ଦେଢ ମାସର କୁନି ଶିଶୁକୁ କୂଅକୁ ଫିଙ୍ଗି ହତ୍ୟା କଲା ରାକ୍ଷସୀ ମା’, ପୋଲିସ ଆଗରେ ଦେଖାଇଲା ଡେମୋ । ଦେଖନ୍ତୁ ସିନ ରିକ୍ରିଏସନର ପୂରା ଭିଡ଼ିଓ?

କନକ ବ୍ୟୁରୋ : ପାରିବାରିକ କଳହରୁ ଜଣେ ମା କେମିତି ପିଶାଚ ସାଜିପାରେ, ତା ସ୍ନେହ ଭରା ହାତ ନିଜ ପାଟି ଫିଟିନଥିବା କୁନି ପୁଅର ଜୀବନ କେମିତି ନେଇପାରେ, ତାର ନଗ୍ନ ଉଦାହରଣ ହେଉଛି କେନ୍ଦ୍ରାପଡା ଜିଲ୍ଲା ମାର୍ଶାଘାଇ କାନପୁର ଗାଁର ଲୋମଟାଙ୍କୁରା ଘଟଣା। ମାତ୍ର ଦୁଇମାସର ଶିଶୁପୁତ୍ରକୁ କେମିତି ହତ୍ୟା କଲା? କାହିଁକି ହତ୍ୟାକରି କୂଅକୁ ଫିଙ୍ଗିଦେଇଥିଲା? ତାର ପୁରା ସିନ ରିକ୍ରିଏସନ କରିଛି ସେହି ପିଶାଚରୂପୀ ମା।

ମାର୍ଶାଘାଇ ବ୍ଲକ ଦୁମୁକା ପଞ୍ଚାୟତ କାନପୁର ଗାଁର ସତ୍ୟ ରଞ୍ଜନ ପରିଡ଼ା ଓ ଲକ୍ଷ୍ମୀପ୍ରିୟା ପରିଡ଼ାଙ୍କ ଦୁଇମାସର ଶିଶୁପୁତ୍ର। ପୁଅ ଜନ୍ମହେବା ପରେ ଘର ଖୁସିରେ ଆତ୍ମହରା ହୋଇଯାଇଥିଲା ପରିବାର। ହେଲେ ଗତ ଦୁଇଦିନ ତଳେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଜୋରଦାର ଝଗଡ଼ା ହୋଇଥିଲା ଯାହାର ପରିଣାମ ଭୋଗିଲା ନିରୀହ କଅଁଳ କଢ଼ି। ଦୁଇମାସ ଧରି ଯେଉଁ ଶିଶୁପୁତ୍ରକୁ ଆଖି ଆଗରୁ ବି ଦୁରେଇ ପାରୁନଥିଲା ସେହି ପାଟି ଫିଟିନଥିବା କୁନି ପୁଅକୁ ମାରି କୂଅରେ ଫିଙ୍ଗିଦେଲା ରାକ୍ଷସୀ ମାଆ। ଏପରିକି ପ୍ରମାଣ ନଷ୍ଟ ପାଇଁ ଜରି ଅଖାରେ ପଥର ସହ ଶିଶୁପୁତ୍ରର ମୃତ ଦେହକୁ ବାନ୍ଧି କୂଅରେ ଫିଙ୍ଗିଦେଇଥିବା ସ୍ୱୀକାର କରିଛି ମାଆ ।

