୍ଟେମ୍ବର ୨୯ ତାରିଖରେ ମୁମ୍ବାଇରୁ ୨୦୦ କିଲୋମିଟର ଦୂର ମାଲେଗାଓଁର ଏକ ମସଜିଦ ନିକଟରେ ଭୟଙ୍କର ବିସ୍ଫୋରଣ ହୋଇଥିଲା । ଏଥିରେ ୬ଜଣଙ୍କର ମୃତ୍ୟୁ ହୋଇଥିଲା । ଏହାସହ ୧୦୦ ରୁ ଅଧିକ ଲୋକ ଆହାତ ହୋଇଥିଲେ । ଏହି ମାମଲାରେ ପ୍ରଜ୍ଞା ସିଂ ଠାକୁର ଓ ଅନ୍ୟ କିଛି ଲୋକଙ୍କ ନାମରେ ମାମଲା ରୁଜୁ ହୋଇଥିଲା ।