ମାହାଙ୍ଗାରେ ମୋମୋ ଆତଙ୍କ ! ଗେମ ଖେଳି ଛାତ୍ର ଆତ୍ମହତ୍ୟା କରିଥିବା ଅଭିଯୋଗ । ମୋବାଇଲରୁ ମିଳିଲା ମୃତ୍ୟୁର ଆପ୍
ମୋମୋ ଦେଉଛି ମୃତ୍ୟୁର ଡାକ । ମୋମୋ ନେଉଛି ଜୀବନ । ରାଉରକେଲାର ଇଂଜିନିୟରଂ ଛାତ୍ର ଚେତନ କୁମାରଙ୍କ ପରେ ଏବେ ସାଲେପୁର ମାହାଙ୍ଗାରୁ ଆଉ ଜଣେ ଯୁବକ ମୋମୋ ଗେମ ଯୋଗୁଁ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ମାହାଙ୍ଗା ଉମର ଗାଁର ଉମାକାନ୍ତ ବେହେରା ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି । ତେବେ ପରିବାର ଲୋକ ତାଙ୍କ ମୋବାଇଲରୁ ମୋମୋ ଗେମ ଆପ୍ ପାଇଥିବାରୁ ମୋମୋ ଗେମ ଖେଳି ସେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ପରିବାର ଲୋକ ମାହାଙ୍ଗା ଥାନାରେ ଏନେଇ ଏକ ମାମଲା ରୁଜୁ କରିବା ସହ ତଦନ୍ତ ପାଇଁ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଠାରେ ଆମେ କହିରଖୁଛୁ କି, ନିକଟରେ ରାଉରକେଲା ରେଲୱେ କଲୋନୀର ଜଣେ ଇଂଜିନିୟରିଂ ଛାତ୍ର ଏହି ଗେମର ଚ୍ୟାଲେଂଜ୍ ନେଇ ଜୀବନ ହରାଇଥିଲେ । ମୋବାଇଲର ଏହି ଘାତକ ଖେଳରେ ସେ ଏଭଳି ଆକର୍ଷିତ ହେଲେ ଯେ, ଭୁବନେଶ୍ୱରରୁ ଚେନାଇ ଯାଇ ସେଠାରେ ୬ ମହଲା ଉପରୁ ଡେଇଁପଡିଥିଲେ । ଭୁବନେଶ୍ୱରର ଏକ ଇଂଜିନିୟରିଂ କଲେଜରେ କମ୍ପ୍ୟୁଟର ସାଇନ୍ସ ପଢ଼ୁଥିଲେ ଚେତନ କୁମାର । ମେଧାବୀ ଛାତ୍ର ହେବା ସହ ଫଟୋଗ୍ରାଫିରେ ମଧ୍ୟ ଜାତୀୟ ସ୍ତରରେ ହୋଇଥିଲେ ପୁରସ୍କୃତ । ହେଲେ ମୋବାଇଲରେ ଏକ ଘାତକ ଖେଳ ନେଇଯାଇଛି ଏହି ମେଧାବୀ ଛାତ୍ରଙ୍କ ଜୀବନ । ବ୍ଲୁ ହ୍ୱେଲ ପରେ ଏବେ ମୋମୋ ଚ୍ୟାଲେଂଜ ଦେଉଛି ମୃତ୍ୟୁର ଡାକ । ଏହି ଖେଳ ତାଙ୍କୁ ଏତେ ପାଗଳ କରିଥିଲା ଯେ ସେ ଭୁବନେଶ୍ୱରରୁ ଚେନ୍ନାଇ ଯାଇ ୬ ମହଲା ଉପରୁ ଡେଇଁ ଆତ୍ମହତ୍ୟା କରିପକାଇଥିଲେ ।
