ପୁଲିସ ଇନ୍ସପେକ୍ଟର ବନିଲେ ସାଂସଦ, ଡିଏସପିକୁ ଦେଖିବା କ୍ଷଣି କଲେ ସାଲ୍ୟୁଟ୍ । ଲୋକେ ହେଲେ ଆଶ୍ଚର୍ଯ୍ୟ
ଗଣତନ୍ତ୍ରର ସବୁଠାରୁ ଭଲ କଥା ଏହା ଯେ, ଜନତା ଯାହାକୁ ଚାହିଁବେ ତାକୁ ଶାସନ ଗାଦିରେ ବସାଇପାରିବେ । ଏଠି ସବୁ କ୍ଷମତା ଜନତାଙ୍କ ପାଖରେ ଥାଏ । ଆନ୍ଧ୍ର ପ୍ରଦେଶରେ ଆଶ୍ଚର୍ଯ୍ୟଜନକ ଦୃଶ୍ୟ ଦେଖିବାକୁ ମିଳିଛି । ଏଠି ଜଣେ ସାଂସଦ ଜନତାଙ୍କ ସମର୍ଥନରେ ସାଂସଦ ହୋଇଛନ୍ତି । ସାଂସଦ ହେବା ପରେ ତାଙ୍କ ସାକ୍ଷାତ ସେହି ଜିଲ୍ଲାର ଡିଏସପିଙ୍କ ସହ ହୋଇଥିଲା । ସେ ସମୟ ନଷ୍ଟ ନକରି ସାଙ୍ଗେ ସାଙ୍ଗେ ତାଙ୍କୁ ସାଲ୍ୟୁଟ୍ କରିଥିଲେ । ସାଂସଦ ହେବା ପୂର୍ବରୁ ପୁଲିସ ଇନ୍ସପେକ୍ଟରଙ୍କ ମୁଖ୍ୟ ଏହି ଡିଏସପି ଥିଲେ ।
Kanak News is now on WhatsApp
Join and get latest news updates delivered to you via WhatsApp
ଲୋକସଭା ନିର୍ବାଚନ ୨୦୧୯ରେ ଆନ୍ଧ୍ର ପ୍ରଦେଶର ହିନ୍ଦୁପୁର ଲୋକସଭା ସିଟରୁ ୱାଇଏସଆର କଂଗ୍ରେସ ଏହି ଅଂଚଳର ପୁଲିସ ଇନ୍ସପେକ୍ଟର ଗୋରନ୍ତା ମାଧବଙ୍କୁ ଟିକେଟ୍ ଦେଇଥିଲା । ଗୋରନ୍ତା ନିର୍ବାଚନ ଜିତିଗଲେ । ଏବେ ସେ ଇନ୍ସପେକ୍ଟର ନୁହେଁ, ସେହି ଅଂଚଳର ସାଂସଦ । ସାଂସଦ ହେବା ପରେ ଗୋରନ୍ତା କୌଣସି କାମରେ ସରକାରୀ କାର୍ଯ୍ୟାଳୟ ପହଂଚିଥିଲେ । ସେଠି ତାଙ୍କ ସାକ୍ଷାତ ଜିଲ୍ଲାରେ ନିଯୁକ୍ତ ଥିବା ଡିଏସପି ମହବୁବ ବାସାଙ୍କ ସହ ହେଲା । ଡିଏସପିଙ୍କୁ ଦେଖିବା କ୍ଷଣି ଗୋରନ୍ତା ଆଲର୍ଟ ହୋଇଗଲେ ଓ ଡିଏସପି ମହବୁବା ବାସାଙ୍କୁ ସାଲ୍ୟୁଟ୍ କଲେ । ଏହି ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏବେ ମହବୁବା ବାସା ସିଆଇଡି ବିଭାଗରେ ଡିଏସପି ଅଛନ୍ତି । ଗୋରନ୍ତା ମାଧବ ଅନନ୍ତପୁର ଜିଲ୍ଲାରେ ପୂର୍ବତନ ସର୍କଲ ଇନ୍ସପେକ୍ଟର ଥିଲେ । ଉଭୟେ ଉଭୟଙ୍କୁ ସାଲ୍ୟୁଟ୍ କରିଥିଲେ । ଗୋରନ୍ତା ମାଧବ କହନ୍ତି କି, “ସାଂସଦ ହେବା ଭିନ୍ନ କଥା । କିନ୍ତୁ ଡିଏସପି ସାର୍ ମୋର ପୁରୁଣା ବସ୍, ଆମେ ଉଭୟେ ଉଭୟଙ୍କୁ ସମ୍ମାନ କରୁ ଓ କରୁଥିବୁ ।”