ବାପା ଗଲା ପରେ… ଅସହାୟ ମାଆ ମୁଣ୍ଡରେ ବାପଛେଉଣ୍ଡ ଝିଅଙ୍କ ଦାୟିତ୍ୱ । ଅଭାବ ପାଇଁ ବଡ ଝିଅ ପାଠ ଛାଡିଲା. ସାନ ଛାଡିବା ଉପରେ ।
କନକ ବ୍ୟୁରୋ: ତତଲା ତେଲରେ ବରା ନୁହେଁ ବରଂ ପିଲାଙ୍କ ଭବିଷ୍ୟତ ଛାଣେ ମାଆ । ନିଆଁ ତେଲ ସହ ମାଆ ଯେତେଯେତେ କସରତ କରେ ପିଲାଙ୍କ ପାଠ ପଢା ପାଇଁ ସେତେସେତେ ଫର୍ଚ୍ଚା ହୁଏ ଆଶାର କିରଣ । କାରଣ ବାପା ମଲା ପରେ ମାଆ ହିଁ ସାଜିଛି ବାପା । ଆଉ ଦୁଇ ଝିଅଙ୍କୁ ବଡ ମଣିଷ କରିବାକୁ ମାଆ ବିକୁଛି ବରା । ଗରମ ତେଲରେ ପାଠ ପାଇଁ ପକାଉଛି ପକୁଡି, ବଡମଣିଷ କରିବାକୁ ଛାଣି ଚାଲିଛି ବରା…
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ରାଜକନିକା ଫାଜିଲପୁର ଗାଁର ବିଷ୍ଣୁଚରଣ ରାଉତ ୨ ବର୍ଷ ତଳେ ଆରପାରିକୁ ଚାଲିଯିବା ପରେ ଏବେ ଦୁଇ ଝିଅଙ୍କ ଦାୟିତ୍ୱ ମାଆଙ୍କ ଉପରେ । ତେଣୁ ପିଲାଙ୍କୁ କେମିତି ବଡ କରିବେ, ତାଙ୍କୁ କେମିତି ପାଠ ପଢାଇବେ ସେହି ଚିନ୍ତାରେ ଥିବା ମାଆ ବଞ୍ଚିବା ପାଇଁ ବିକଳ୍ପ ବାଟ ବାହାର କରିଛନ୍ତି । ଆଉ ଗାଁଦାଣ୍ଡରେ ଆରମ୍ଭ କରିଛନ୍ତି ଏକ ବରା ଦୋକାନ ।
ବାପା ଗଲା ପରେ ଚଳିବା ପାଇଁ କଷ୍ଟ ଏତେ ବଢିଗଲା ଯେ ବଡ ଝିଅ ପ୍ଲସଟୁ ପାସ୍ କରିଥିଲେ ବି ଅଧିକ ନପଢି ଅଧାରୁ ପଢାରେ ଡୋରି ବାନ୍ଧିଛନ୍ତି । ହେଲେ ସାନ ଝିଅ ପୂଜାର ପାଠ ପାଇଁ ଅଧିକ ଇଚ୍ଛା ଥିଲେ ବି ଘରର ଅଭାବ ପାଇଁ ପଢା ବନ୍ଦ ହେବାକୁ ବସିଲାଣି । କରୋନା କଟକଣା ପାଇଁ ସ୍କୁଲ ବନ୍ଦ ଥିବାରୁ ଅନଲାଇନରେ କ୍ଲାସ ହେଉଛି । ହେଲେ ଘରେ ଖଣ୍ଡେ ମୋବାଇଲ ନଥିବାରୁ ପାଠ ପଢାରେ ବାଧକ ସାଜିଛି ।
ସେପଟେ ଘରର ମୁରବି ମରିଯିବା ପରେ ଏବେ ମାଆ ହିଁ ଏ ଦୁଇ ଝିଅଙ୍କର ସାଜିଛି ବାପା ଆଉ ମାଆ । ସେଇଥି ପାଇଁ ତ ଗାଁର ଜଣଙ୍କ ପିଣ୍ଡାରେ ଏ ବରା, ପକୁଡି ଦୋକାନ କରି ପିଲାଙ୍କୁ ବଡ କରିବାକୁ ପଣ କରିଛନ୍ତି ମହିଳା । କରୋନା ପାଇଁ ଲୋକେ ଏତେ ଆସୁନଥିବାରୁ ବେପାର ମାନ୍ଦା ରହୁଛି । ତଥାପି ତାରି ଭିତରେ ସଙ୍ଘର୍ଷ କରି ଚାଲିିଛନ୍ତି ସମସ୍ତେ…