କ’ଣ ଏହି ମୋମା ଚ୍ୟାଲେଞ୍ଜ
ପ୍ରଥମେ ହ୍ୱାଟ୍ସଅପ୍ ମେସେଞ୍ଜର ଜରିଆରେ ଏହି ଗେମର ଲିଙ୍କ୍ ପାଇଲା ପରେ ବ୍ୟବହାରକାରୀ ଏହା ପ୍ରତି ଆକୃଷ୍ଟ ହୋଇପଡ଼େ । ଏହାପରେ ଖେଳାଳିଙ୍କ ପାଖକୁ ବିଭିନ୍ନ ନିର୍ଦ୍ଦେଶ ଆସିଥାଏ ଓ ସେହି ନିର୍ଦ୍ଦେଶ ଅନୁସାରେ କାର୍ଯ୍ୟ କରିବାକୁ ପଡ଼ିଥାଏ । ମୋମୋରେ ଏକ ଆକାଉଂଟ ଖୋଲି, ଆସୁଥିବା ବିପଦଜନକ ନିର୍ଦ୍ଦେଶ ଗୁଡ଼ିକୁ ପାଳନ କରିଥାଏ ପ୍ରତିଯୋଗୀ । ଏପରିକି ନିଜକୁ କିମ୍ବା ନିଜ ପରିବାରକୁ କ୍ଷତି ପହଁଚାଇବାକୁ ଚ୍ୟାଲେଞ୍ଜ ମିଳେ । ବିଭିନ୍ନ ବିପଦପୂର୍ଣ୍ଣ ଟାସ୍କ କରିବାକୁ ଖେଳାଳିକୁ କୁହାଯାଇଥାଏ । ଏହି ସବୁ ନିର୍ଦ୍ଦେଶ ପାଳନ ନକଲେ ଖେଳାଳି ଓ ତାଂକ ପରିବାର ଲୋକଙ୍କ ପରିଣତି ଭୟାବହ ହେବ ବୋଲି ମଧ୍ୟ ଧମକ ମିଳିଥାଏ । ଆଉ ଶେଷ ଚ୍ୟାଲେଂଜ ଥାଏ ଆତ୍ମହତ୍ୟା । ତେବେ ମୃତ୍ୟୁର ଏହି ଖେଳ ଭିତରେ ମାନସିକ ସ୍ତରରେ ଖେଳାଳିଙ୍କୁ ଏପରି ଦୁର୍ବଳ କରିଦିଆଯାଏ ଯେ, ଆତ୍ମହତ୍ୟା କରିବାକୁ ମଧ୍ୟ ସେ ପଛାଇନଥାଏ ।
ମୋମୋ ଗେମ୍ ନେଇ ଆଡଭାଇଜରୀ ଜାରି
ମୋମୋ ଗେମ୍ ନେଇ ଆଡଭାଇଜରୀ ଜାରି ହୋଇଛି । ଏହି ଗେମ୍ ଠାରୁ ଉଭୟ ଛାତ୍ରଛାତ୍ରୀ ଓ ଅଭିଭାବକଙ୍କୁ ସତର୍କ ରହିବାକୁ ପରାମର୍ଶ ଦେଇଛି କ୍ରାଇମବ୍ରାଂଚ୍ । ଆଡଭାଇଜରୀରେ କୁହାଯାଇଛି, ଆପଣଙ୍କ ହ୍ୱାଟ୍ସ ଆପ୍ରେ ଅଜଣା ଲିଙ୍କଠାରୁ ଦୂରେଇ ରୁହନ୍ତୁ । ଅଜଣା ନମ୍ବରରୁ ମେସେଜ୍ ଆସିଲେ ତାର ଉତର ଦିଅନ୍ତୁ ନାହିଁ । ଅଜଣା ନମ୍ବରରୁ କୌଣସି ଗେମ୍ ଖେଳିବାକୁ କୁହାଗଲେ ସେହି ନମ୍ବରକୁ ସଙ୍ଗେ ସଙ୍ଗେ ବ୍ଲକ୍ କରନ୍ତୁ । ଅଭିଭାବକ ମାନେ ପିଲାଙ୍କ ବ୍ୟବହାର ଉପରେ ସତର୍କ ଦୃଷ୍ଟି ଦେବାକୁ ଗାଇଡ ଲାଇନରେ ପରାମର୍ଶ ଦିଆଯାଇଛି ।