ଅପହଞ୍ଚ ଇଲାକାରେ ସଂଜୀବନୀ ପାଲଟିଛି ବାଇକ୍ ଆମ୍ବୁଲାନ୍ସ ଓ ଡେଲିଭରି ଭ୍ୟାନ। ଗର୍ଭବତୀ ମହିଳାଙ୍କ ନିରାପଦ ପ୍ରସବ ପାଇଁ ରାଜ୍ୟରେ କନ୍ଧମାଳ ଅଧିକାର କରିଛି ପ୍ରଥମ ସ୍ଥାନ
କନକ ବ୍ୟୁରୋ: କନ୍ଧମାଳର ଦୁର୍ଗମ ଓ ଅପହଂଚ ଇଲାକାର ଗର୍ଭବତୀ ମହିଳାଙ୍କ ପାଇଁ ସଂଜୀବନୀ ପାଲଟିଛି ବାଇକ ଆମ୍ବୁଲାନ୍ସ, ଡେଲିଭରି ଭ୍ୟାନ ଓ ଜନନୀ ଅଟୋ ବ୍ୟବସ୍ଥା । ଏହି ବ୍ୟବସ୍ଥା କାରଣରୁ ରାଜ୍ୟର ଏହି ଅପହଂଚ ଇଲାକାରେ ଉଭୟ ମାଆ ଆଉ ଶିଶୁ ମୃତ୍ୟୁ ହାର ମଧ୍ୟ ବହୁ ଗୁଣା ହ୍ରାସ ପାଇଛି । ସବୁଠୁ ବଡ କଥା ହେଲା, ଦୁର୍ଗମ ଓ ଅପହଂଚ ଇଲାକାରେ ରହୁଥିବା ଗର୍ଭବତୀ ମହିଳାଙ୍କ ନିରାପଦ ପ୍ରସବ ପାଇଁ ରାଜ୍ୟରେ କନ୍ଧମାଳ ଅଧିକାର କରିଛି ପ୍ରଥମ ସ୍ଥାନ ।
Kanak News is now on WhatsApp
Join and get latest news updates delivered to you via WhatsApp
କନ୍ଧମାଳରେ ଏମିତି ଅନେକ ଗାଁ ରହିଛି ଯେଉଁଠିକୁ ଯିବା ପାଇଁ ନା ଭଲ ରାସ୍ତା ଗୋଟେ ଅଛି ନା ହିଁ ସେଠାରେ ନେଟୱାର୍କ ଠିକରେ ଲାଗି ପାରୁଛି । ତେବେ କନ୍ଧମାଳ ଜିଲ୍ଲାରେ ଏଭଳି ପାଖାପାଖି ୮୧୦ଟି ଗାଁ ରହିଛି । ଜଙ୍ଗଲ, ପାହାଡ ଥିବା ଯୋଗୁଁ ଏସବୁ ଗାଁକୁ ଆମ୍ବୁଲାନ୍ସ ଯିବାର ସମ୍ଭାବନାର ଆଶା ବହୁତ କ୍ଷୀଣ । ଫଳରେ ଗର୍ଭବତୀ ମହିଳାମାନଙ୍କ ପାଇଁ ଡାକ୍ତରଖାନାକୁ ଯିବା ବହୁତ ମୁସ୍କିଲ ହୋଇପଡୁଥିଲା । ଏପରିକି ଘରୋଇ ପ୍ରସବ ଯୋଗୁଁ ଅଧିକାଂଶ କ୍ଷେତ୍ରରେ ଉଭୟ ଗର୍ଭବତୀ ମହିଳା ଏବଂ ଶିଶୁମାନଙ୍କର ଅକାଳରେ ମୃତ୍ୟୁ ଘଟୁଥିଲା । ଯେଉଁ କାରଣରୁ କନ୍ଧମାଳରେ ଶିଶୁ ଓ ମାତୃ ମୃତ୍ୟୁ ହାର ହୁ ହୁ ହୋଇ ବଢି ଚାଲିଥିଲା । ତେଣୁ ଏହାକୁ ରୋକିବା ପାଇଁ ତଥା ନିରାପଦ ପ୍ରସବ ନିମନ୍ତେ ବର୍ତ୍ତମାନର ଜିଲ୍ଲାପାଳ ଡା.ବୃନ୍ଦା ଡି ଗତବର୍ଷ ନୂଆ ବ୍ୟବସ୍ଥା କରିବାକୁ ଉଦ୍ୟମ ଆରମ୍ଭ କରିଥିଲେ । ଯେଉଁ ଦୁର୍ଗମ ଓ ଅପହଂଚ ଗାଁକୁ ଆମ୍ବୁଲାନ୍ସ ଯାଇ ପାରୁନାହିଁ କିମ୍ବା ନେଟୱାର୍କ ନାହିଁ, ସେଠାରେ ୫ଟି ବାଇକ୍ ଆମ୍ବୁଲାନ୍ସ ବ୍ୟବସ୍ଥା କରାଯାଇଛି ।
ଦାରିଙ୍ଗବାଡିରେ ୨, ତୁମୁଡିବନ୍ଧ, ବାରଖମା ଓ ଫିରିଙ୍ଗିଆ ଦୁର୍ଗମ ଓ ଅପହଂଚ ଅଂଚଳରେ ଗୋଟିଏ ଲେଖାଏଁ ବାଇକ୍ ଆମ୍ବୁଲାନ୍ସ ଯୋଗାଇ ଦେବା ସହ ଡେଲିଭରି ଭ୍ୟାନ ଓ ଜନନୀ ଅଟୋର ମଧ୍ୟ ସୁବ୍ୟବସ୍ଥା କରିଛନ୍ତି ଜିଲ୍ଲାପାଳ । ତେବେ ଆଜି ସୁଦ୍ଧା ଡେଲିଭରୀ ଭ୍ୟାନ ସାହାଯ୍ୟରେ ୪୩୪ ଜଣ ଗର୍ଭବତୀ ମହିଳାଙ୍କ ପ୍ରସବ ହେଲାଣି । ତାହା ପୁଣି ନିରାପଦ ଭାବରେ । ସେହିଭଳି ବାଇକ୍ ଆମ୍ବୁଲାନ୍ସ ଦ୍ୱାରା ୮୯୪ ଜଣ ଗର୍ଭବତୀ ମହିଳାଙ୍କୁ ଡାକ୍ତରଖାନାରେ ନିରାପଦ ପ୍ରସବ ପାଇଁ ଭର୍ତ୍ତି କରାଯାଇଛି । ଜିଲ୍ଲାର ବିଭିନ୍ନ ବ୍ଲକରେ ବି ୧୪ଟି ଜନନୀ ଅଟୋ ରଖାଯାଇଛି । ଯେଉଁଥିରେ ପ୍ରସୂତିଙ୍କୁ ଅଟୋରେ ଆଣି ଡାକ୍ତରଖାନାରେ ପହଂଚାଇବାର ବ୍ୟବସ୍ଥା ରହିଛି । ତେବେ ଏଥିପାଇଁ ଦିନବେଳେ ଅଟୋ ପିଛା ୪ ଶହ ଏବଂ ସଂଧ୍ୟାରେ ୬ ଶହ ଟଙ୍କା ଭଡା ଦିଆଯାଉଛି ।