ମାଟି କାରିଗରଙ୍କ ଗାଁ ରାଜନଗର ବ୍ଲକର ପଡାପେଟା । ୪୦ ରୁ ଅଧିକ ପରିବାର ମାଟି ଉପକରଣ ପ୍ରସ୍ତୁତ କରି ମେଣ୍ଟାଉଛନ୍ତି ଗୁଜରାଣ
କନକ ବ୍ୟୁରୋ : ହେଉଛି କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକ ପଡାପେଟା ଗାଁର । ଗାଁରେ ପାଖାପାଖି ୪୦ ପରିବାର ମାଟିରେ ବିଭିନ୍ନ ଉପକରଣ ତିଆରି କରି ଜୀବିକା ନିର୍ବାହ କରନ୍ତି । ପରିବାରର ପୁରୁଷ ଓ ମହିଳା ସମସ୍ତେ ବିଭିନ୍ନ ମାଟି ଉପକରଣ ତିଆରି କରନ୍ତି । କିଏ ହାତରେ ଦୀପ ଗଢୁଛି ତ ଆଉ କିଏ ଚକ ସାହାଯ୍ୟରେ କଳସ, ମାଠିଆ, ସୁରେଇ ଆଦି ନିର୍ମାଣ କରୁଛି । ବାପ ଅଜା ଅମଳରୁ ଏହି ବୃତିକୁ ଏମାନେ ନିଜର କରି ପରିବାର ପ୍ରତିପୋଷଣ କରୁଛନ୍ତି । ଦିନକୁ ୩ ରୁ ୪ ଘଂଟା ସମୟ ଦେଇ ମାଟିର ବିଭିନ୍ନ ଉପକରଣ ତିଆରି କରି ରାଜନଗର ବ୍ଲକର ରାଜନଗର, ଜରିମୂଳ, କୁରୁଂଟି, ତାଳଚୁଆ ଆଦି ବଜାରକୁ ଯୋଗାଣ କରନ୍ତି । ପୂର୍ବରୁ ଅନେକ ବ୍ୟବସାୟୀ ମାନେ ଆସି ପ୍ରତ୍ୟେକ ସପ୍ତାହରେ ଏମାନଙ୍କଠୁଁ ଜିନିଷ କିଣିନିଅନ୍ତି । ମାତ୍ର ଏବେ ପ୍ଲାଷ୍ଟିକ ଓ ଷ୍ଟିଲ ଦ୍ରବ୍ୟର ବହୁଳ ବ୍ୟବହାର କାରଣରୁ ଏମାନଙ୍କ ହାତ ତିଆରି ଜିନିଷର ଚାହିଦା କମିବାକୁ ଲାଗିଲାଣି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଏମାନେ ଏହି ମାଟି ଦ୍ରବ୍ୟକୁ ବିକ୍ରି କରି ମାସକୁ ୨୦ ରୁ ୨୫ ହଜାର ଟଙ୍କା ରୋଜଗାର କରୁଥିଲେ । ବେପାର ଏତେ ହେଉଥିଲା ଯେ, ତିଆରି କରି ଜିନିଷ ଯୋଗାଇବା କଷ୍ଟ ହୋଇପଡୁଥିଲା । ମାତ୍ର ଏବେ ଜିନିଷ ତିଆରି ହୋଇ ପଡିରହିଥିଲେ ବି ବଜାରରେ ଚାହିଦା ନଥିବାରୁ ସେଭଳି ବେପାର ହେଉନାହିଁ । ଜମିବାଡି ନଥିବାରୁ କେବଳ ମାଟି ଦ୍ରବ୍ୟ ବିକ୍ରି କରି ଏମାନେ ନିଜର ଗୁଜୁରାଣ ମେଂଟାନ୍ତି । ଅନ୍ୟପଟେ ଏହି ବୃତିକୁ ଆପଣାଇ ପରିବାର ଚଳାଉଥିବା କାରିଗରଙ୍କୁ ଆଜିଯାଏଁ ଟଙ୍କାଟିଏ ବି ସରକାରୀ ସହାୟତା ମିଳିନାହିଁ । ଯାହାକୁ ନେଇ କାରିଗର ମାନେ ଅସନ୍ତୋଷ ପ୍ରକାଶ କରିଛନ୍ତି ।
ପୂର୍ବରୁ ଯେତିକି ଟଙ୍କା ରୋଜଗାର ହେଉଥିଲା, ଏବେ ତାର ଅଧା ଟଙ୍କା ହେଉନଥିବା କହିଛନ୍ତି କାରିଗର । ଏହି ମାଟି ଦ୍ରବ୍ୟ ପରିବେଶ ପ୍ରତି କୌଣସି କ୍ଷତିକାରକ ହୋଇନଥିଲେ ବି ଲୋକମାନେ ମାଟି ଦ୍ରବ୍ୟ ପ୍ରତି ମୁହଁ ମୋଡୁଛନ୍ତି । ଯଦି ଏମାନଙ୍କୁ ସରକାରୀ ସହାୟତା ଯୋଗାଇ ଦିଆଯାଏ ତେବେ ଏମାନେ ନିଜର କୌଳିକ ବୃତି ମାଧ୍ୟମରେ ବଜାରରେ ମାଟି ଦ୍ରବ୍ୟର ବେପାର ବଢାଇ ପାରନ୍ତେ ।