ଉତ୍ତର ପ୍ରଦେଶ ବିଜେପିରେ ଆଉଜଣେ ବିଦ୍ରୋହୀ ସାଂସଦ, ପୁଅକୁ ଟିକେଟ ଦେବାକୁ ନେଇ କହିଲେ ଏଭଳି କଥା
କନକ ବ୍ୟୁରୋ : ଉତ୍ତ ପ୍ରଦେଶରେ ବିଧାନସଭା ନିର୍ବାଚନ ତାରିକ ଯେତେ ପାଖେଇ ଆସୁଛି ବିଜେପିରେ ବିଦ୍ରୋହୀମାନଙ୍କ ସଂଖ୍ୟା ବଢିବାରେ ଲାଗିଛି । ଗଣ୍ଡା ଗଣ୍ଡା ବିଧାୟକ ଓ ମନ୍ତ୍ରୀ ଦଳ ଛାଡିସାରିଥିବା ବେଳେ ଏବେ ପୁଣିଜଣେ ବିଜେପି ସାଂସଦ ଦଳ ଛାଡିବାକୁ ମୁଣ୍ଡ ଟେକିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୋଟେପଟେ ବିଜେପି ବାରମ୍ବାର ସମାଜବାଦୀ ପାର୍ଟି ଉପରେ ପରିବାରବାଦର ଅଭିଯୋଗ ଆଣୁଥିବା ବେଳେ ଏବେ ଖୋଦ ବିଜେପି ସାଂସଦ ରୀତା ବହୁଗୁଣା ଜୋଶୀ ନିଜ ପୁଅକୁ ବିଜେପିରୁ ବିଧାୟକ ପ୍ରାର୍ଥୀ କରିବାକୁ ଅଡି ବସିଛନ୍ତି । ସେ କହିଛନ୍ତି କି ମୋ ପୁଅ ୧୨ ବର୍ଷ ହେବ ବିଜେପି ପାଇଁ କାମ କରୁଛି ତେଣୁ ଟିକେଟ ମାଗିବାର ଅଧିକାର ତାର ରହିଛି ।
ସେ କହିଛନ୍ତି କି ତାଙ୍କ ପୁଅ ଲକ୍ଷନୌର କେଣ୍ଟ ବିଧାନସଭା ଆସନ ପାଇଁ ଦଳକୁ ଟିକେଟ ମାଗିଛି । ଯଦି ପାର୍ଟି ତାଙ୍କ ପୁଅକୁ ଟିକେଟ ଦିଏ ତା ବଦଳରେ ସେ ସାଂସଦ ପଦ ଛାଡିବାକୁ ରାଜି ଅଛନ୍ତି । ଏକଥା ସେ ବିଜେପି ନେତୃତ୍ୱଙ୍କୁ କହିଥିବା କଥା ବି କହିଛନ୍ତି ।
ରୀତା କହିଛନ୍ତି କି ଯଦି ପାର୍ଟି ନିୟମ କରିଛି କି ପରିବାରରୁ ଜଣଙ୍କୁ ଟିକେଟ ଦେବ ତେବେ ମୋ ପୁଅକୁ ବିଜେପି ଟିକେଟ ଦେଲେ ମୁଁ ସାଂସଦ ପଦ ଛାଡିଦେବି ଓ ୨୦୨୪ ରେ ବି ଲୋକସଭା ନିର୍ବାଚନ ଲଢିବି ନାହିଁ ।
କହିରଖୁ କି ଉତ୍ତର ପ୍ରଦେଶ ନିର୍ବାଚନରେ ବିଜେପିର ଅନେକ ନେତା ସେମାନଙ୍କ ପୁଅ କିମ୍ବା ଝିଅକୁ ରାଜନୈତିକ ମଇଦାନକୁ ଆଣିବାକୁ ଇଚ୍ଛା ପ୍ରକାଶ କରିଛନ୍ତି । ଅନ୍ୟପଟେ ରୀତା ବହୁଗୁଣା ତାଙ୍କ ପୁଅଙ୍କୁ କେଣ୍ଟ ଆସନରୁ ଏଥିପାଇଁ ନିର୍ବାଚନ ଲଢାଇବାକୁ ଚାହୁଁଛନ୍ତି କି ରୀତା ନିଜେ ସେହି ଆସନରୁ ଦୁଇଥର ବିଧାୟକ ଭାବେ ବିଜୟୀ ହୋଇଥିଲେ ।
ସେହିଭଳି ସେଲମପୁର ଲୋକସଭା ଆସନରୁ ସାଂସଦ ଥିବା ରବିନ୍ଦ୍ର କୁଶୱାହା ନିଜ ସାନ ଭାଇକୁ ଭାଟପାରଶାନୀ ଆସନରୁ ବିଧାୟକ ଭାବେ ପ୍ରାର୍ଥୀ କରିବାକୁ ଦାବି କରିଛନ୍ତି । ଏହାରି ଭିତରେ ଦେଖିବାକୁ ବାକି ରହିଲା କି ଏମାନଙ୍କୁ ସନ୍ତୋଷ୍ଟ କରିବାକୁ ବିଜେପି ଏମାନଙ୍କ କଥା ମାନୁଛି ନା ଏମାନେ ନିଜ ଉତ୍ତରାଧିକାରୀଙ୍କୁ ପ୍ରାର୍ଥୀ କରାଇନପାରିବା ଦୁଃଖରେ ଦଳ ଛାଡୁଛନ୍ତି ।