ମା’ ଚାହୁଁଥିଲେ ପୁଅ IPS ହେଉ । ହେଲେ ପୁଅ ରାଜୁ ହୋଇଗଲେ ଲୋକପ୍ରିୟ କମେଡିଆନ୍

226

କନକ ବ୍ୟୁରୋ: ଜୀବନ ଯୁଦ୍ଧରେ ହାରିଗଲେ ପ୍ରସିଦ୍ଧ କମେଡିଆନ୍ ରାଜୁ ଶ୍ରୀବାସ୍ତବ । ଯିଏ ସମସ୍ତଙ୍କୁ ହସେଇ ହସେଇ ବେଦମ୍ କରୁଥିଲେ ହେଲେ ଆଜି ସମସ୍ତଙ୍କୁ ଲୁହରେ ଭିଜାଇ ଆରପାରିକୁ ଚାଲିଗଲେ । ଜିମରେ ହୃଦଘାତ ପରେ ଦିଲ୍ଲୀ ଏମ୍ସରେ ୪୨ ଦିନ ଚିକିତ୍ସାଧୀନ ରହିବା ପରେ ଆଜି ତାଙ୍କର ଦେହାନ୍ତ ହୋଇଛି । ତାଙ୍କ ନିଧନରେ ଆଜି ବିଭିନନ ମହଲରେ ଶୋକର ଛାୟା । ଲୋକେ ଯାହାଙ୍କୁ କମେଡିଆନ୍ ରାଜୁ ଭାବେ ଜାଣିଥିଲେ ତାଙ୍କ ଚଲାପଥରେ ରହିଥିଲା ଅନେକ ରୋଚକ କାହାଣୀ,ଆସନ୍ତୁ ଜାଣିବା ତାଙ୍କର ସକସେସ୍ ଷ୍ଟୋରୀ ।

ଆଧୁନିକ ସମାଜରେ ଜୀବନର ବ୍ୟବସ୍ତତାକୁ ନେଇ ଉଦାସ ହୋଇପଡୁଥିବା ମଣିଷକୁ ହସେଇ ହସେଇ ବେଦମ କରୁଥିଲେ ରାଜୁ ଶ୍ରୀବାସ୍ତବ । ୧୯୬୩ ଡିସେମ୍ପର ୨୫ ତାରିଖ କାନପୁରରେ ଜନ୍ମଗ୍ରହଣ କରିଥିଲେ ରାଜୁ ଶ୍ରୀବାସ୍ତବ । ପିଲାବେଳୁ ହିଁ ଭାରି ଗପୁଡା ଥିଲେ ରାଜୁ । ସମସ୍ତଙ୍କୁ ମଜା ମଜା କଥାରେ ହସେଇବା ତାଙ୍କର ଏକ ସହଜାତ ଗୁଣ ଥିଲା । ସ୍କୁଲରେ ପାଠ ପଢା ସମୟରେ ପଢା ଅପେକ୍ଷା ହସମଜାକରେ ଅଧିକ ସମୟ କାଟୁଥିଲେ । ଅନେକ ସମୟରେ ଶକ୍ଷକ ମାନଙ୍କର ମିମିକ୍ରି କରି ସାଙ୍ଗ ମାନଙ୍କୁ ହସାଉଥିଲେ । ସ୍କୁଲରେ ଯେତେବେଳେ କ୍ରିକେଟ ଟୁର୍ଣ୍ଣମେଣ୍ଟ ହେଉଥିଲା ତାଙ୍କୁ କମେଣ୍ଟ୍ରି କରିବାକୁ ଡାକରା ପଡୁଥିଲା ।

ତାଙ୍କର ମଜାଳିଆ ଅନ୍ଦାଜ ହିଁ ତାଙ୍କୁ କମ୍ ବୟସରୁ ସମସ୍ତଙ୍କ ପାଖରେ ଲୋକପ୍ରିୟ କରିବାକୁ ଆରମ୍ଭ କଲା । ଯେତେବେଳେ ପଡେଶୀଙ୍କ ଘରେ କୌଣସି ଜନ୍ମିଦନ ବା ପାର୍ଟି , ମହୋତ୍ସବ ହୁଏ ପାଇଁ ରାଜୁଙ୍କୁ ଡାକନ୍ତି । ଯୁଆଡେ ଯାଉଥିଲେ ଘରକୁ ଫେରିବାକୁ ଡେରି କରୁଥିଲେ । ଫଳରେ ଘରେ ମା’ଙ୍କ ଠାରୁ ଗାଳି ଶୁଣିବାକୁ ପଡୁଥିଲା ।