ମିଳିଥିବା ସୂଚନା ମୁତାବକ, ସୋମବାର ଘଟଣା ଘଟିବା ପରେ ପରେ ପୁଲିସ ମୃତ ଶିଶୁପୁତ୍ର ଆଦିତ୍ୟ ଓରଫ ଭାବଗ୍ରାହୀର ବାପା ସତ୍ୟରଞ୍ଜନ ପରିଡ଼ା ଓ ମା’ ଲକ୍ଷ୍ମୀପ୍ରିୟା ପରିଡ଼ାକୁ ଅଟକ ରଖି ପଚରାଉଚରା କରିଥିଲା। ପଚରାଉଚରା ବେଳେ ଲକ୍ଷ୍ମୀପ୍ରିୟା ପୁଲିସ ଆଗରେ ସବୁକଥା ମାନିଯାଇଥିଲା। କେତେବେଳେ ଓ କିପରି ଭାବରେ ସେ ନିଜ ଜନ୍ମିତ ଦେଢ଼ମାସର ଶିଶୁପୁତ୍ରକୁ ଶୋଇଥିବା ଅବସ୍ଥାରେ ବିଛଣାରୁ ଉଠାଇ ନେଇଥିଲା, ଏକ ଝୋଟଅଖାରେ ପଥର ପୁରାଇ ଶିଶୁପୁତ୍ରକୁ ରଖି ପାଣିଟାଙ୍କିରେ ପକାଇ ଦେଇଥିଲା, ପାଣିଟାଙ୍କିର ଘୋଡ଼ଣିକୁ ଘୋଡାଇ ଦେଇଥିଲା ଓ ଘରକୁ ଫେରି ପୁଣି ବିଛଣାରେ ଶୋଇଯାଇଥିଲାଟ୍ଟ ତାହାର ଡେମୋ ସେ ପୁଲିସକୁ ଦେଖାଇଥିଲା। ଏପରି ଏକ ଅଭାବନୀୟ ଲୋମଟାଙ୍କୁରା ଘଟଣାକୁ ସେ ଗତ ୨ତାରିଖ ରାତି ସାଢେ଼ ୨ଟା ସମୟରେ ରଚିଥିଲା। ଆଉ, କିଛି ନଜାଣିବା ପରି ବିଛଣାରେ ଶିଶୁପୁତ୍ରକୁ ନପାଇ ପରିବାର ଲୋକଙ୍କ ସହ ଖୋଜାଖୋଜି କରିଥିଲା ଓ ପରେ ପୁଲିସକୁ ପୁଅ ନିଖୋଜ ସଂପର୍କରେ ସେଇ ରାତିରେ ଖବର ଦେଇଥିଲା। ଖବର ମୁତାବକ, କାନପୁର ଗ୍ରାମର ବିଚିତ୍ରାନନ୍ଦ ପରିଡ଼ାଙ୍କ ସାନପୁଅ ସତ୍ୟରଞ୍ଜନ ପରିଡ଼ା ପାଟକୁରା ଥାନା ଅର୍ନ୍ତଗତ ମାଣିକପୁର ଗ୍ରାମର ହାଡ଼ିବନ୍ଧୁ ବେହେରାଙ୍କ ଝିଅ ଳକ୍ଷ୍ମୀପ୍ରିୟାକୁ ଗତ ୨୦୧୮ ନଭେମ୍ବର ୩ ତାରିଖରେ ପ୍ରେମ ବିବାହ କରିଥିଲେ। ଗତ ନଭେମ୍ବର ୯ ତାରିଖରେ ସେମାନଙ୍କର ଏକ ପୁତ୍ର ସନ୍ତାନ ଜନ୍ମ ନେଇଥିଲା। ଗତମାସରେ ଲକ୍ଷ୍ମୀପ୍ରିୟା ଏକାଧିକ ବାର ନିଜ ଘରକୁ ଯିବାକୁ ଚାହିଁଥିଲେ ବି ଶାଶୂଘର ଲୋକଙ୍କ ବିରୋଧ ଯୋଗୁଁ ଯାଇ ପାରୁ ନଥିଲା।

ଶିଶୁ ଜନ୍ମ ନେଇଥିବାରୁ, ଟିକେ ସୁସ୍ଥ ହୋଇଗଲେ ସେ ବାପଘରକୁ ଯିବ ବୋଲି ଶାଶୂଘର ଲୋକେ କହି ଆସୁଥିଲେ। ଏହାକୁ ନେଇ ସେ ଗତ ମାସକ ଭିତରେ ଏକାଧିକ ବାର ଜିଦ୍‌ କରି ଘରୁ ବାହାରିବାକୁ ଗୋଡ଼ ବି କାଢ଼ିଥିଲା। ଘଟଣା ଦିନ ରାତିରେ ଲକ୍ଷ୍ମୀପ୍ରିୟା ଶିଶୁପୁତ୍ରକୁ କୋଳରେ ଧରି ସ୍ବାମୀଙ୍କ ସହ ଖଟ ଉପରେ ଶୋଇଥିବା ବେଳେ ତଳେ ତା’ ଆଈଶାଶୂ ତାରାମଣି ପରିଡ଼ା ଓ ଶାଶୂ ରେବତୀ ପରିଡ଼ା ଶୋଇଥିଲେ। ଲକ୍ଷ୍ମୀପ୍ରିୟା ପୁଅକୁ କୋଳେଇ ଧୀରେ ଖଟ ଉପରୁ ଓହ୍ଲାଇ ତଳେ ଶୋଇଥିବା ତିନିଜଣଙ୍କୁ ସନ୍ତର୍ପଣରେ ଅତିକ୍ରମ କରି ଘର ବାହାରକୁ ଚାଲି ଆସିଥିଲା। ମା’ କୋଳରେ ଥିବାରୁ ଶିଶୁଟି ଉଷୁମ ପାଇ ଶୋଇଯାଇଥିଲା। ଝୋଟ ଅଖାଟିଏ ଆଣି ସେଥିରେ ପଥର ଖଣ୍ଡେ ଓ ଶିଶୁପୁତ୍ରକୁ ପୁରାଇଥିଲା। ସେହି ସମୟରେ ଟାଙ୍କିର ଘୋଡଣୀ କାଢ଼ି ପାଣି ଟାଙ୍କି ଭିତରକୁ ଅଖା ସହ ପୁଅକୁ ପକାଇ ଦେଇ ପଳାଇ ଆସିଥିଲା। ଟାଙ୍କି ଭିତରେ ପୁଅ ପାଣି ପିଇ ମୃତ୍ୟୁ ଘଟିଥିଲା, ଯାହା ଶବ ବ୍ୟବଛେଦ ରିପୋର୍ଟରୁ ମିଳିଥିବା ପୁଲିସ କହିଛି। କେଉଁ ପରିସ୍ଥିତିରେ ଦେଢ଼ମାସର ନିଷ୍ପାପ ଶିଶୁପୁତ୍ରକୁ ମାରିଲା ବୋଲି ପଚାରିବାରେ ଲକ୍ଷ୍ମୀପ୍ରିୟା କିଛି ଉତ୍ତର ଦେଇନି। ତେବେ ଅଭାବ ଯୋଗୁଁ ପ୍ରେମ ବିବାହରେ ବିଫଳତା ଓ ପାରିବାରିକ କଳହ ଏହାର କାରଣ ବୋଲି ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଥିବା ଆଇଆଇସି ପଦୀପ୍ତ କୁମାର କାନୁନଗୋ କହିଛନ୍ତି।

