କ୍ରିକେଟରରୁ କୃଷକ ଆଡକୁ ମନବଳାଇଲେ କ୍ୟାପଟେନ୍ କୁଲ୍ : ପ୍ରଥମେ ଭାରତୀୟ ସେନାରେ ଯବାନ୍ ଏବେ କିଷାନ୍ , ନୂଆ ଅନ୍ଦାଜରେ ପ୍ରଶଂସକଙ୍କ ମନ ଜିଣିଲେ ମାହି । ଦେଖନ୍ତୁ ଭିଡ଼ିଓ
କ୍ୟାପଟେନ୍ କୁଲଙ୍କ ନୂଆଁ ଅନ୍ଦାଜ୍ । ହାତରେ ଟ୍ରାକ୍ଟରର ଷ୍ଟିୟରିଂ ଧରି ଜମିରେ ଚାଷ କରୁଛନ୍ତି ମାହି । କ୍ରିକେଟରରୁ କୃଷକ ଆଡକୁ ମନବଳାଇଛନ୍ତି ଧୋନି । ଟିମ୍ ଇଣ୍ଡିଆର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କ ନୂତନ ନିଶା ପାଲଟିଛି କୃଷି । ପ୍ରାୟ ବର୍ଷେ ଧରି ନିଜକୁ କ୍ରିକେଟ୍ ଠାରୁ ଦୂରେଇ ରଖିଥିବା ଧୋନି ଶେଷଥର ପାଇଁ ନ୍ୟୁଜିଲାଣ୍ଡ ବିପକ୍ଷରେ ଖେଳିଥିଲେ । ୨୦୧୯ ବିଶ୍ୱକପ୍ ସେମିଫାଇନାଲରେ ଖେଳିବା ପରେ ତାଙ୍କୁ ଆଉ ତାଙ୍କର ପ୍ରିୟ ୨୨ ଗଜର କ୍ରିକେଟ୍ କ୍ରିଜ୍ ଭିତରେ ଦେଖିବାର ସୁଯୋଗ ପାଇନାହାନ୍ତି ପ୍ରଶଂସକ । ତଥାପି କୌଣସି ନା କୌଣସି କାରଣରୁ କ୍ୟାପଟେନ୍ କୁଲ୍ ଚର୍ଚ୍ଚାର ପରିସରକୁ ଆସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଧୋନିଙ୍କୁ ଆଉ କ୍ରିକେଟ୍ ମଇଦାନରେ ଦେଖିବାକୁ ମିଳିବ ନା ନାହିଁ ଏନେଇ ଫ୍ୟାନ୍ସଙ୍କ ମଧ୍ୟରେ ଅନେକ କଳ୍ପନାଜଳ୍ପନା ଲାଗିରହିଛି । ଶୁଣାଯାଉଛି ଯେ ଟିମ୍ ଇଣ୍ଡିଆ ପାଇଁ ନଖେଳିଲେ ମଧ୍ୟ ୨୦୨୦ ଆଇପିଏଲ୍ ଲିଗରେ ଚେନ୍ନାଇ ସୁପର୍ କିଙ୍ଗସର କ୍ୟାପଟେନ୍ କୁଲ୍ ଛକା ଚଉକା ଲଗାଇ ଫ୍ୟାନ୍ସଙ୍କୁ ଦିୱାନା କରିବେ । ତେବେ ଏନେଇ ମଧ୍ୟ ଏକ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି । କୋଭିଡ଼୍ – ୧୯ କାରଣରୁ ଦୁଇ ଦୁଇଥର ସ୍ଥଗିତ ହୋଇଥିବା ଆଇପିଏଲ୍ ଲିଗ୍ ଆଗକୁ ହେବ କି ନାହିଁ ତାହା ସନ୍ଦେହ ଘେରରେ ଅଛି । ଏଭଳି ଅନିଶ୍ଚିତତା ଭିତରେ ମାହିଙ୍କ ଏକ ଭିଡ଼ିଓ ସୋସିଆଲ୍ ମିଡ଼ିଆରେ ଖୁବ୍ ଭାଇରାଲ୍ ହେଉଛି । ଯାହା ତାଙ୍କ ପ୍ରଶଂସକଙ୍କୁ ଖୁବ୍ ଆନନ୍ଦ ଦେଇଛି । ୨୨ ଗଜର ପଡିଆକୁ ଛାଡ଼ି ମାହିଙ୍କୁ ୨୨ ଏକରର ଜମିରେ ଚାଷ କରୁଥିବା ଦେଖୁବାକୁ ମିଳିଛି । ଜନ୍ମସ୍ଥାନ ରାଞ୍ଚି ସ୍ଥିତ ନିଜ ଫାର୍ମହାଉସରେ ଟ୍ରାକ୍ଟର ଚଳାଇ ଜୈବଚାଷ କରୁଛନ୍ତି ଧୋନି । ପୂର୍ବରୁ ଭାରତୀୟ ସେନାରେ ଯବାନ୍ ଆଉ ଏବେ କିଷାନ୍ । ଧୋନିଙ୍କ ଏଭଳି ସଉକ୍ ଦେଖି ଫ୍ୟାନ୍ସମାନେ ଆହୁରି ତାଙ୍କ ନିକଟତର ହେଉଛନ୍ତି । ଆଉ ନିଜ ପ୍ରିୟ କ୍ରିକେଟରଙ୍କୁ ଏଭଳି ନୂଆ ଅନ୍ଦାଜରେ ଦେଖି ଖୁବ୍ ଖୁସି ହୋଇଛନ୍ତି ପ୍ରଶଂସକ ।