ମା’ ଚାହୁଁଥିଲେ ପୁଅ ତାଙ୍କର ଆଇପିଏସ ହେଉ , ସୁନାମ ଆଣୁ । ହେଲେ କିନ୍ତୁ ରାଜୁଙ୍କର ଅନ୍ୟ କିଛି ଇଚ୍ଛା ଥିଲା । ରାଜୁ ସୁନାମ ତ ଆଣିଲେ ହେଲେ ଆଇପିଏସ ହୋଇ ନୁହେଁ ବରଂ ଜଣେ ପ୍ରସିଦ୍ଧ କମେଡିଆନ୍ ହୋଇ । ପିଲାବେଳୁ ହିଁ କମେଡି କରିବାକୁ ଚାହୁଁଥିଲେ । ଭଗବାନ୍ ତାଙ୍କର ଏହି ଇଚ୍ଛାକୁ ପୂରଣ ମଧ୍ୟ କରିଥିଲେ । ତାଙ୍କ ଜୀବନରେ ଟର୍ଣ୍ଣିଙ୍ଗ ପଏଣ୍ଟ ସେତେବେଳେ ଆସିଲା ଯେତେବେଳ ସେ ‘ସୋଲେ’ ମୁଭି ଦେଖିଲେ । ଏଥିରେ ଅଭିତାଭ ବଚ୍ଚନଙ୍କର ଚରିତ୍ରକୁ ଏତେ ପସନ୍ଦ କରିଥିଲେ ଯେ, ଯୁଆଡେ ଗଲେ ଅମିତାଙ୍କ ମିମିକ୍ରି କରିବାକୁ ଲାଗିଲେ , ଯାହା ତାଙ୍କୁ ଲୋକପ୍ରିୟ କରିବାକୁ ଆରମ୍ଭ କଲା । ହେଲେ ନିଜକୁ କେବଳ କାନପୁର ଓ ଏହାର ଆଖପାଖ ଅଞ୍ଚଳରେ ସୀମିତ ରଖିବାକୁ ଚାହୁଁନଥିଲେ ।

୧୯୮୨ ମସିହାରେ ରାଜୁ ମୁମ୍ବାଇ ଚାଲିଆସିଲେ । ପ୍ରଥମେ ଏକ ଅର୍କେଷ୍ଟ୍ରା ଗ୍ରୁପରେ ଯୋଗ ଦେଇ କମେଡି ଆରମ୍ଭ କଲେ । ଏହି ସମୟ ମଧ୍ୟରେ ତାଙ୍କ ସହ ଏକ ଘଟଣା ଘଟିଲା । ଏକ ଶୋ’ରେ କମେଡି କରୁଥିଲେ । ଶୋ’ ଶେଷ ବେଳକୁ ଜଣେ ବୟସ୍କ ବ୍ୟକ୍ତି ତାଙ୍କ ପାଖୁ ଅସିଥିଲେ ଓ ତାଙ୍କ ହାତରେ ୫୦ ଟଙ୍କିଆ ନୋଟଟେ ଧରାଇଥିଲେ । ପଚାରିବାରୁ କହିଥିଲେ, ସେ ତାଙ୍କର ଭରପୁର ମନୋରଞ୍ଜନ କରିଥିବାରୁ ଏହା ତାଙ୍କର ପ୍ରାପ୍ୟ । ବାସ୍ ଏତିକିରେ ରାଜୁଙ୍କ ମୁଣ୍ଡରେ କମେଡିକୁ ନେଇ ଜଣେ ପକ୍କ୍ା ପ୍ରଫେସନାଲ ହେବାକୁ ଇଚ୍ଛା ସୃଷ୍ଟି ହୋଇଥିଲା ।
ପରେ ଆରମ୍ଭ ହୋଇଥିବା କମେଡି ଶୋ’ ‘ଦ ଗ୍ରେଟ୍ ଲାଫ୍ଟର ଚ୍ୟାଲେଞ୍ଜ’ରେ ଅଂଶ ଗ୍ରହଣ କରି ଦ୍ୱିତୀୟ ସ୍ଥାନ ଅଧିକାର କଲେ ଆଉ ସମସ୍ତଙ୍କ ହୃଦୟରେ ରାଜ କରିବାକୁ ଆରମ୍ଭ କଲେ । ବାସ୍ ସେବେଠାରୁ ଆଉ ପଛକୁ ଚାହିଁନଥିଲେ ରାଜୁ ଶ୍ରୀବାସ୍ତବ ।

ସବୁବେଳେ ଲୋକଙ୍କୁ ହସେଇ ହସେଇ ବେଦବ କରୁଥିବା ରାଜୁ ଆଉ ନାହାଁନ୍ତି । ହୃଦଘାତର ଶିକାର ହୋର ଗତ ୪୨ ଦିନ ହେବ ଦିଲ୍ଲୀ ଏମ୍ସରେ ଚିକିତ୍ସା ହେବା ପରେ ଆଜି ପଞ୍ଚଭୂତରେ ଲୀନ ହୋଇଯାଇଛନ୍ତି । ତାଙ୍କ ବିଚ୍ଛେଦରେ ଆଜି ସମସ୍ତଙ୍କ ଆଖିରେ ଲୁହ ।