ଅନ୍ୟପଟେ ବାପା ସତ୍ୟରଞ୍ଜନ ସେଦିନର ଲୋମହର୍ଷଣ କାହାଣୀ କହିଛନ୍ତି। ତାଙ୍କୁ ନିଦ ଲାଗିଯାଇଥିଲା ହେଲେ ହଠାତ ରାତି ୩ଟା ସମୟରେ ନିଦ ଭାଙ୍ଗିଲା ପରେ ପୁଅ ବିଛଣାରେ ନଥିଲା। ମୋ ସ୍ତ୍ରୀ ଲକ୍ଷ୍ମୀପ୍ରିୟା ଉପରେ ମୋର ସନ୍ଦେହ ହେଲା। ପରେ ଧମକାଇବାରୁ ମୋ କଅଁଳା ଛୁଆଟିକୁ ମାରି ପଡିଶା ଘର ପଛପଟ କୂଅକୁ ଫୋପାଡି ଦେଇଛି ବୋଲି କହିଥିଲା। ତେବେ ଏଭଳି ଅଭାବନୀୟ ପୁତ୍ରହତ୍ୟା ମାଆ ନାମରେ କଳଙ୍କିତ କରିଛି। ତେଣୁ ସେଭଳି ପିଶାଚ ମାକୁ କଠୋରରୁ କଠୋର ଦଣ୍ଡ ବିଧାନ କରାଯାଉ ବୋଲି ବାପା ସତ୍ୟରଞ୍ଜନ ଦାବି କୋହଭରା କଣ୍ଠରେ କହିଛନ୍ତି।

ତେବେ ପୁଅକୁ କାହିଁକି ଓ କେମିତି ମାରିଲା ସେସବୁକୁ ପୋଲିସ ଆଗରେ ସ୍ୱୀକାର କରିଛି ସେହି ରାକ୍ଷସୀରୂପୀ ମାଆ। ଏପରିକି ହତ୍ୟାକାଣ୍ଡର ପୁରା ଡେମୋ ବା ସିନ୍ ରିକ୍ରିଏସନ କରିବା ପରେ ପିଶାଚ ମାଆକୁ ପୋଲିସ କୋର୍ଟ ଚାଲାଣ କରିଛି। ତେବେ ମାର୍ଶାଘାଇର ରାକ୍ଷସୀ ମା’ର ଘଟଣା ସାରା ରାଜ୍ୟରେ ଆଲୋଡନ ସୃଷ୍ଟି କରିଥିବାବେଳେ ଆଜିର ବାପା-ମାଆଙ୍କୁ ପ୍ରଶ୍ନର ପାହାଡ଼ ତଳେ ଛିଡ଼ା କରିଛି... ପାରିବାରିକ କଳହ ହୁଏତ ସମସ୍ତଙ୍କ ଘରେ ରହିଥାଏ କିନ୍ତୁ ତାର ପରିଣାମ ନିଷ୍ପାପ ଶିଶୁ କାହିଁକି ପାଇବ? କାହିଁକି ନିଜ ରାଗରୁଷାର ଶିକାର ଶିଶୁପୁତ୍ର ବା ଶିଶୁକନ୍ୟା ହେବ? ସେମାନେ ତୁମ କୋଳରେ ଜନ୍ମନେବା କଣ ପାପ? ଜୀବନ ଯଦି ଦେଇପାରିବନି ତାହେଲେ ନେବାର ଅଧିକାର ଦେଲା କିଏ?