୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସି ଛଟପଟ ହେଉଥିଲା ଛୁଆ, କୋଳରେ ଉଠାଇ ନେଇ ହସ୍ପିଟାଲରେ ପହଞ୍ଚିଲା ମା’ ମାଙ୍କଡ । ଆଉ ତା ପରେ… ।
ମରିଗଲା ମାନବିକତା । ଏଭଳି ଦୃଶ୍ୟ ଯାହା ଦେଖିଲେ ନିଜକୁ ସଭ୍ୟ ବୋଲାଉଥିବା ମଣିଷର ମୁଣ୍ଡ ଆପଣାଛାଏଁ ତଳକୁ ହୋଇଯିବ । ୧୧ କେଭି ବିଦ୍ୟୁତ ସଂସ୍ପର୍ଶରେ ଆସି ଛଟପଟ ହେଉଥିଲା କୁନି ମାଙ୍କଡ । ବଞ୍ଚିବା ସଂଘର୍ଷ କରୁଥିଲା, ମା’ ମାଙ୍କଡ ନିଜ ଛୁଆ ମାଙ୍କଡର ଜୀବନ ବଞ୍ଚାଇବାକୁ ବାରମ୍ବାର ପ୍ରୟାସ ମଧ୍ୟ କରୁଥିଲା । ପାଖରେ ପଶୁ ହସ୍ପିଟାଲ କିନ୍ତୁ ମାଙ୍କଡର ଜୀବନ ବଞ୍ଚାଇବା ପରିବର୍ତ୍ତେ ଏହି ଦୃଶ୍ୟକୁ ଉପଭୋଗ କରୁଥିଲା ବିବେକହୀନ ମଣିଷ । ଆଉ ଶେଷରେ ଜୀବନ ମୃତ୍ୟୁର ଲଢେଇରେ ହାରି ଯାଇଥିଲା କୁନି ମାଙ୍କଡ । ମା’ କୋଳରେ ସବୁଦିନ ପାଇଁ ଚିରନିଦ୍ରାରେ ଶୋଇପଡିଥିଲା । ଏଭଳି ଏକ ହୃଦୟବିଦାରକ ଘଟଣା ମଧ୍ୟପ୍ରଦେଶର ସିହୋର ଜିଲ୍ଲାରେ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ସିହୋର ଅଞ୍ଚଳରେ ଏକ କୁନି ମାଙ୍କଡ ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିବା ଫଳରେ ଆହତ ହୋଇ ନାଳରେ ପଡି ଛଟପଟ ହେଉଥିଲା । ପାଖରେ ଥିବା ମା’ ମାଙ୍କଡ ନିଜ ଛୁଆକୁ ବଞ୍ଚାଇବା ପାଇଁ ବାରମ୍ବାର ପ୍ରୟାସ କରି ଚାଲିଥିଲା । ସବୁପରେ ବି ସେ ପଶୁ ନା ପାଟି ଫିଟାଇ କାହାକୁ ବା କହିବ । କିନ୍ତୁ ମା’ ମାଙ୍କରଡ କରୁଣ ଚାହାଣି ଅନେକ କଥା କହୁଥିଲା । ବାଟରେ ଯାଉଥିବା ମଣିଷକୁ ନିଜ ଛୁଆକୁ ବଞ୍ଚାଇବା ପାଇଁ ସତେ ଯେମିତି ସହାୟତା ମାଗୁଥିଲା ମା’ । କିନ୍ତୁ ବାଟରେ ଯାଉଥିବା ମଣିଷ ପାଇଁ ଏହି ଦୃଶ୍ୟ ଯେମିତି ସାଧାରଣ ଥିଲା । ସମସ୍ତେ ଫଟୋ ଉଠାଇ ମଜା ନେଉଥିଲେ କିନ୍ତୁ ସହାୟତା ପାଇଁ ଯେପରି କାହାର ହାତ ଆଗକୁ ବଢୁନଥିଲା ।
ବିବେକହୀନ ମଣିଷ ଠାରୁ ସହାୟତାର ଆଶା ମଉଳିବା ପରେ ନିଜ ଛୁଆକୁ ଧରି ପଶୁ ଚିକିତ୍ସାଳୟରେ ପହଞ୍ଚିଥିଲା ମା’ମାଙ୍କଡ । କିନ୍ତୁ ସେତେବେଳକୁ ବହୁତ ବିଳମ୍ବ ହୋଇସାରିଥିଲା । ପଶୁ ଚିକ୍ରିସାଳୟର ଡାକ୍ତରଙ୍କ କହିବା ଅନୁଯାୟୀ, ହସ୍ପିଟାଲକୁ ନିଜ ଛୁଆକୁ ଧରି ମା’ ମାଙ୍କଡ ଆସିବା ପ୍ରଥମ ଘଟଣା । କିନ୍ତୁ ଆମେ ଆହତ କୁନି ମାଙ୍କଡର ଚିକିତ୍ସା କରିବାକୁ ଚେଷ୍ଟା କରିଥିଲୁ । ତେବେ ମା’ ମାଙ୍କଡ ଛୁଆ ମାଙ୍କଡ ଦେହରେ ହାତ ମାରିବାକୁ ନ ଦେଇ ଆକ୍ରମଣ କରିବାକୁ ଉଦ୍ୟତ ହୋଇଥିଲା । ତେଣୁ କୁନି ମାଙ୍କଡର ଚିକିତ୍ସା କରାଯାଇପାରିଲା ନାହିଁ । ତେବେ ପରବର୍ତ୍ତୀ ସମୟରେ ମାଙ୍କଡକୁ ଚିକିତ୍ସା କରିବାକୁ ଆଣିବା ବେଳକୁ ତାର ମୃତ୍ୟୁ ହୋଇ ସାରିଥିଲା ।