ସମୟ ପାଖେଇ ଆସୁଛି, ଉତ୍କଣ୍ଠା ବଢୁଛି । ବିଶ୍ୱ ପ୍ରସିଦ୍ଧ ଧନୁଯାତ୍ରାକୁ ସାରା ଦେଶ ଚାହିଁଛି ।
କନକ ବ୍ୟୁରୋ: ଆଉ ମାସକ ପରେ ବିଶ୍ୱ ପ୍ରସିଦ୍ଧ ଧନୁଯାତ୍ରା । ବିଶ୍ୱର ସର୍ବବୃହତ ମୁକ୍ତାକାଶ ଖୋଲାମଞ୍ଚରେ ଚାଲିବ କଂସ ରାଜୁତି । ଏନେଇ ପ୍ରଶାସନ ତରଫରୁ ଜୋରଦାର ପ୍ରସ୍ତୁତି ଆରମ୍ଭ ହୋଇଥିବା ଦେଖିବାକୁ ମିଳିଛି । ତେବେ ବରଗଡ଼ ଧନୁଯାତ୍ରା ପାଇଁ ଆସନ୍ତା ୧ ତାରିଖରେ ଶୁଭସ୍ତମ୍ଭ ସ୍ଥାପନ ହେବ । ଆଉ ଏନେଇ ବରଗଡ଼ ଧନୁଯାତ୍ରା ସଭାପତି ତଥା ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼କଥା ହେଲା ଆସନ୍ତା ଡିସେମ୍ବର ୩୧ ତାରିଖରେ ହେବାକୁ ଥିବା ବିଶ୍ୱ ପ୍ରସିଦ୍ଧ ଧନୁଯାତ୍ରାରେ ଏଥର ୧୧୫ରୁ ଅଧିକ କଳାକାର ଦଳ ସାମିଲ ହୋଇପାରନ୍ତି । ଆଉ ଉଦଘାଟନୀ ଉତ୍ସବରେ ସାଂସ୍କୃତିକ ଶୋଭାଯାତ୍ରାରେ କମ୍ପିବ ପୂରା ବରଗଡ଼ । ଏପରିକି ଏହି ଉଦଘାଟନୀ ଉତ୍ସବରେ ୧୫ଶହ କଳାକାର ଯୋଗଦେବାର କାର୍ଯ୍ୟକ୍ରମ ରହିଥିବା ଜଣାପଡ଼ିଛି ।
ଅନ୍ୟପଟେ ୭୧ତମ ବିଶ୍ୱପ୍ରସିଦ୍ଧ ଧନୁଯାତ୍ରାରେ ଭୁବନେଶ୍ୱର ପ୍ରଧାନଙ୍କୁ କଂସ ଚରିତ୍ର ମିଳିଛି । ଆସନ୍ତା ଡିସେମ୍ବର ୩୧ ତାରିଖରୁ ଏହି ବିଶ୍ୱପ୍ରସିଦ୍ଧ ଧନୁଯାତ୍ରା ଆରମ୍ଭ ହୋଇ ଜାନୁୟାରୀ ୧୧ ତାରିଖ ପର୍ଯ୍ୟନ୍ତ ଚାଲିବ । ଆଉ କଂସର ରାଜୁତିରେ ଥରହର ହେବ ମଥୁରା ନଗରୀ ବରଗଡ଼ । ତେବେ ବିଶ୍ୱପ୍ରସିଦ୍ଧ ଧନୁଯାତ୍ରାକୁ ନେଇ କେବଳ ଓଡ଼ିଶା ବାସୀ ନୁହେଁ ବରଂ ଦେଶର କୋଣଅନୁକୋଣର ଲୋକମାନେ ଉତ୍ସାହିତ ହୋଇଥିବା ଦେଖିବାକୁ ମିଳିଛି ।