ଦିନକ ପରେ ବିଧାନସଭାର ମୌସୁମୀ ଅଧିବେଶନ : ଆଜି ବସିବ ବିଜେପି ବିଧାୟକ ଦଳ ବୈଠକ
କାଲି ରଣନୀତି ସ୍ଥିର କରିବେ କଂଗ୍ରେସ ଓ ବିଜେଡି; ସମୟ କମ୍ କିନ୍ତୁ ଚର୍ଚ୍ଚା ପାଇଁ ରହିଛି ମାଳ ମାଳ ପ୍ରସଙ୍ଗ
କନକ ବ୍ୟୁରୋ : ଦିନକ ପରେ ବିଧାନସଭାର ମୌସୁମୀ ଅଧିବେଶନ । ତେଲ ଦର ବୃଦ୍ଧି ଜାରି ରହିଥିଲା ବେଳେ ଅତ୍ୟାବଶ୍ୟକ ସାମଗ୍ରୀର ଦର ବି ଆକାଶଛୁଆଁ ହେଉଛି । ବିଜୁଳି ଦର ବୃଦ୍ଧି ପ୍ରସଙ୍ଗରେ ଓଇଆର୍ସିକୁ ସରକାର ଚିଠି ଲେଖିବେ ବୋଲି ଶକ୍ତି ମନ୍ତ୍ରୀ ଗୃହରେ ଦେଇଥିବା ପ୍ରତିଶ୍ରୁତି ରଖି ନାହାନ୍ତି । ଏପ୍ରିଲ୍ ମାସ ଠାରୁ ଚଢ଼ା ଦରରେ ଖାଉଟି ବିଜୁଳି ବିଲ୍ ଭରୁଥିଲେ ବି ସରକାର ନିରବ । ତେଣୁ ପହିଲାରୁ ଆରମ୍ଭ ହେଉଥିବା ବିଧାନସଭାର ମୌସୁମୀ ଅଧିବେଶନକୁ ଏହିସବୁ ପ୍ରସଙ୍ଗ ପୁଣି ସରଗରମ କରିବାର ସମ୍ଭାବନା ରହିଛି । ବିଧାନସଭାରେ ଦିନ ଦିନ ଧରି ହୋଇଥିବା ଆଲୋଚନା ନିଷ୍କର୍ସକୁ ସରକାର କାହିଁକି ଗ୍ରହଣ କରି ନାହାନ୍ତି, ବିରୋଧୀ ତାହାର ଜବାବ ମାଗିବାକୁ ପ୍ରସ୍ତୁତି ଚଳାଇଛନ୍ତି । କେବଳ ଏତିକି ନୁହେଁ, ଆହୁରି ଅନେକ ନୂଆ ପ୍ରସଙ୍ଗ ମଧ୍ୟ ଉଠିବ। ତେବେ ଏତେ ପ୍ରସଙ୍ଗ ପାଇଁ ସମୟ ନିଅଣ୍ଟ ପଡ଼ିବ। କାରଣ ୯ ତାରିଖ ଯାଏଁ ଚାଲିବାକୁ ଥିବା ଏହି ଅଧିବେଶନରେ ମାତ୍ର ୮ଟି କାର୍ଯ୍ୟଦିବସ ରହିଛି ।
Kanak News is now on WhatsApp
Join and get latest news updates delivered to you via WhatsApp
ବିଧାନସଭା ଅଧିବେଶନ ପାଇଁ ରଣନୀତି ପ୍ରସ୍ତୁତ କରିବାକୁ ବିଜେପିର ବିଧାୟକ ଦଳ ବୈଠକ ଆଜି ପୂର୍ବାହ୍ନରେ ବିଜେପି ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ହେବ । ବିରୋଧୀ ଦଳ ନେତା ପ୍ରଦୀପ ନାଏକ ଅସୁସ୍ଥ ହୋଇ ଚିକିତ୍ସାଧୀନ ଥିବାରୁ ଉପନେତା ବିଷ୍ଣୁ ସେଠୀ ଏଥିରେ ଅଧ୍ୟକ୍ଷତା କରିବେ । ତେଣୁ ଗୃହରେ ଶ୍ରୀ ସେଠୀଙ୍କ ନେତୃତ୍ବରେ ହିଁ ବିଜେପି ବିଧାୟକ ଦଳ ସରକାରଙ୍କୁ ମୁକାବିଲା କରିବ । କଂଗ୍ରେସ ବିଧାୟକ ଦଳ ବୈଠକ ୩୧ ତାରିଖ ସନ୍ଧ୍ୟା ୫ଟାରେ ହେବ । ବିଧାୟକ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ କଂଗ୍ରେସ ଭବନରେ ଏହି ବୈଠକ ହେବ। ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଉପସ୍ଥିତିରେ ବିଧାୟକମାନେ ରଣନୀତି ପ୍ରସ୍ତୁତ କରିବେ। ମରୁଡ଼ି, ଦରଦାମ ବୃଦ୍ଧି, ବେକାରୀ ସମସ୍ୟା, ଦୁର୍ନୀତି, ସ୍ବାସ୍ଥ୍ୟ ସେବାରେ ଅବ୍ୟବସ୍ଥା, ଶିକ୍ଷା ଓ ଶିକ୍ଷକ ଅଭାବ ସମସ୍ୟା ଗୃହରେ ଦଳ ଉଠାଇବ ବୋଲି ପୂର୍ବରୁ ଶ୍ରୀ ମିଶ୍ର ଗଣମାଧ୍ୟମକୁ ସୂଚନା ଦେଇସାରିଛନ୍ତି । ବିଜେଡି ବିଧାୟକ ଦଳ ବୈଠକ ୩୧ ତାରିଖ ସନ୍ଧ୍ୟା ୬ଟାରେ ବିଧାନସଭାର ୫୪ ନମ୍ବର ପ୍ରକୋଷ୍ଠ ଓ ନୂଆ ସମ୍ମିଳନୀ କକ୍ଷରେ ଅନୁଷ୍ଠିତ ହେବ । ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏଥିରେ ଅଧ୍ୟକ୍ଷତା କରିବେ । ବିରୋଧୀଙ୍କୁ ବିଭିନ୍ନ ପ୍ରସଙ୍ଗରେ କିପରି ଜବାବ ଦିଆଯିବ, ତାହାକୁ ନେଇ ରଣନୀତି ପ୍ରସ୍ତୁତ କରାଯିବ ।