କନକ ବ୍ୟୁରୋ: ଆଗାମୀ ଆଇପିଏଲ ସିଜିନ୍ ଖେଳିବେ ତ ଧୋନୀ? ମାହିଙ୍କ ସହ ପଡିଆକୁ ଓହ୍ଲାଇବ ତ ଚେନ୍ନାଇ ସୁପର କିଙ୍ଗସ୍? ଏହିଭଳି ଅନେକ ପ୍ରଶ୍ନ ଏବେ ବି କ୍ରିକେଟ ଜଗତରେ ଚର୍ଚ୍ଚାର ବିଷୟ ପାଲଟିଛି । ଆଉ ଏହାରି ଭିତରେ ଆଇପିଏଲରୁ ଅବସର ନେଇ ବଡ ବୟାନ ରଖିଛନ୍ତି କ୍ୟାପଟେନ୍ କୁଲ୍ ମହେନ୍ଦ୍ର ସିଂହ ଧୋନୀ ।
Kanak News is now on WhatsApp
Join and get latest news updates delivered to you via WhatsApp
ଚଳିତ ବର୍ଷ ଆଇପିଏଲ୍ ଚାମ୍ପିୟନ ହେବା ପରେ ଶନିବାର ସିଏସକେ ଚେନ୍ନାଇରେ ନିଜର ବିଜୟ ଉତ୍ସବ ପାଳନ କରିଥିଲା । ଏଥିରେ ଦଳର ମାଲିକ, ତାମିଲନାଡୁ ମୁଖ୍ୟମନ୍ତ୍ରୀଙ୍କ ସହ ବହୁ ମାନ୍ୟଗଣ୍ୟ ବ୍ୟକ୍ତି ବିଶେଷ ଯୋଗ ଦେଇଥିଲେ । ଆଉ ଏହି ଉତ୍ସବର ସଭାରେ ଧୋନୀ ନିଜର ଅବସରକୁ ନେଇ ରଖିଥିବା ପ୍ଲାନ ବିଷୟରେ ଖୁଲାସା କରିଥିଲେ ।
ଧୋନୀ କହିଥିଲେ, ସେ ନିଜର ଶେଷ ଟି-୨୦ ମ୍ୟାଚ୍ ଚେନ୍ନାଇରେ ହିଁ ଖେଳିବେ । କ୍ୟାପଟେନ୍ ହିସାବରେ ସେ ସବୁବେଳେ ନିଜ କ୍ରିକେଟକୁ ପ୍ଲାନ ସହକାରେ ଖେଳିଆସିଛନ୍ତି । ଯେଉଁ କାରଣରୁ ରାଞ୍ଚିରେ ସେ ତାଙ୍କର ଶେଷ ଦିନିକିଆ ମ୍ୟାଚ୍ ଖେଳିଥିଲେ । ସେହିପରି ତାଙ୍କର ଶେଷ ଟି-୨୦ ମ୍ୟାଚ୍ ଚେନ୍ନାଇରେ ହେବ ବୋଲି ଧୋନୀ ପ୍ରତିଶ୍ରୁତି ଦେଇଛନ୍ତି । ତେବେ ଏହି ଶେଷ ଟି-୨୦ ମ୍ୟାଚ୍ କେବେ ହେବ ତାହା ସ୍ପଷ୍ଟ କରିନାହାଁନ୍ତି ଧୋନୀ । ଏହା ଆସନ୍ତାବର୍ଷ କିମ୍ବା ୫ ବର୍ଷ ପରେ ମଧ୍ୟ ହୋଇପାରେ ବୋଲି କହିଛନ୍ତି କ୍ୟାପଟେନ୍ କୁଲ୍ ।
A promise from #Thala…#Anbuden awaiting… 💛🦁#WhistlePodu #Yellove pic.twitter.com/zGKvtRliOY
— Chennai Super Kings – Mask P😷du Whistle P🥳du! (@ChennaiIPL) November 20, 2021
ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିସାରିଛନ୍ତି ମାହି । ହେଲେ ଏବେ ବି ସେ ଚେନ୍ନାଇ ତରଫରୁ ଆଇପିଏଲ୍ ଖେଳିଆସୁଛନ୍ତି । ତାଙ୍କ ନେତୃତ୍ୱରେ ଚଳିତ ଥର ଚେନ୍ନାଇ ସୁପର କିଙ୍ଗସ୍ ଚତୁର୍ଥ ଥର ପାଇଁ ଆଇପିଏଲ୍ ଟ୍ରଫି ମଧ୍ୟ ଜିତିଛି । ହେଲେ ଆଗାମୀ ବର୍ଷ ଧୋନୀ ଚେନ୍ନାଇ ଦଳ ସହିତ ରହିବେ, ନାଁ ମେଗା ଅକ୍ସନରେ ନୂଆ ଟିମ୍ ସହ ସାମିଲ ହେବେ ତାକୁ ନେଇ ଏକପ୍ରକାରର ଦ୍ୱନ୍ଦ୍ୱ ଲାଗି ରହିଛି ।
ଆସନ୍ତାବର୍ଷ ଆଇପିଏଲରେ ମେଗା ଅକ୍ସନ ହେବାକୁ ଯାଉଛି । ଯେଉଁଥିରେ ପ୍ରତ୍ୟେକ ଦଳ କେବଳ ୪ ଜଣ ଖେଳାଳିଙ୍କୁ ରିଟେନ୍ କରିପାରିବେ । ତେବେ ସିଏସକେ ଯଦି ଧୋନୀଙ୍କୁ ରିଟେନ୍ ରଖୁଛି, ତେବେ ଦଳକୁ ସେତେଟା ଲାଭ ନମିଳିପାରେ ବୋଲି କୁହାଯାଉଛି । ହେଲେ ଟିମ୍ ମ୍ୟାନେଜମେଣ୍ଟ ଧୋନୀଙ୍କୁ ହିଁ ରିଟେନ୍ ରଖିବେ ବୋଲି କହିଆସୁଛନ୍ତି । ଏପରି ସ୍ଥିତିରେ ଦେଖିବାକୁ ବାକି ଅଛି ଯେ, ସିଏସକେ ଧୋନୀଙ୍କୁ ରିଟେନ୍ ରଖୁଛି କି ନାହିଁ ଏବଂ ଧୋନୀ କେବେ ଆଇପିଏଲକୁ ଅଲବିଦା କହୁଛନ୍ତି ।