ଇତିହାସ ରଚିଲେ ଦୃଷ୍ଟି ବାଧିତ ୪୬ ବର୍ଷିୟ ଝାଙ୍ଗ ହୋଙ୍ଗ୍ । ଏସିଆର ପ୍ରଥମ ଦୃଷ୍ଟି ବାଧିତ ଭାବେ ଏଭେରେଷ୍ଟ ଚଢି କଲେ ରେକର୍ଡ ।
କନକ ବ୍ୟୁରୋ : ଇଚ୍ଛାଶକ୍ତି ଦୃଢଥିଲେ ଦୁନିଆର କୌଣସି ବି କାର୍ଯ୍ୟ ଅସମ୍ଭବ ନୁହେଁ । ଏହା ପ୍ରମାଣ କରି ଦେଖାଇଛନ୍ତି ଚୀନର ଦୃଷ୍ଟିବାଧିତ ୪୬ ବର୍ଷିୟ ଝାଙ୍ଗ ହୋଙ୍ଗ । ଦୁନିଆର ସବୁଠାରୁ ଉଚ୍ଚ ମାଉଣ୍ଟ ଏଭେରେଷ୍ଟ ଉପରକୁ ଚଢିଥିବା ଦୃଷ୍ଟିହୀନ ବ୍ୟକ୍ତିଙ୍କ ମଧ୍ୟରେ ହୋଙ୍ଗ୍ ବିଶ୍ୱର ତୃତୀୟ ଓ ଏସିଆ ମହାଦେଶର ପ୍ରଥମ ବ୍ୟକ୍ତି । ଏହି ଅଭିଯାନରେ ତାଙ୍କ ସହ ତାଙ୍କର ୩ ଜଣ ଗାଇଡ୍ ମଧ୍ୟ ଥିଲେ ।
Kanak News is now on WhatsApp
Join and get latest news updates delivered to you via WhatsApp
ଚୀନର ଦକ୍ଷିଣ ପଶ୍ଚିମ ସହ ଚୈଙ୍ଗାକିଙ୍ଗରେ ଜନ୍ମ ଗ୍ରହଣ କରିଥିବା ଝାଙ୍ଗ ୨୧ ବର୍ଷ ବୟସରେ ଗ୍ଲୋକୋମା କାରଣରୁ ଦୃଷ୍ଟିଶକ୍ତି ହରାଇଥିଲେ । ଅର୍ଥାତ ୨୫ ବର୍ଷ ହେବ ସେ ଦୁନିଆକୁ ଦେଖିବାରୁ ବଞ୍ଚିତ ହୋଇଛନ୍ତି । ତଥାପି ୮,୮୪୯ ମିଟର ଉଚ୍ଚ ପାହାଡ ଚଢିବା ତାଙ୍କ ପାଇଁ ଏକ ବଡ ଉପଲବ୍ଧି ।
ଏନେଇ ହୋଙ୍ଗ୍ କହିଛନ୍ତି କି ଏହା କେବେ ଫରକ ପଡିବ ନାହିଁ ଆପଣ ଦିବ୍ୟାଙ୍ଗ କି ସମାନ୍ୟ, ଆପଣଙ୍କ ଆଖିକୁ ଦେଖାଯାଉଛି କି ନାହିଁ, ଆପଣଙ୍କ ହାତ କାମ କରୁଛି କି ନାହିଁ । ଯଦି ଆପଣଙ୍କ ମନୋବଳ ଦୃଢ ରହିଛି ତ ଆପଣ ତାହା ହାସଲ କରିପାରିବେ ଯାହା ଅନ୍ୟମାନେ କରିପାରିବେ ନାହିଁ ।
ମାଉଣ୍ଟ ଏଭେରେଷ୍ଟ ଶୃଙ୍ଗ ଚଢିଥିବା ଝାଙ୍ଗ ଆହୁରି କହିଛନ୍ତି କି ‘ମୁଁ ଚଢିବା ବେଳେ ବହୁତ ଡରିଯାଇଥିଲି, କାରଣ ମୁଁ ଦେଖିପାରୁ ନଥିଲି କି ମୁଁ କୁଆଡେ ଯାଉଛି, ମୋ ପାଦ ଅନେକ ଥର ଖସି ଯାଇଛି । ଏମିତି କି, ମୁଁ କିଛିଥର ଖସିପଡିଛି । ମାତ୍ର ମୁଁ ମନରେ ଭାବି ନେଇଥିଲି କି ଏହି ଯାତ୍ରା ମୋ ପାଇଁ କଠିନ ହୋଇପାରେ କିନ୍ତୁ ମୁଁ ଏହାକୁ ସାମ୍ନା କରିବି’ ।
ଦୃଷ୍ଟିହୀନ ପର୍ବତାରୋହୀ ହୋଙ୍ଗ କହିଛନ୍ତି କି, ସେ ନେତ୍ରହୀନ ଆମେରିକା ପର୍ବତାରୋହୀ ଏରିକ୍ ବେହେନମେୟରଙ୍କ ଠାରୁ ପ୍ରେରଣା ପାଇ ମାଉଣ୍ଟ ଏଭେରେଷ୍ଟ ଚଢିବାକୁ ନିଷ୍ପତ୍ତି ନେଇଥିଲେ । ବେହେନମେୟର ୨୦୦୧ ମସିହାରେ ମାଉଣ୍ଟ ଏଭେରେଷ୍ଟ ଚଢିବାରେ ସଫଳ ହୋଇଥିଲେ ।